O SERVIZO DE EMERXENCIAS DE BRIÓN EXTINGUE UN LUME FORESTAL EN BASTAVALES PROVOCADO POR UN VEHÍCULO INCENDIADO
Os membros do gruñir brionés tamén participaron onte xoves na excarcelación dun ferido nun accidente de tráfico en A Baña
10 de febreiro de 2012.- Efectivos do Servizo de Emerxencias de Brión (SEBRI) extinguiron na noite de onte xoves un lume forestal na parroquia de Bastavales provocado por un vehículo incendiado. O suceso tivo lugar ás 20:30 horas, cando veciños da zona alertaron ao 112 da existencia dun coche ardendo nunha pista de terra detrás do camposanto de Bastavales.
Tres efectivos do SEBRI desprazáronse ata o lugar dos feitos con dous vehículos, a Bomba Urbana Lixeira (BUL) e a pick up, e procederon a apagar o lume no vehículo e tamén nuns matorrais cercanos, nos que prenderan as lapas. A rápida intervención dos membros do SEBRI, unida ás baixas temperaturas, impediron que o lume se extendera a unha zona de monte cercana.
Excarcelación
Por outra banda, membros do SEBRI participaron tamén na xornada de onte na excarcelación dunha persoa do interior dun vehículo volcado na parroquia de Corneira (A Baña). Unha intervención na que colaboraron cos Bombeiros de Santa Comba, a Garda Civil de Tráfico e o 061. Tamén acudiu un helicóptero á zona, aínda que finalmente o ferido foi evacuado en ambulancia a un centro hospitalario. O suceso tivo lugar ás 14:45 horas de onte xoves.
Ningún comentario:
Publicar un comentario