O programa de adopcións especiais da fundación Faiben organiza un novo encontro de formación de familias no Pazo da Peregrina
Ames, 10 de febreiro de 2012. Este sábado 11 de febreiro no Pazo da Peregrina, en Bertamiráns, terá lugar un novo encontro de formación de familias, organizado pola fundación Faiben. Fundación de apoio á infancia e ao benestar, (www.faiben.org ), quen a través do programa de adopcións especiais “adoptar é posible” traballa con familias interesadas en adopcións especiais. Dito programa desenvólvese en colaboración coa Consellería de Traballo e Benestar, a través da Secretaría Xeral de Familia e Benestar. Entre os obxectivos do programa está a sensibilización, captación, información e formación das familias dispostas a adoptar menores da comunidade autónoma galega, que polas súas características especiais teñen máis dificultades para exercer o seu dereito a vivir en familia.
Este programa encárgase de buscar solución adoptiva a aqueles nenos/as que, estando en situación de ser adoptados, as súas características persoais poñéndollo mais difícil. Falamos de nenos/as maiores, grupos de irmáns, nenos/as con algunha discapacidade física ou intelectual, ou algunha outra característica que dificulte a súa adopción. En Galicia hai nenos/as que están medrando en centros de menores, e precisan e desexan ser membros dunha familia.
Atopar e formar familias é un dos obxectivos do programa. Acompañalos nos comezo do proceso adoptivo é outro aspecto clave que minimiza os riscos de fracaso e favorece a evolución da integración. Na formación trabállase en grupos reducidos para que a dinámica da xornada sexa participativa e práctica. Non se pretende ensinar, senón tomar conciencia das expectativas, motivacións, medos, destrezas, debilidades... que cada un individualmente ten, e poder afrontar con éxito a tarefa de facerse pais e fillos, e formar unha familia.
Tamén se trata de poñer as familias, no lugar dos nenos/as que están a espera dunha adopción, facéndose conscientes dos medos, feridas, mecanismos de defensa que se viron obrigados a desenvolver, carencias afectivas que arrastran.
A finalidade é ter unha visión máis obxectiva e desenvolver habilidades para favorecer a integración. Nunha palabra conseguir que o proceso de encaixe dun neno cunha familia, responda no posible as expectativas de ambos. Moitos nenos/as que temos á espera dunha adopción levan anos en centros de menores porque os seus procesos, familiares, xudiciais..., son lentos e, ás veces, complicados de resolver.
Dende este programa afirman que estes nenos/as merecen a oportunidade de pertencer a unha familia, e sentirse membros dela. De que estes cativos/as se sintan parte dun entorno que os acolla, protexa e aposte por eles de xeito incondicional. A experiencia dos 26 nenos que foron adoptados nos últimos anos confírmao.
Si desexas contactar co "programa de adopcións especiais" podes facelo a través do teléfono 902 404 224 ou do correo adoptareposible@faiben.org. A sede do programa atópase no Milladoiro, na rúa das Hedras, número 5, 3º C.
Ningún comentario:
Publicar un comentario