Varios concellos – actos do Día da muller traballadora

CERCEDA, MESÍA, OROSO E TRAZO CELEBRAN MAÑÁ XOVES ACTOS CONMEMORATIVOS DO DÍA INTERNACIONAL DA MULLER TRABALLADORA

Ordes e Frades uniranse ás celebracións este venres cunha charla informativa sobre a reforma laboral e un vídeo-fórum

7 de marzo de 2012.- Cerceda, Mesía, Oroso e Trazo abrirán mañá xoves o programa de actos conmemorativos do Día Internacional da Muller Traballadora, organizados polos Concellos da comarca ordense en colaboración con Centro de Información á Muller (CIM) da Mancomunidade. Unhas iniciativas de asistencia libre e totalmente de balde.

Uns actos que xirarán non só sobre os dereitos das mulleres e sobre a súa situación laboral, senón tamén chamarán a atención sobre as desigualdades salariais entre homes e mulleres. “En España, as mulleres perciben un salario anual medio dun 22% menos que os homes. Debemos tomar as medidas necesarias para eliminar esa fenda, garantindo salarios iguais para postos do mesmo valor”, explica o presidente da Mancomunidade, Manuel Regos Boquete.

Actos previstos mañá xoves

O Concello de Mesía acollerá o primeiro destes actos: unha xornada informativa sobre “Mulleres: formación e emprego”, que será impartida por Luis Baneira, secretario xeral da Comisión Executiva Provincial FSP-UXT da Coruña. O acto terá lugar na casa da Cultura de Mesía a partir das 16:30 horas e contará coa participación de persoal do CIM, que presentará esta entidade como recurso de información e asesoramento á muller na comarca de Ordes. Ademais, o Concello de Mesía ten programadas tamén outras actividades para conmemorar o Día Internacional da Muller Traballadora e que terán lugar ao longo de todo o mes (como clases de ioga e de punto) así como unha saída cultural para o vindeiro 23 de marzo.

Dúas horas e media máis tarde, concretamente ás 19:00 horas, Luis Baneira trasladarase ata a casa da cultura de Cerceda para impartir outra conferencia, nesta ocasión sobre “Os dereitos das mulleres”, na que contará co apoio de técnicos e concelleiros do Concello de Cerceda. Ao igual ca en Mesía, técnicos do CIM presentarán esta entidade aos veciños e veciñas de Cerceda presentes. Ademais, o Concello de Cerceda ten prevista a emisión dun programa especial sobre o Día Internacional da Muller Traballadora na televisión e na radio de Cerceda.

Paralelamente, o centro cultural de Sigüeiro (Oroso) acollerá a partir das 19:30 horas tres actos conmemorativos do Día Internacional da Muller Traballadora. A concelleira da Muller, María del Carmen Liste Raña, presentará un boletín con información especialmente útil para as mulleres de Oroso e moderará unha xornada informativa sobre a situación laboral da muller en Galicia e sobre as desigualdades salariais entre homes e mulleres, impartida pola axente de emprego e desenvolvemento local de Oroso, Rosa María Ramírez Campos.

Acto seguido, a directora do Centro de Información á Muller, Nazaret González Martínez, presentará os servizos que ofrece o CIM a prol da igualdade de oportunidades. Unha vez rematadas ambas ponencias, María del Carmen Liste fará entrega dos premios da segunda edición do concurso de fotografía “Muller traballadora”, á que este ano se presentaron un total de quince veciñas.

Esta xornada conmemorativa rematará en Trazo, onde entre as 20:00 e as 22:00 horas terá lugar unha xornada informativa sobre “Ansiedade e trastornos psicosomáticos”, impartido por persoal do CIM de Ordes na primeira pranta do Concello vello. Neste caso, as prazas xa cubertas, se ben aínda quedan prazas para a segunda charla, “A cotitularidade das explotacións agrarias e a nova regulación do servizo doméstico”, que terá lugar o vindeiro 13 de marzo.

Actos para o venres

Para o venres están programadas actividades nos concellos de Frades e Ordes. Así, o multiusos José Botana de Frades acollerá ás 16:00 horas un vídeo-fórum coa proxección da película “En tierra de hombres”, un filme dirixido pola neozelandesa Niki Caro e protagonizado por Charlize Theron que narra a vida dunha nai solteira que regresa ao seu pobo natal e busca traballo nas minas de ferro, un sector dominado polos homes. A asistencia á proxección é totalmente libre e de balde. Ao rematar a emisión, establecerase un debate moderado por persoal do CIM de Ordes.

Por último, o auditorio da Casa da Cultura de Ordes acollerá ás 20:00 horas a xornada informativa “A reforma laboral, principais cambios que afectan aos dereitos e deberes dos/as traballadores/as e a nova regulación do servizo doméstico”, impartida por Luis Baneira, secretario xeral da Comisión Executiva Provincial FSP-UXT da Coruña e organizada polo Concello de Ordes en colaboración co CIM. A entrada é libre e de balde.

Ningún comentario: