Psoe Ames Novo Ames - a oposición dalle o alcalde a oportunidade de rectificar


PSdG-PSOE e Ames Novo ofrécenlle ao alcalde a posibilidade de restituír a legalidade do pleno de xullo
-         Os dous grupos da oposición presentan un recurso de reposición e emprazan ao rexedor a retomar a sesión no punto en que foron vulnerados os seus dereitos
-         José Manuel Miñones e Pilar Candocia advírtenlle a Santiago Amor de que acudirán á xustiza se non corrixe o seu erro

  Os grupos municipais do PSdG-PSOE e de Ames Novo presentaron no rexistro do Concello de Ames un recurso de reposición relativo ao acontecido no último pleno ordinario da corporación, o pasado 26 de xullo. Nesta sesión, o alcalde vulnerou o dereito dos concelleiros da oposición a retirar as emendas aos orzamentos municipais que presentaran e decidiu deixar sobre a mesa o debate e votación sobre o orzamento, á vista de que o grupo de goberno carecía de votos suficientes para aprobalos.
Con este recurso de reposición, o PSdG-PSOE e Ames Novo téndenlle a man ao goberno para repoñer o normal desenvolvemento da sesión plenaria, na que o rexedor infrinxiu as mínimas formalidades democráticas. En concreto, os dous grupos propoñen restituír a situación do pleno no momento en que se vulneraron os dereitos dos edís da oposición, de modo que solicitan que o debate se retome no punto da orde do día sobre os orzamentos municipais de 2012, admitindo a retirada das emendas presentadas e garantindo que a sesión prosiga nos mesmos termos e cos mesmos concelleiros que constituían o pleno nese momento. Deste xeito, non se modificarían as condicións da sesión nin se lesionarían os dereitos dos participantes.
No caso de que o alcalde Santiago Amor non acepte o recurso de reposición presentado, tanto o portavoz do PSdG-PSOE, José Manuel Miñones, como a portavoz de Ames Novo, Pilar Candocia, advirten de que acudirán á xustiza ordinaria para facer valer os seus dereitos. Non obstante, agardan que o rexedor aproveite a oportunidade que lle dan de correxir o seu erro.
O acontecido no pleno
O pleno do pasado 26 de xullo, constituído coa ausencia de tres concelleiros do grupo do PP, incluía na súa orde do día un punto, o quinto, para a aprobación inicial do orzamento municipal de 2012. Ao inicio deste punto, os concelleiros da oposición presentaron varias emendas ao orzamento: unha que recollía a posición común da Plataforma do Lixo e outro grupo delas presentadas por Ames Novo.
Presentadas as emendas, o alcalde indica que deberían ser informadas polo departamento de Intervención municipal ao implicaren modificación de partidas, e que por tanto o orzamento debería quedar pendente de aprobación para unha vindeira sesión plenaria.
Ante esta situación, os concelleiros da oposición solicitáronlle ao alcalde a retirada das emendas presentadas. Pero o alcalde, que tiña a intención de evitar a votación do punto ao ver que a súa situación de minoría lle impediría aprobar o orzamento, decidiu continuar coa sesión deixando ‘sobre a mesa’ a cuestión.
Todo esto a pesar de que a propia secretaria xeral do Concello, en resposta a unha consulta dos dous grupos da oposición, informara na propia sesión que os concelleiros propoñentes dunha emenda teñen dereito a retirala. Esto non impediu que o alcalde pasase ao seguinte punto da orde do día, desoíndo as advertencias da oposición e consumando o atropelo aos seus dereitos.

Ningún comentario: