TEO - A ESTRADA - RETIRADA DE ANDAMIOS EN PONTEVEA


OS ALCALDES DA ESTRADA E TEO SOLICITAN Á XUNTA A RETIRADA DOS ANDAMIOS ABANDONADOS NO RÍO ULLA, XUNTO Á PONTE DE PONTEVEA


Dende o Concello de Teo xa se enviara un escrito o 2 de febreiro facendo esa petición á Dirección Xeral de Patrimonio

15 de marzo de 2011. Os alcaldes da Estrada e Teo, José Antonio Dono e Martiño Noriega, solicitarán á Dirección Xeral de Patrimonio Cultural que proceda á retirada dos andamios empregados nas obras de consolidación da ponte medieval de Pontevea,  que une ambos concellos atravesando o río Ulla, mediante unha carta asinada conjuntamente polo dous rexedores.

Esta actuación, que supuxo unha importante mellora no estado de conservación e no aspecto estético da ponte, foi adxudicada polo organismo da Xunta de Galicia e levada a cabo durante os meses de verán de 2010. Sen embargo, tras o remate das obras, a empresa responsable dos traballos non retirou os andamios.

De feito, no seu escrito os rexedores fan constar que parte da estrutura se atopa non só nas marxes do río Ulla, senón tamén no leito da súa canle, somerxida baixo a auga. Isto supón un aspecto visual moi negativo no contorno desta ponte, tan emblemática para ambos municipios, e nun lugar de gran beleza paisaxística. Ademais, as pezas do andamio están a ser arrastradas pola corrente do río, o cal pode supor un serio problema ante o inminente inicio da temporada de pesca.

Pese a non ser a administración responsable da obra, e ante o evidente prexuízo que comporta esta situación, o Goberno municipal de Teo xa informara mediante un escrito previo á propia Dirección Xeral, para que instase á empresa responsable a retirar os andamios, medida que aínda non se levou a cabo.

Ambos alcaldes acordaron reiterar esta solicitude ante a Xunta de xeito conxunto, para que tome as medidas oportunas. Os dous rexedores recoñecen que a Xunta non é a responsable directa do actuar da empresa, pero lembran o seu papel como administración que adxudicou os traballos e que, polo tanto, debe velar por que se cumpran as condicións do contrato. Así, agardan obter unha pronta resposta por parte do departamento autonómico.

Ningún comentario: