Silleda – programación entroido 2012

A Concellaría de Cultura activa grandes carnavais en Silleda nas próximas semanas

- Esta fin de semana celebrarase o Entroido en Lamela, mentres que a semana vindeira será o turno de A Bandeira, Silleda, Laro e Parada

Silleda, 10 de febreiro de 2012. Un total de cinco parroquias do Concello de Silleda celebrarán ao grande o Entroido nas próximas semanas.

Lamela inaugurará estas datas mañá ás 17.00 horas cun desfile de entroido que ten prevista a saída dende Barrabaite. Hora e media máis tarde celebrarase o tradicional Alto dos Xeneais e a continuación terá lugar o pregón a cargo de “Os Regueifeiros”. A partir das 23.00 horas comezará o gran baile de entroidos amenizado coa Festa Radio Líder; a media noite será a entrega de premios aos mellores disfraces.

O primeiro día de festa en A Bandeira será o xoves 16 que haberá cunha conferencia impartida por Xosé Ramón Mariño Ferro titulada “O Entroido ou os praceres da carne, ás 20.30 horas, mentres que ao día seguinte, a vila celebrará por cuarto ano consecutivo a Gran Vellada co Tractor Filloeiro.

O sábado 18 será o gran día en A Bandeira. A xornada empeza ás 12.30 horas coa presentación dos cabezudos, confeccionados previamente nun obradoiro, e ás 16.00 horas dará comezo o desfile de máscaras, con saída dende a rúa do Agro do Balo, e encabezado polos Xenerais. Ás 17.30 horas celebrarase o Alto dos Xenerais infantil, e media hora máis tarde terá logar o popular e tradicional alto dos Xenerais do Entroido. O programa rematará ese mesmo día ás 22.30 horas no polideportivo cun baile de disfraces amenizado por dous grupos musicais. Prolongarase ata medianoite, momento en que serán entregados os premios ás mellores máscaras nas diferentes categorías. O luns día 20, será o Entroido infantil, no centro cultural Vista Alegre a partir das 17.00 horas, no que actuará Raquel Queizás “Contos do Cestiño, evento organizado pola asociación do mesmo nome que o centro.

A vila de Silleda recóntrase co entroido

En Silleda, os carnavais darán comezo o día 17 a partir das 19.30 horas coa actividade “Roteiro dos carnaBares”, organizado por varias asociacións de Trasdeza. Consiste na degustación de pinchos naqueles establecementos hosteleiros colaboradores, polas persoas que acudan disfrazadas. Asemade, nestes locais estará a exposición “Antroidos dantonte”; desta actividade tamén se poderá desfrutar o sábado, dende a mesma hora. O 18, os cativos poderán celebrar o Entroidiño Infantil, dende as 17.00 horas na Praza da Feira Vella, onde haberá música, animación e unha carpa.

Silleda festexará o gran día de Entroido o domingo 19, pois celebrarase o gran defile de máscaras e o baile do entroido que terá lugar no mesmo emprazamento que o infantil. Todos aqueles que queiran optar aos premios deberán inscribirse previamente na Casa da Cultura antes das 17.15 horas dese mesmo día. As recompensas económicas son as seguintes: Comparsas: 1º 300 euros “Concello de Silleda”; 2º 150 euros “A.VV. Olaia”, 3º 100 euros “A.S.C. Adellís”. Invividuais e parellas de Ecos (en vales de compra no comercio de Silleda): 1º 90 euros; 2º 60 euros e 3º 50 euros. Premio “Asociación Feiral Semana Verde” cesta de artesanía ao disfraz que mellor simbolice a cultura rural.

O Dúo Punto Cero será o encargado da música cara ao fin da xornada.

A organización deste entroido corre a cargo da Concellaría de Cultura, Educación e Turismo do Concello de Silleda; A.S.C Adellís, Ecos, Avanza Trasdeza, Banda de Música Municipal de Silleda, Escola Municipal de Música, ANPA Pícaros, SD Silleda, Asociación de Mulleres do Municipio de Silleda.

A parroquia trasdezá de Laro ten previsto celebrar estas datas o día 17 os actos comezarán ás 22.00 horas cunha cea na que o menú será empanada, churrasco, doces típicos destas datas, café e chupitos; o prezo da mesma será de 15 euros para os adultos e 8 para os nenos. Quen que desexe asistir poderán retirar as invitacións, ata o día 15, en Casa Castro e Comercio Alonso en Laro, e no Bar Debian, en Silleda. Haberá premio para os mellores disfraces e a velada estará amenizada polos grupos Trasnos de Doade e dúo Máster. A organización do entroido nesta parroquia corre a cargo da Asociación de Amigos da Trotilla.

Parada tamén prevé levar a cabo o seu tradicional baile de máscaras na noite do día 18, e o trío Bluestar animará a velada con música; a Asociación de Veciños foi a encargada de organizar o evento.

Nesta ocasión, Dornelas non festexará o seu popular entroido nin o Alto dos Xenerais.

Cabe destacar que todos estes programas de carnaval están promovidos pola Concellaría de Cultuta, Educación e Turismo do Concello de Silleda.

O Concelleiro de Cultura, Matías R. da Torre, afirma que “dende este departamento trátase de que esta festa tan popular como tradicional subsista naqueles lugares onde se vén celebrando habitualmente, e tamén revitalizalo como é o caso de Silleda, onde decaeu nos últimos anos” e engade que “por isto se demanda a participación activa dos colectivos sociais e dos veciños en xeral para recuperar o ambiente do carnava; tamén de haí a inversión económica dende esta Concellería”.

Ningún comentario: