Santiago - mañá domingo SRTPS. Episodio 1: Mirlo&Rula’ de Cinema Sticado

Dentro do ciclo de teatro da concellaría de Acción Cultural do Concello de Santiago, e enmarcado na Rede Galega de Teatros e Auditorios, chega a Compostela este domingo ‘SRTPS. Episodio 1: Mirlo&Rula’ de Cinema Sticado. Será ás 20.30 h no Teatro Principal e as entradas, a 10 euros, poden mercarse en entradas.abanca.com, no 902 434 443, ou no despacho de billetes do Teatro Principal (aberto de 18.00 a 21.00 h). 

Cinema Sticado é un colectivo de artistas que fai cine ao vivo. Interesados nas novas linguaxes narrativas o colectivo nace no 2013 co obxectivo de explorar as posibilidades expresivas que xorden nas fronteiras entre os campos escénico e audiovisual para contar historias no ámbito da representación en vivo e en directo. O núcleo do colectivo está composto por Xosel Díaz (enxeñeiro e creador audiovisual) e Helena Varela (actriz de teatro e cine). Despois de dous anos de experimentación presentan este seu primeiro traballo. 

Un home sixiloso (Mirlo) e unha muller soñadora (Rula) cruzarán os seus destinos nunha fuxida inesperada por culpa dun segredo a voces, unha fuxida tinguida de intriga e sangue nun mundo en desequilibrio coa natureza e os dereitos sociais e ateigado de corrupción política. Prepárate para entrar nun mundo que nunca antes viras. Intriga, corrupción, asasinatos… e unha fuxida inesperada.

Quererás ver máis!

Manipuladores en directo: Xosel Díez e Helena Varela

Creación: Xosel Díez e Helena Varela

Debuxos: Xabi Varela

Programación Pure Data: João Pinheiro

Iluminación LED: Man Núñez

Decorados: Noela Rivera

Ningún comentario: