Oroso – nova rede de bombeo de auga na parroquia de Trasmonte

O CONCELLO DE OROSO DOTARÁ AO LUGAR DE O EMPALME DUNHA REDE DE BOMBEO QUE DARÁ SERVIZO A 35 VIVENDAS DA PARROQUIA DE TRASMONTE

O Concello xa ten redactado o proxecto da obra, orzamentada en 56.000 euros, que será licitada antes de finais de marzo

10 de febreiro de 2011.- O Concello de Oroso vén de rematar a redacción do proxecto de execución dunha Rede de Bombeo no lugar de O Empalme (parroquia de Trasmonte) e dun grupo de bombeo na zona máis baixa deste núcleo de poboación para poder derivar as augas residuais verquidas ao alcantarilllado ata a rede xeral de saneamento. Unha rede xeral que discurre pola estrada N-550, situada a 365 metros de distancia.

Unha obra orzamentada en 56.269 euros, financiados con cargo ao Plan de Cooperación cos Concellos, e que ten un prazo de execución de 3 meses. O alcalde de Oroso, Manuel Mirás, sinala que “o noso obxectivo é que poida saír a licitación antes do 30 de marzo para que poidan executarse o máis pronto posible”. Neste sentido, o alcalde orosán recoñece que o gran número de empresas que se están a presentar aos distintos concursos está a ralentizar un pouco a adxudicación dalgunhas obras. “Á licitación do abastecemento de auga aos núcleos rurais de Vilacide de Abaixo e de Berdomás, que sacamos a concurso a principios de xaneiro, presentáronse máis de sesenta empresas”, exemplifica Mirás Franqueira.

Características das obras

As obras consistirán na instalación dunha rede de bombeo no lugar de O Empalme, onde na actualidade existen 35 vivendas, e a execución dun grupo de bombeo na zona máis baixa deste núcleo de poboación para poder derivar as augas residuais verquidas ao alcantarillado existente na zona ata a rede xeral de saneamento. Na actualidade, este núcleo rural de Trasmonte dispón de rede de saneamento, aínda que se atopa en desuso ao non contar con grupo de bombeo. Unha vez realizada esta obra, a estación de bombeo de augas residuais (EBAR) de O Empalme terá capacidade para atender ata a 60 vivendas.

Os traballos incluirán un desmonte de terras na zona ata a rasante axeitada, separando a terra vexetal para a súa posterior reutilización e deixando taludes de seguridade naquelas zonas que quedan a distinto nivel. O pozo de bombeo, prefabricado de 1,5 metros de diámetro por 3 metros de profundidade, contará con dous grupos electrobomba que, mediante sondas de nivel, farán que funcione unha bomba alternativamente ou as dúas á vez. As bombas enviarán as augas residuais a través dunha tubería de impulsión de polietileno de alta densidade ata alcanzar o pozo de rexistro de conexión coa rede xeral, situada na N-550.

Unha vez redactado polos servizos técnicos municipais de Oroso, este proxecto será enviado á Deputación Provincial da Coruña. Unha vez que o organismo provincial dé a súa conformidade ao proxecto, éste sairá a licitación pública.

Ningún comentario: