Brión – explicacións sobre a denuncia do PP

XOSÉ LUÍS GARCÍA ASEGURA QUE O PP DE BRIÓN “TRATA DE INVENTARSE UN CASO DE TRATO DE FAVOR CON FALSEDADES, MEDIAS VERDADES E INCLUSO POÑENDO NA MIÑA BOCA PALABRAS QUE NON DIXEN”

O alcalde reitera que “en ningún momento houbo demora nin mala fe” neste caso e que o Concello actuou cumprindo os prazos marcados pola lei

Xosé Luís García lembra que a demolición da caseta farase tras a denuncia dos veciños, non do PP, diante do Concello e unha vez que Patrimonio autorice o derrubo

18 de outubro de 2011.- O alcalde de Brión, Xosé Luís García, amosa a súa indignación coa actuación do PP de Brión no caso dunhas obras realizadas por un particular nunha vivenda ubicada na parroquia de A Torre. García asegura que os populares brioneses “tratan de inventarse un caso de trato de favor con falsedades, medias verdades e incluso poñendo na miña boca palabras que non dixen”.

Neste sentido, o rexedor brionés aclara que en ningún momento asegurou que as devanditas obras se realizaran cumprindo estrictamente a lei, como afirma o voceiro do PP de Brión. “O que dixen e manteño é que o Concello de Brión actuou en todo momento conforme á lei, que non é o mesmo, e que en ningún momento houbo demora nin mala fe por parte do Concello”, puntualiza Xosé Luís García, quen lembra que “non é a primeira vez que o señor Tomé pon palabras que nunca dixen na miña boca para así tentar dar verosimilitude ás súas acusacións”.

O Concello actuou con dilixencia

Por iso, Xosé Luís García reitérase nas súas afirmacións do pasado mes de setembro, nas que afirmara que os técnicos e profesionais do Concello de Brión actuaron en todo momento conforme ao indicado na Lei e con total dilixencia. “Pódese estar de acordo ou non co resultado dos expedientes, pero o Concello de Brión sí que actuou con dilixencia e sen ningún trato de favor. Proba diso é que se realizaron dous expedientes de legalización e vaise derrubar esa caseta”, sinala Xosé Luís García.

Unhas actuacións que se realizarán logo das denuncias realizadas polos veciños diante do Concello de Brión, que actuou con dilixencia e sen demora, e non polas denuncias nos medios de comunicación por parte do Partido Popular. Neste sentido, basta con comprobar as datas das denuncias veciñais cos expedientes abertos por parte do Concello e as denuncias feitas polos populares.

Cronoloxía do caso

Neste sentido, compre lembrar que a Lei 9/2002, de 30 de decembro, de Ordenación Urbanística e Protección do Medio Rural de Galicia establece no seu artigo 209 a figura administrativa da reposición da legalidade urbanística e especifica no seu cuarto punto que este “deberá resolverse en el plazo de un año a contar desde la fecha del acuerdo de iniciación”. Neste sentido, o alcalde brionés asegura que “cumpríuse escrupulosamente pois houbo resolución antes de que se cumprira o ano”.

Unha vez recibida no verán de 2010 a primeira denuncia veciñal sobre as obras de restauración nun alpendre e nun muro, o Concello de Brión abríu un expediente de reposición da legalidade urbanística de acordo co marcado pola Lei.

- No caso do muro, o propietario presentou un informe técnico no que acreditaba a antigüidade da construcción, polo que a obra foi legalizada. O seu estatus legal actual é que o muro se atopa fóra de ordenación, polo que só se poden realizar nel tarefas de conservación e mantemento.

- No que atinxe á restauración do alpendre, ao tratarse dunha obra nas inmediacións dunha zona protexida por Patrimonio, o Concello trasladou a denuncia á Xunta. Así, o 30 de decembro de 2010, o Servizo de Patrimonio Cultural da Consellería de Cultura autorizou esas obras cunha única condición: que as portas e as fiestras fosen de madeira. Feitos eses cambios, a construción quedou legalizada.

Novidades no derrubo da caseta

Por último, xa no ano 2011, os veciños tamén denunciaron a construción dunha caseta no interior da propiedade deste veciño. Os servizos técnicos municipais puxéronse en contacto con este veciño para poder entrar na súa propiedade e analizar a legalidade das devanditas obras. Acto seguido, abriron o correspondente expediente. Unha vez presentadas as alegacións por parte do propietario, o 30 de agosto de 2011 emitiuse un Decreto da Alcaldía que ordena o derrubo da caseta, cun prazo de 30 días para solicitar o permiso de derrubo diante de Patrimonio e un prazo de 3 meses para executalo.

Na actualidade, o particular xa solicitou no Concello de Brión o permiso para proceder ao derrubo da caseta. Un permiso que a semana pasada lle foi remitido a Patrimonio para que autorice o derrubo e éste poida levarse a cabo.

O alcalde brionés asegura que os dous expedientes de reposición urbanística e a próxima demolición da caseta demostran que non houbo ningún tipo de trato de favor e que o Concello de Brión actuou en todo momento conforme ao marcado pola Lei.

Ningún comentario: