O CONCELLO DE OROSO TRIPLICA OS CURSOS GRATUITOS PARA PREPARAR AS PROBAS DE GRADUADO EN SECUNDARIA ANTE A GRAN DEMANDA VECIÑAL
Participarán un total de 53 alumnos, que tratarán de repetir o éxito do ano anterior no que se rexistrou un 90% de aprobados
19 de outubro de 2011.- O Concello de Oroso vai triplicar o número de cursos gratuitos de preparación para as probas de obtención do Graduado en Educación Secundaria Obrigatoria (ESO) debido ao gran número de participantes rexistrado. O concelleiro de Ensino, Antonio Leira, explica que “inicialmente tiñamos previsto organizar un único curso pero, diante do gran número de veciños que se interesaron decidimos facer un esforzo e organizar outros dous cursos máis para evitar que quedaran fóra unha vintena de veciños”.
Deste xeito, os 53 veciños e veciñas que se anotaron neste curso gratuito (34 máis que no curso pasado) poderán asistir a clases a partir do vindeiro luns 24 de outubro. Unhas sesións que se impartirán na aula de informática do Concello de Oroso, situada na rúa do Deporte número 9 (Sigüeiro). Miguel Anxo Gómez, profesor-administrador da Aula de Formación Educaoroso, apunta que “durante a semana que vén faremos unha avaliación inicial para ver o nivel dos alumnos e poder facer os grupos de traballo o máis homoxéneos posibles”.
Novidades nos cursos
Miguel Anxo Gómez sinala que “este ano imos incluír tamén un servizo de titoría, de xeito que durante unha hora e media á semana haberá un profesor a disposición dos alumnos para resolver todas as dúbidas que poidan xurdir na aula”. A maiores, o Concello de Oroso vai colgar na web da Aula de Formación Educaoroso (www.concellooroso.com) a práctica totalidade dos materiais educativos que se entreguen na aula, “de xeito que os alumnos que non poidan acudir a unha sesión poidan ter acceso a esa documentación”, puntualiza Miguel Anxo Gómez.
Durante a edición de 2010, presentáronse ás probas libres para a obtención do Graduado en ESO un total de 19 veciños e veciñas de Oroso, dos que máis do 90% conseguíu o título e os restantes quedaron pendentes de tan só unha asignatura.
Rapaces novos
Entre os participantes destaca a presenza dun importante número de rapaces novos “que se atopan con que en case todos os postos de traballo lles esixen o graduado en secundaria, polo que para eles estes cursos son moi importantes para que poidan acceder ao mercado laboral”, sinala Antonio Leira. De feito, o concelleiro de Ensino explica que “dende o Concello de Oroso decidimos facer un esforzo económico e triplicar o número de cursos de formación en ESO porque somos conscientes dos problemas de emprego que está a xerar esta crise económica e que a formación continua é a nosa mellor ferramenta para mellorar a empregabilidade dos nosos veciños e veciñas”.
Ademais, canda ese importante grupo de rapaces novos tamén é significativo o aumento do número de adultos que apostan por este tipo de cursos para adquirir, actualizar, completar ou ampliar os seus coñecementos e aptitudes para o seu desenvolvemento persoal e profesional a través da Aula de Formación de Adultos “Educaoroso”.
Ningún comentario:
Publicar un comentario