Silleda – a alcaldesa reuniuse coa directora xeral de urbanismo

A Alcaldesa de Silleda e a Directora Xeral de Urbanismo reuníronse hoxe para falar do PXOM e trataron temas coma os prazos do mesmo e a inclusión do Polígono Industrial de Chapa

Silleda, 9 de marzo de 2012

A Alcaldesa de Silleda e Concelleira de Urbanismo, Paula Fernández Pena, vén de manter unha reunión coa Directora Xeral de Urbanismo, Encarnación Rivas, na que trataron varios temas, entre eles os prazos so PXOM, trala que a rexedora se mostrou satisfeita polas solucións acadadas.

En canto aos prazos do PXOM trasdezao, a Directora Xeral comprometeuse a resolver o informe previo do PXOM no prazo establecido por lei, dous meses como máximo, trala presentación do mesmo á Xunta de Galicia. Rivas tamén se ofreceu a manter reunións, posteriores á que se realizará o mércores na Casa Consistorial, con da corporación municipal para aclarar as dúbidas que poida surxir na explicación dos documentos por parte da empresa redactora.

Ante a situación do Polígono Industrial de Chapa, a Directora Xeral mostrouse de acordo coa modificación, ao abeiro da Lei do Solo do PXOM plantexada en consenso cos empresarios afectados, delimitando a superficie que pasará a ser industrial. A responsable de urbanismo do goberno autonómico cualificou positivamente esta iniciativa. Cabe recordar que esta delimitación foi presentada no Concello polos empresarios da zona, logo de que a Alcaldesa mantivera varias reunións con eles nos que lle propuxo incorporar a proposta no PXOM.

No tocante ao campo de fútbol a Alcaldesa de Silleda, Paula Fernández Pena, explicou a Encarnación Rivas que no PXOM proposto plantéxase converter toda a zona coñecida como “prado de María” xunto co campo de fútbol, nunha área de reparto fixando a superficie deportiva como zona de cesión obrigatoria quedando, desta maneira, ese espazo como dotacional. Con esta solución a propietaria poderá desenvolver o chan no momento en que quixera, xa que tería máis do 50% da propiedade da Area de reparto, aínda que non houbera acordo coa Xunta de Galicia, quedando de esta forma o espazo de campo de xogo como tal, ao estar definido dentro da area como zona dotacional. A Directora Xeral de Urbanismo afirmou que a solución era positiva, e afirmou que dese xeito o goberno autonómico mantería unha parte porcentual da área para construír un edificio de vivendas protexidas cando a situación económica o permita.

Finalmente, en canto á inclusión da circunvalación a Silleda, na reunión mantida hoxe, entre a alcaldesa e a directora xeral acordaron eliminala do PXOM xa que se entende que, ao non haber agora mesmo dispoñibilidade económica para a súa construción, será máis interesante modificar puntualmente o plan no futuro, cando si exista ese diñeiro para a realización deste proxecto “é demasiado complicado incluír esta vía non só por cuestións técnicas senón porque non se da xustificado economicamente”.

Ningún comentario: