O CELVIT GAÑA O MARATÓN DE FÚTBOL CONCELLO DE FRADES 2012
O equipo Celvit, integrado por xogadores das
parroquias de Céltigos e de Vitre, proclamouse vencedor no Maratón de Fútbol
Concello de Frades 2012, disputado no campo municipal de herba artificial. O
Celvit gañoulle na final ao Xuventude, nun encontro moi igualado que rematou o
tempo regulamentario con empate a cero e que se tivo que decidir nos penaltis.
O Celvit e o Xuventude acadaran a final ao gañarlles en semifinais ao
Abellá e ao Combinado Frades, respectivamente. O maratón, que esta ano cumpriu
a súa decimoquinta edición, contou con nove equipos participantes e cunha
elevada afluencia de público. Tanto as inscricións dos equipos como as entradas
dos espectadores foron gratuítas.
O alcalde de Frades, Miguel Prado, presidiu a entrega dos trofeos. Ademais
dos especiais para o campión e o subcampión, recibiron un trofeo todos os
participantes e tamén se distinguiu ao máximo goleador (Mandaio, do Xuventude),
e ao porteiro máis eficaz (Miguel, do Celvit).
Ningún comentario:
Publicar un comentario