Manuel Anxo Fernández é o novo portavoz do BNG de Teo que renuncia a formar parte do goberno municipal
Teo, 2 de marzo do 2012.- O BNG de Teo convocou esta mañá unha rolda de prensa para informar da conformación actual do grupo municipal no Concello, logo das baixas dos últimos días na formación, así como da súa renuncia a formar parte do goberno municipal que pasa a estar formado unicamente por concelleiros non adscritos. Así, o actual grupo municipal do BNG de Teo está integrado polos concelleiros Manuel Anxo Fernández, como portavoz do grupo, e Carmen Diéguez. Ambos os dous, acompañados do responsábel local de Teo, Andrés Fernández, compareceron esta mañá ante os medios.
O responsable local do BNG de Teo, Andrés Fernández, explicou como se chegou a esta situación facendo fincapé na ausencia de conflitos ou enfrontamentos na asemblea local durante todos estes anos e lembrando que a asemblea depositou toda a súa confianza en Martiño Noriega para a confección da candidatura, e el foi quen tivo o maior poder de decisión na conformación final da mesma. Fernández quixo subliñar tamén que o actual alcalde durante o período electoral adquiriu o compromiso de lealdade ao BNG e devolución das actas. O responsábel local destacou que foi a decisión do Encontro Irmandiño e de Martiño Noriega de abandonar o BNG e a súa posterior baixa da organización a que rompeu as boas relacións na asemblea así como todos os compromisos que afectan non só ao BNG senón tamén aos veciños e veciñas de Teo.
Por este motivo, a dirección do BNG e a Asemblea Local de Teo víronse obrigadas a levar a cabo unha serie de accións nos últimos días. Así, desde a dirección nacional pedíuselle aos concelleiros que abandonaron o BNG que renunciaran ás súas actas no prazo dunha semana e comunicóuselle ao Concello como quedaría conformado o novo grupo municipal. Pola súa banda, a Asemblea Local de Teo igualmente pídelle aos concelleiros que devolvan as actas e decide deixar de formar parte do grupo de goberno xa que os concelleiros que abandonan a organización foron elixidos pola cidadanía para representar ao BNG e agora abandónano para formar unha nova organización política, descualificándoo e promovendo que máis militantes tamén o abandonen. Por todo isto, a asemblea local considera que o coherente e non formar parte do goberno xa que nin a militancia nin cidadanía en xeral entendería que se seguira gobernando con quen levou a cabo estas accións.
O responsábel local de Teo explicou tamén como quedaría a situación do grupo municipal que quedaría constituído por Manuel Anxo Fernández e Carmen Diéguez. Deixou claro que a intención do grupo municipal non é promover nin apoiar un cambio de goberno en Teo senón corresponder á cidadanía que apoiou o programa e a candidatura do BNG nas últimas eleccións, esixindo ao goberno o cumprimento de dito programa e polo tanto apoiando ao goberno no desenvolvemento dese programa e de calquera outra medida favorábel para a veciñanza. Antes de rematar a súa intervención, Fernández quixo deixar claro que con isto o BNG pasa páxina e dedicarase plenamente a tratar de dar solución aos problemas que se presentan na sociedade antes esta crise que estamos a vivir.
A continuación tomou a palabra o novo portavoz do grupo municipal do BNG, Manuel Anxo Fernández para incidir en que a crise do goberno municipal non a causou o BNG senón os que decidiron abandonar a formación ao tempo que procedían a descualificala e anunciaban un novo proxecto político. Todo isto trouxo como consecuencia lóxica unha creba de confianza mutua polo que a “mellor achega que podemos facer á normalidade institucional do concello é deixar de integrar o goberno municipal para evitar que o conflito promovido polo encontro irmandiño e Martiño Noriega salpique á veciñanza”. Manuel Anxo engadiu ademais que o BNG non se mantería nunca nun goberno meramente por conservar postos e insistiu en que vai manter unha actitude coherente politicamente e non vai promover un novo goberno. “O BNG vai actuar con responsabilidade e seguiremos traballando por e para a veciñanza de Teo”, rematou o novo portavoz municipal.
Ningún comentario:
Publicar un comentario