Os máis de 50 militantes nacionalistas en Ames seguirán a traballar polos veciños e veciñas da localidade
O BNG de Ames elixirá Consello e Responsábel local nos vindeiros días
Ames, 07/marzo/2012.- O Consello Local de Ames decidiu convocar Asemblea Local para que os militantes elixan o novo Consello Local así como Responsábel e Vicerresponsábel da localidade. Nesta Asemblea, composta na actualidade por máis de 50 militantes, logo das renuncias feitas públicas, completarase así o proceso derivado da XIII Asemblea Nacional do BNG, logo de ter elixido xa representantes nacionais e comarcais.
Así mesmo, o Consello Local avaliou a situación política en Ames, que tamén será obxecto de debate na Asemblea Local. O BNG de Ames considera que o recente abandono desta formación política dos concelleiros e concelleiras electos logo de integraren a lista do BNG nas últimas eleccións municipais, mais coa intención manifesta de manteren a súa condición de membros na corporación municipal, constitúe un acto de transfuguismo político en toda regra. Por iso, a dirección do BNG xa solicitou a devolución das actas de concelleiro, e no caso de que non se produza dita entrega, procederá a comunicar esta circunstancia ao concello de Ames, aos efectos de adecuar o seu estatus na corporación municipal, aplicando a normativa vixente en materia de réxime local, que recolle normativamente os acordos políticos asinados pola maioría de forzas políticas representativas para atallar o transfuguismo político.
O BNG vén desenvolvendo unha actividade política sostida e continuada no concello de Ames durante case dúas décadas, en base ao apoio obtido dunha parte representativa da súa cidadanía. Nos dous últimos procesos electorais celebrados en 2011, o BNG foi depositario da confianza de máis de 2.000 veciños e veciñas de Ames, aos que seguiremos a defender e representar en todas as institucións. Ademais, queremos manifestar publicamente a nosa vontade de manter canles de comunicación, información e colaboración con todas as asociacións e entidades representativas do concello de Ames, a fin de escoitar as súas xustas demandas e reivindicacións e ser instrumento para que as mesmas sexan debatidas nos foros institucionais axeitados.
En momentos tan críticos para unha parte importante da nosa poboación en Ames, o que realmente importa ao BNG é mudar as políticas nefastas e regresivas que se están adoptando e que incrementan actual devalar negativo da economía e o emprego. O afán en superar ditas políticas, é o que nos manterá vivo ao BNG en Ames. O ánimo de contribuír a que a maioría social de Ames mellore a súa situación económica e social manteranos firmes e visíbeis á hora de seguir representando tanto ás persoas que nos confiaron xa o seu apoio como a todas aquelas que coinciden na necesidade de manter un nacionalismo unido e activo na capital do val da Maía.
Ningún comentario:
Publicar un comentario