Google e a Cámara de Comercio de Santiago de Compostela potencian a presenza online

Santiago, 26/06/2016 - Google lanzou, en colaboración coa Cámara de Comercio de Santiago de Compostela, a plataforma Activa o teu Negocio co obxectivo de optimizar a presenza e participación online de pequenas e medianas empresas a través de formación en competencias dixitais.
Activa o teu Negocio oferta formación gratuíta online e presencial en márketing dixital dirixida a pemes, ademais de incluír casos prácticos e experiencias empresariais reais. O plan de aprendizaxe é práctico e, tras un sinxelo diagnóstico, adecúase ás necesidades específicas de cada empresa.

O próximo 30 de xuño a sede da Cámara (Rúa de San Pedro de Mezonzo, 44) acollerá un taller presencial de 5 horas no que os asistentes aprenderán todos os pasos que deben seguir para definir e poñer en marcha a estratexia dixital da súa empresa. Adicionalmente, os participantes poderán acceder á formación online que abarca 23 módulos con contidos creados por especialistas sobre presenza online, comercio electrónico, redes sociais ou buscadores, froito da colaboración de máis de 100 expertos en tecnoloxía e competencias dixitais de Europa e avalada por IAB Europe e IAB Spain.

Activa o teu Negocio completa a oferta de formación de Actívache, a iniciativa que Google lanzou hai dous anos para formar en competencias dixitais e emprendemento a mozos desempregados. Ata o 31 de maio deste ano, os datos de participación en España ascenden a máis 118.000 mozos formados e supera os 476.000 rexistros nos distintos cursos presenciais e online que ofrece de maneira gratuíta.

Ningún comentario: