O PLENO DEBATE O REGULAMENTO DE ACCIÓN VOLUNTARIA DO CONCELLO, QUE PERMITIRÁ A POSTA EN FUNCIONAMENTO DUN PROGRAMA DE VOLUNTARIADO SOCIAL A PARTIR DE SETEMBRO
·
A corporación solicitará a desafección da escola unitaria de Bamonde, o que
facilitaría o seu uso para programar actividades
·
Na sesión debateranse dúas mocións do BNG sobre a supresión do copago
farmacéutico ás persoas pensionistas e outra contra a supresión de aulas e
concentración de alumnado
A corporación teense reúnese este xoves 26 de
xullo para celebrar a sesión ordinaria do pleno deste mes. O debate comezará ás
20:00 horas, no horario de tarde habitual, para facilitar a asistencia das
persoas interesadas. Celebrarase no salón de sesións da Casa Consistorial, na
Ramallosa, con dez puntos na orde do día.
Un dos puntos con máis impacto social será o debate sobre o Regulamento
interno de acción voluntaria. Trátase de aprobar a estrutura normativa para que
o Concello se dea de alta como entidade de acción voluntaria. Esto permitirá a
posta en marcha de diferentes programas de voluntariado en Teo en ámbitos que
poden ir dende o social ata o voluntariado medioambiental, cultural ou
deportivo. Ignacio Iglesias, concelleiro de Participación Cidadá destaca que de
aprobarse esta norma facilitará “que comecemos a traballar a partir de setembro
nun programa de voluntariado social que contempla accións que irán dende o
acompañamento de persoas, o apoio a actividades de educación familiar ou
atención no roupeiro municipal”. O edil destaca que o voluntariado non substituirá
actividades e traballos remunerados. Este documento non regula o voluntariado
de Protección Civil que atende a outra normativa e en Teo está regulado dende
hai tempo, xa que conta cunha Agrupación de Voluntarios de Protección Civil.
O grupo de goberno teense tamén leva a proposta para solicitar por parte da
Consellería de Educación a desafección da escola unitaria de Bamonde que non
funciona como tal dende hai dous cursos. Deste xeito este local podería usarse
como local social nunha parroquia de 225 habitantes que precisa de espazos
públicos. Esta iniciativa continúa coa política municipal de por en valor
locais que deixaron de usarse para o ensino como por exemplo a escola de
Francos converténdoos en espazos de uso público.
Outros puntos da orde do día recollen a petición que o Consello Escolar
Municipal lle fai á Consellería de Educación de melloras nos centros escolares
de Teo. Neste senso o alcalde de Teo, Martiño Noriega e a edil de Educación,
María Álvarez Garea, mantiñan un encontro a semana pasada co Xefe Territorial
de Educación, Indalecio Cabana, para tratar este tema. A xuntanza rematou co
compromiso por parte da Xunta de realizar investimentos nos centros priorizando
aqueles aspectos establecidos como máis importantes para a comunidade escolar e
o Concello.
O pleno tamén debe acordar a concesión da bonificación da cota tributaria
do ICIO para a obra de “Ampliación do CEIP da Igrexa en Calo” que acometerá o
departamento de Educación Autonómico. Trátase da obra dun aulario de infantil
cun investimento de preto dun millón de euros que solucionará os problemas de
espazo no centro escolar.
O grupo municipal do BNG presentou dúas mocións nas que solicita a
supresión do copago farmacéutico para as persoas pensionistas e outra contra a
supresión de aulas e concentración de alumnado de infantil e primaria.
Orde do día do pleno:
- Aprobación da
acta da sesión do 28.06.12.
- Dar conta das
resolucións da alcaldía (da 402/12 á 499/12).
- Ditame da
proposta da alcaldía para instar á Consellería de Educación, a petición do
Consello Escolar Municipal, para que acometa as necesarias obras de
reforma e mellora dos centros escolares do Concello.
- Ditame da moción
do grupo municipal do BNG contra a supresión de aulas e concentración de
alumnado de infantil e primaria.
- Ditame da
proposta da alcaldía para solicitar á Consellería de Cultura, Educación e
Ordenación Universitaria da Xunta de Galicia a desafectación da escola
unitaria de Bamonde.
- Ditame da
proposta da alcaldía de aprobación inicial do regulamento interno de
acción voluntaria do Concello de Teo.
- Ditame da moción
do grupo municipal do BNG para a supresión do copago farmacéutico ás
persoas pensionistas.
- Ditame da
proposta da alcaldía de concesión de bonificación de cota tributaria do
ICIO pola obra de “Ampliación do CEIP A Igrexa en Calo”.
- Mocións.
- Rogos e
preguntas.
Ningún comentario:
Publicar un comentario