Hoxe luns 13 de abril ás 20 horas o Ateneo de Santiago ten programada na Rúa do Vilar, 19 de Santiago de Compostela unha conferencia titulada «Negocios, andanzas e moradas do cuco de Lourizán», que estará impartida por D. José Antonio Durán, escritor.
Esta conferencia está enmarcada no Ciclo “Eugenio Montero Ríos: a Compostela do seu tempo”, en homenaxe ao centenario do seu pasamento, organizado conxuntamente polo Ateneo de Santiago, o Concello de Santiago, a Universidade de Santiago, a Real Sociedade Económica de Amigos do País, a Cámara Oficial de Comercio, Industria, Servizos e Navegación e o Colexio de Avogados de Santiago.
José Antonio Durán nace no desaparecido campamento de Santa Bárbara de Requejo de Sanabria, en 1941. Hoxe é un caso moi singular na vida intelectual galega, española e internacional. Para empezar, non é profesor, nin funcionario. Conferenciante, bibliófilo, escritor, investigador e editor con densa bibliografía de culto e interdisciplinar, é –dende 1972- un renovador dos movementos sociais contemporáneos. Practica con asiduidade a biografía e a historia local, pero dándolle voo interpretativo de alcance xeral. Conta –entre outros- co premio “Fernández Latorre” de xornalismo (1978), é emblema de ouro de “Amigos de Pontevedra”, e colaborou coas editoriais e nos diarios e as revistas españolas máis prestixiosas. En 1986 incorpora á súa obra intelectual o documental de investigación e comunicación. Máis de 50 horas audiovisuais. As súas exposicións convencionais e audiovisuais deron a volta ao mundo. A TVG e o canal internacional de TVE difunden dende entón as súas “historias”, en galego e español. En 1998 convertiuse no primeiro escritor español que dispón do seu propio Taller de Edicións multimedia. Dende fai dez anos conta con un dos blogs de maior prestixio do mundo, segundo o criterio da Televisión Pública de Alemania: La Cueva de Zaratustra.
Ningún comentario:
Publicar un comentario