Ames - o concello apraza o debate dos orzmentos para buscar consenso


O Goberno de Ames apraza o debate dos orzamentos co obxectivo de que os técnicos estuden as emendas presentadas e para abrir unha vía de negociación e diálogo

O alcalde de Ames, Santiago Amor, decidiu onte, durante a sesión plenaria, aprazar o debate dos orzamentos municipais para 2012 co obxectivo de que os técnicos municipais poidan analizar e estudar con detalle as emendas presentadas polos grupos da oposición no mesmo momento do debate. O Goberno estudará as emendas e abrirá un proceso de diálogo e negociación coa oposición.
O rexedor considerou que as emendas, que inciden moi directamente en contidos importantes do orzamento, precisan ir acompañadas de informes técnicos, polo que optou por deixar sobre a mesa este punto para abordalo nunha próxima sesión plenaria. O obxectivo desta decisión é iniciar unha vía de negociación e diálogo sobre os orzamentos.
Acto seguido, o pleno continuou coa aprobación dunha operación de crédito de 70.212,16 euros, correspondente á segunda fase do sistema de pago a provedores e que foi formalizada hoxe coa entidade bancaria. O Instituto de Crédito Oficial (ICO) autorizou esta operación, que ten como obxectivo financiar o pago das facturas dos provedores que, incluídos na relación inicial, non comunicaron a súa vontade de participar no procedemento ata a segunda fase.
Ademais, autorizouse a prórroga dun ano do contrato de xestión da piscina cuberta municipal de A Telleira. A empresa concesionaria asumirá unha obra de reforma das distribucións dos espazos, realizando unha serie de obras de reforma que permiten a ampliación da sala de fitness ata unha superficie de 236 metros cadrados e na que se situarán os aparellos de orientación cardio-respiratoria e os de orientación muscular. 

Ningún comentario: