Pleno de xuño no concello de Ordes

 Ordes, 30/06/2016 - O Pleno ordense rexeitou na sesión correspondente ao mes de xuño o expediente de modificación de crédito proposto polo Goberno Local. En total habería que falar de 358.000 euros, dos cales  218.000 € destinaríanse á amortización de débeda e 140.000 € para a ampliación do aparcamento do tanatorio do Valado.
Unha obra, esta última, que paradoxalmente foi aprobada no pasado mes de marzo en sesión plenaria. “Con esta decisión bótase por terra a redución de déficit prevista e na que levamos traballando dende a nosa investidura”, asegura José Luis Martínez Sanjurjo, alcalde de Ordes. “A día de hoxe vémonos na tesitura de ter que rexeitar unha decisión moi positiva para a economía local, a cal contaba co beneplácito da Deputación da Coruña”, explica o rexedor. De feito esta englobábase dentro do Plan de Aforro e Investimento do ente provincial. Finalmente todas as formacións da oposición votaron en contra (5 Unión por Ordes, 2 BNG e 1 PSOE), fronte aos 7 favorables do PP.

     O que si contou co respaldo de todos foi o Plan Provincial de Medio Ambiente 2016 (PMA), cun importe total de case 50.000 €. Desta cantidade 26.000 € destinaranse á mellora de sete fosas sépticas nas parroquias de Leira, Montaos, Ordes, Vilamaior e Ardemil. Outros 19.000 € investiranse nas fontes das Cortellas (Ardemil), Esmorís (Buscás) e Mañufe (Mercurín). Por último investiranse outros 4.600 € para o programa de formación e educación ambiental e posta en valor no río Mercurín, especialmente dirixido aos nenos e nenas do lugar. Este inclúe anelamento de aves, colocación de caixas-niño e inventarios de fauna e flora, entre outros.

Tratamento en comisión

No apartado das mocións acordouse, en base ás presentadas polo grupo socialista, dirixirse a Gas Natural Fenosa para solucionar a situación de deterioración e falta de limpeza da área natural de Vilagudín, cuxa titularidade pertence á empresa eléctrica. Por outra banda, quedou posposta para ser tratada en comisión a petición de cambios na ordenanza que regula o pago  na zona azul e na que atinxe ao tráfico e á circulación de vehículos a motor e seguridade viaria, co fin de beneficiar  ás persoas con mobilidade reducida ou algún tipo de discapacidade.

      Ademais, atendeuse a solicitude do BNG para solicitarlle explicacións a Gas Natural Fenosa sobre os cortes de luz rexistrados en Ordes hai escasas semanas. Os nacionalistas advertiron dos riscos que este tipo de incidentes poden supoñer para “a competitividade do tecido comercial e industrial do municipio”. Ante a solicitude para explotar a cafetería do centro comarcal, o alcalde insistiu unha vez máis no seu obxectivo de abrir todo o inmoble de maneira conxunta, unha vez que se analice pormenorizadamente a súa viabilidade e a redución de custos de mantemento ante a futura instalación dun viveiro de empresas no inmoble. Finalmente o equipo de Goberno abstívose na votación, mentres que os demais grupos votaron a favor.

Resumo do pleno do Bloque Nacionalista Galego

O BNG vota en contra da modificación de créditos proposta polo pp
Logo de que no anterior pleno, o BNG votase en contra dos presupostos presentados polo PP, nesta sesión os nacionalistas votaron novamente en contra da modificación de créditos que pretendía sacar adiante o alcalde.
Segundo o voceiro nacionalista, Pablo Vidal “non nos parece axeitada nin operativa a pretensión do alcalde de que a administración local funcione presentando durante o ano continuas modificacións de crédito sobre uns presupostos prorrogados”.
Vidal indica que “o alcalde ten a potestade de aprobar os presupostos mediante a súa vinculación a unha cuestión de confianza, procedemento polo cal os presupostos quedarían automaticamente aprobados si no prazo dun mes non se presenta unha moción de censura”.
O edil nacionalista acusa ao alcalde de “botar balóns fora culpando á oposición. Na vez de laiarse, terá que explicarlle á veciñanza os motivos polos cales non quere aprobar os presupostos cando ten a solución na súa propia man”.

o BNG contra os cortes no subministro eléctrico
O BNG presentou unha moción dirixida a Gas Natural Fenosa en protesta polos últimos cortes no subministro eléctrico, xa que tiveron en varias ocasións unha duración superior a unha hora, e sucederon en días cunhas condicións climatolóxicas aparentemente boas.
Os nacionalistas destacan que Ordes se atopa nunha zona privilexiada dende o punto de vista enerxético, preto de varias fontes de enerxía e tendo o seu territorio atravesado por infinidade de liñas eléctricas, polo que son inadmisibles os continuos cortes sufridos nas últimas datas.
A moción recibiu o apoio unánime da corporación.

Moción para sacar a concurso a xestión da cafetería do centro comarcal

En Abril de 2014 levouse a cabo a reversión das instalacións do centro comarcal ao concello de Ordes. Desde aquel entón o edificio nunca foi utilizado e se atopa completamente abandonado.
En novembro do ano pasado aprobouse unha moción dos nacionalistas para que o edificio acollese un viveiro de empresas.
Nesta ocasión o que se solicitaba era que se sacase a concurso a xestión do servizo de cafetería das citadas instalacións, xa que segundo indican desde o propio BNG, existe demanda veciñal para explotar dita actividade, o cal permitiría xerar uns pequenos ingresos nas arcas municipais, que contribuirían ao mantemento das instalacións.
A moción ficou aprobada coa abstención do PP.

Resumo do pleno do Psoe


O PSOE de Ordes sacou adiante a súa moción para que o Concello poña en marcha medidas de restauración e conservación da área de lecer a carón do encoro de Vilagudín, aínda que se aceptou solicitar por escrito a Gas Natural Fenosa información sobre a titularidade da zona. Así mesmo, unha vez que a zona se atope en condicións de ser utilizada pola veciñanza, a área será incluida na páxina web municipal como punto de interese turístico no Concello de Ordes.

A voceira municipal socialista, Verónica Gómez, pídelle ao alcalde de Ordes un exercicio de responsabilidade e que se retracte das acusacións de falta de rigor e irresponsabilidade verquidas polo Concello sobre o PSOE. “En ningún momento afirmamos que esa área de lecer sexa de titularidade municipal, o que si sabemos é que esa zona fora cedida ao Concello por Gas Natural Fenosa e que o Concello é o responsable do mantemento, conservación e restauración desa zona, aínda que non sexa o titular”, apunta Verónica Gómez. Unha afirmación que foi corroborada no propio pleno polo anterior Goberno municipal.

Así mesmo, e co gallo da aprobación do Plan de Medio Ambiente da Deputación, a voceira municipal socialista instou ao alcalde ordense a ser moito máis rigoroso coas súas afirmacións, sobre todo nas sesións plenarias, e a recoñecer que faltou á verdade cando asegurou que as achegas da Deputación da Coruña ao Concello de Ordes se reduciran significativamente con respecto á anterior etapa do Partido Popular. “Hoxe aprobamos unha achega de 50.000 euros para a mellora e acondicionamento de varias fontes e fosas sépticas, pero no que vai de ano a Deputación achegou 95.886,16 euros para cultura, deportes, servizos sociais e promoción económica, un 40% máis ca no exercicio anterior”, apunta Verónica Gómez.

Modificación de crédito

Por último, os socialistas xustificaron o seu voto en contra do expediente de modificación de crédito presentado polo Concello en que “non vemos axeitado que o Goberno non amose ningunha capacidade negociadora para sacar adiante os prespupostos municipais e logo pretenda gobernar a base de modificacións de crédito”, apunta Verónica Gómez. A voceira municipal puntualiza que “a obra parécenos ben pero, se temos en conta as palabras do actual rexedor que sempre se laia da elevada débeda municipal, ao mellor debería plantexarse destinar ese importe a amortizar débeda”.


Ningún comentario: