Mañá domingo as Fillas Bravas en Bertamiráns

Ames, 02/07/2016 - Este domingo ás 13:00 horas tres mulleres van tomar a praza da Maía de Bertamiráns. Son Patricia de Lorenzo, Mónica García e Arantza Vilar e veñen como as Fillas Bravas, un dos espectáculos da compañía de teatro Chévere. As Fillas Bravas son “fillas do vento, mulleres de andar a pé de toxo” e chegan ante o público con coplas inspiradas en cantos tradicionais galegos, ben orgullosas do seu pasado.
O proceso creativo do espectáculo “Fillas Bravas” foi posible grazas a todo o traballo de investigación que ten detrás. Procuras sobre a sexualidade, as relacións de xénero e os roles da muller na sociedade tradicional. Interrogantes que atopan resposta en versos do cancioneiro popular galego, que foi analizado e do que se extraeu unha escolma e adaptación de coplas das que saen as que escribe Manuel Cortés. A compañía continúa así un dos seus camiños que comezou con obras como “Testosterona” ou “Citizen”, o teatro cunha perspectiva de xénero. Todo sen deixar de lado unha das mellores ferramentas que mellor emprega Chévere: o humor.

Este espectáculo enmárcase na programación de verán, que a semana que vén trae a Sés. A cantautora galega ofrecerá un concerto gratuíto no Pazo da Peregrina o venres 8 de xullo. Nel presentará o seu último traballo “Tronzar os valos”.





Ningún comentario: