PSOE Ames - os socialistas acusan o alcalde de saltarse a lexislación e presentarán denuncia


O GRUPO SOCIALISTA DENUNCIA QUE SANTIAGO AMOR SE SALTA A LEXISLACIÓN VIXENTE PARA TRATAR DE AGOCHAR A DIVISIÓN INTERNA DO PARTIDO POPULAR 
O PSOE estudará presentar unha denuncia diante da presunta ilegalidade cometida polo alcalde de Ames, que pechou un punto da orde do día sen a correspondente votación, tal e como indica a Lei 


Miñones esíxelle a Santiago Amor que “xa que lle pide un esforzo á ciadadanía, sexa o primeiro en dar exemplo baixando nun 60% unha das dedicacións exclusivas, retire un persoal de confianza e elimine o cobro retroactivo do lixo”

Os socialistas consideran que os Orzamentos do PP “só inclúen importantes recortes en política social e servizos á cidadanía, e subidas de impostos e taxas”

O grupo socialista de Ames estudará denunciar nos xulgados a actuación do alcalde, Santiago Amor, durante a última sesión plenaria, na que deixou sobre a mesa un punto da orde do día sin a preceptiva votación do pleno municipal. “Entendemos que o señor Amor se saltou a lexislación vixente para tratar de agochar a división interna do Partido Popular, evidenciada na ausencia de tres concelleiros que o deixaban en minoría para sacar adiante os orzamentos de 2012”, explica o voceiro municipal socialista, José Miñones.

Unha actitude que os socialistas consideran “unha total falta de respecto ao pleno municipal e un ataque aos nosos dereitos como concelleiros da oposición por parte dun alcalde ao que lle gusta xogar coas cartas marcadas”. De feito, sinala que “a ausencia de tres concelleiros na sesión evidencian a división interna do Partido Popular, pero é que entre os presentes tamén había concelleiros que denunciaran en Comisión o seu descontento coas contas do seu partido e non confirmaran o seu voto favorable”.

Os socialistas lembran que as sesións plenarias réxense polo “Real Decreto 2568/1986, de 28 de noviembre, por el que se aprueba el Reglamento de organización, funcionamiento y régimen jurídico de las Entidades locales”, que no seu artigo 92.1 indica textualmente: “Cualquier concejal podrá pedir, durante el debate, la retirada de algún expediente incluido en el orden de día, a efecto de que se incorporen al mismo documentos o informes, y también que el expediente quede sobre la mesa, aplazándose su discusión para la siguiente sesión. En ambos casos, la petición será votada, tras terminar el debate y antes de proceder a la votación sobre el fondo del asunto. Si la mayoría simple votase a favor de la petición no habrá lugar a votar la propuesta de acuerdo”.

Neste sentido, Miñones lembra que o alcalde non ten potestade para deixar sobre a mesa, ou eliminar un punto da orde do día, unha vez que se ten iniciado o debate dese punto pois, como asegura a Lei, a decisión correspóndelle ao pleno municipal. “A proba evidente de que estabamos debatindo sobre os orzamentos é que presentamos dúas enmendas sobre os mesmos”, sinala o voceiro municipal socialista. Para Xosé Miñones, a actitude de Santiago Amor “é antidemocrática e a propia dalguén acurralado polas divisións internas do seu propio partido que, ante a posibilidade de perder unha votación, non dubida en saltarse as normas á súa conveniencia”.

Peticións do PSOE e Ames Novo

Miñones lembra que as enmendas presentadas por PSOE e Ames Novo, nas que Santiago Amor se escuda para tentar xustificar a súa actuación, incluían propostas asumibles e en beneficio da veciñanza amiense. “Xa que dende o Partido Popular non deixan de pedirlles un esforzo á cidadanía con recurtes e máis recurtes, pensamos que o Goberno de Ames ten que dar exemplo baixando nun 60% unha das dedicacións exclusivas que ten, quitando un posto de confianza e eliminando o cobro retroactivo da taxa do lixo”, explica Xosé Miñones.

Os socialistas lembran que na actualidade o grupo de Goberno de Ames creou tres postos de confianza, dous máis que o Goberno anterior. “Pedirlles que eliminen un non é tan grave, aínda así seguirán tendo o dobre que tiñamos os socialistas”, sinala o voceiro municipal do PSOE. Ademais, solicitan que se contabilicen os 490.000 euros de aforro correspondentes á supresión da paga extra de decembro. “Deste xeito, estamos falando de que o superávit do Concello de Ames se achegaría ao millón de euros”, sinala Xosé Miñones, quen denuncia que “ningún veciño de Ames podería entender que se lle recurten servizos e se lle suban taxas e impostos mentres o Concello ten un superávit dun millón de euros”.

Recurtar servizos, subir impostos

En canto aos orzamentos propiamente ditos, os socialistas consideran que “non aportan nada novo. Non hai ningún novo servizo, pois só inclúen importantes recurtes en política social e servizos á cidadanía acompañadas de importantes subas de impostos e taxas”, explica a voceira socialista Patricia Conde. Así, denuncia os fortes recortes en política social e servizos que se exemplifican  en:

-         un descenso de 228.000 euros na partida destinada a benestar social
-         un recurte de case 200.000 euros en servizos sociais
-         un importante ataque á formación e emprego dos amienses, partidas que contemplan unha reducción de 422.000 euros
-         un desplome de 700.000 euros en cultura
-         un recurte de 219.000 euros en deportes
-         e unha caída do 50% do orzamento en materia de medio ambiente.

Patricia Conde considera que os Orzamentos de 2012 “non recollen nin proxectos nin ideas novas, só reducir e reducir a costa dos veciños de Ames, mentres lles suben a presión fiscal”.

Falla de diálogo e incumprimento de prazos

Así mesmo, Patricia Conde lamentou a falta de diálogo amosada polo Concello de Ames na tramitación destes orzamentos. “Despois de tantas peticións para que se entregase a documentación con tempo aos grupos municipais, ao final só tivemos dúas tardes para preparar o debate máis importante do ano”, denuncia Patricia Conde, quen lembra tamén que “Santiago Amor rompeu coa tradición de convocar a Xunta de Portavoces o que, unido á súa actuación no pleno, demostra que non quere chegar a ningún tipo de acordo nin escoitar ningunha proposta por parte da oposición”. Pretender xustificar a retirada dos orzamentos da sesión plenaria na busca dun maior diálogo coa oposición, non deixa de ser un exercicio máis de demagoxia.

Ademais, os concelleiros socialistas recordan que os orzamentos de 2012 chegan con algo máis dun ano de retraso e sen que se teña presentada a liquidación da conta, dúas cuestións que o señor Amor criticaba con vehemencia cando estaba na oposición pero que agora é o primeiro en incumprir dende a Alcaldía.

Ningún comentario: