A CHEGADA DE CHÉVERE COMO COMPAÑÍA TEATRAL RESIDENTE AMPLÍA CON MEDIO CENTO DE ACTIVIDADES A OFERTA CULTURAL DE TEO
· O convenio entre o Concello e a compañía contempla a estrea da nova produción, varios espectáculos e actividades de formación
· O auditorio da Ramallosa acolle a presentación pública de Chévere este sábado 10 de marzo ás 22 horas, con entrada de balde
09 de marzo de 2012. O alcalde de Teo, Martiño Noriega, e a representante de Chévere, Patricia de Lorenzo, asinaron esta mañá o convenio de colaboración que permitirá desenvolver o proxecto da prestixiosa compañía teatral como residente do Concello. Este acordo permítelle á administración local contar cunha ampla programación anual no municipio, con preto de medio cento de actividades, entre funcións teatrais, proxeccións e obradoiros.
O plan de actividades suscrito contempla a produción dun novo espectáculo de Chévere, que se estreará en Teo o vindeiro mes de abril e será representado noutras cinco ocasións. Do mesmo xeito, durante o ano a compañía ofrecerá seis ‘Ultranoiteo’, o seu espectáculo con teatro e cabaré. Tamén se estableceron dúas funcións de ‘Citizen’ e un ciclo de teatro e danza no que se prevén catro actuacións. Todas estas actividades terán lugar no Centro Sociocultural da Ramallosa, o espazo que a compañía utilizará para os seus ensaios e traballo escénico, con entradas a dez euros.
Porén, o convenio suscrito esta mañá recolle outras propostas de balde, que buscan a implicación, formación e sensibilización de todos os públicos e que se desenvolverán tanto no auditorio da Ramallosa como noutros locais públicos distribuidos por todo o municipio. Así, prevense seis obradoiros do espectador na rede de Casas Comúns e no auditorio, que consistirán nunha sesión de adestramento previa e na asistencia a un espectáculo cun coloquio posterior co grupo.
Outra iniciativa nesta liña de formación e sensibilización son os ‘NanoTeo’, campamentos escénicos para nenos e nenas de entre seis e once anos previstos para o mes de xullo. Ademais, Chévere programa dous obradoiros para mulleres ‘Ser home x un día’ en Casas Comúns e dous concertos didácticos para adolescentes no IES de Cacheiras, baixo o título de ‘I`ll be watching you’.
O programa complétase con catro sesións de proxección de longametraxes, curtas e videocreacións comentadas en primeira persoa, que se repartirán entre o centro sociocultural e as Casas Comúns. E ademais, como complemento aos espectáculos principais, desenvolveranse obradoiros, campañas de promoción e ensaios abertos.
Presentación pública
Para dar a coñecer o novo programa, Chévere organizou para este sábado 10 de marzo un acto de presentación pública, no que participarán Miguel de Lira, Patricia de Lorenzo, Manuel Cortés e Xesús Ron, integrantes da compañía, ademais do alcalde de Teo, Martiño Noriega, e a concelleira de Cultura, Carme Hermida. No acto, a partir das 22 horas no auditorio do Centro Sociocultural da Ramallosa, vaise presentar unha exposición sobre os vintecinco anos de traxectoria de Chévere e actuará a Orquestra Os Modernos cun amplo repertorio de bailes. A entrada é de balde e aberta a todos os públicos.
O alcalde, Martiño Noriega, asegura que a chegada de Chévere a Teo como compañía residente terá “un retorno en dinamización e programación cultural” e amosouse convencido de que a cidadanía “disfrutará do bo facer dunha compañía de tanto prestixio”. Noriega explica que esta iniciativa é unha clara aposta pola industria cultural galega como un sector económico estratéxico.
Dotación técnica para o Centro Sociocultural
A concelleira de Cultura, Carme Hermida, agarda tamén unha “grande aceptación” por parte da sociedade e destacou que, ademais da programación, o Concello beneficiase coa dotación técnica de recursos de iluminación, son, vídeo e maquinaria da compañía. Todos estes elementos pasan e estar no Centro Sociocultural da Ramallosa e poderán ser utilizados para as programacións propias do Concello sen custo adicional, e tamén polas entidades do tecido asociativo teense que organicen actividades no centro.
Neste sentido, Miguel de Lira puxo de manifesto que a chegada de Chévere a Teo supón “ter aquí o espírito da Sala Nasa” e tamén que o espazo do centro sociocultural teña unha dotación técnica profesional, cun equipamento de iluminación polivalente, maquinaria escénica que lle dá novas posibilidades ao auditorio, e material de son e vídeo de última xeración.
Sobre Chévere
O grupo Chévere naceu no ano 1987 polo que ademais en 2012 cumprirá 25 anos e esa celebración terá lugar en Teo. Dende finais dos 80 tense convertido nunha referencia no mundo escénico galego, destacando a apertura da Sala Nasa no 1992 onde estrea todas as súa obras. Nos anos 90 realiza máis de 200 funcións en España e Portugal co musical Río Bravo. No 1995-96 estrea Annus Horríbilis, con temporada en Madrid e Barcelona onde recibe o Premio da Crítica de Barcelona. No 2005-06 Chévere co-produce para a TVG a serie “Pepe o Inglés”. Máis recentemente co-produce a longametraxe “Crebinsky” e as obras Testosterona e Citizen.
Ningún comentario:
Publicar un comentario