Turismo de Santiago participou na 1ª Conferencia Española de Turismo Cinematográfico

Santiago, 12/6/2016 - Turismo de Santiago, a través do seu servizo para a promoción da cidade a través do sector audiovisual, a Santiago de Compostela Film Commission, participou na primeira edición da Conferencia Española de Turismo Cinematográfico, que se celebrou este xoves en Valladolid.

A Conferencia Española sobre Turismo Cinematográfico foi organizada pola Spain Film Commission como unha xornada para amosar as posibilidades do audiovisual como plataforma de promoción turística. O obxectivo principal do evento foi analizar a importancia do fenómeno do turismo inducido polo cine e a televisión e impulsar a creación do Clúster de Turismo Cinematográfico.

Ademais, aproveitando a celebración desta conferencia, os integrantes de rede española de film commissions e film offices integradas na Spain Film Commission, entre elas a de Santiago, fixaron dous compromisos. O primeiro é promover a elaboración dun Plan Estratéxico Sobre Turismo Cinematográfico en España como destino de turismo cinematográfico, no que colaboren as institucións públicas e as empresas españolas, tanto do sector turístico como do sector audiovisual.

O segundo compromiso é iniciar os pasos conducentes á creación dun Clúster de turismo cinematográfico ou turismo de pantalla como instrumento de xestión desta iniciativa, e co obxectivo de posicionar España como destino turístico baseado nos valores da creatividade, a cooperación e a excelencia, creando iniciativas específicas, estudos, etc. que contribúan tamén ao mellor desenvolvemento da industria audiovisual e dos profesionais españois.