Teo - o mercado de alimentos labrego de Os Tilos únese o entroido este sábado

O MERCADO DE ALIMENTO LABREGO ÚNESE Á CELEBRACIÓN DO ENTROIDO ESTE SÁBADO 
Durante a mañá poderanse degustar petiscos propios destas datas a moi bo prezo
Tamén actuará un grupo de música tradicional e haberá postos de artesanía

O Mercado do alimento labrego que funciona nos Tilos todos os sábados pola mañá continúa traballando para ampliar a súa oferta. E este sábado 9 únese á celebración do entroido. A partir das 11:00 horas poderanse probar petiscos típicos destas datas a moi bo prezo, elaboradas polos propios vendedores e vendedoras. Terán orellas, filloas, chocolates, cremas quentes...

Ademais coma todos os días de mercado haberá postos diversos nos que realizar a compra dos mellores produtos naturais para facer as comidas do entroido. No mercado pódense atopar produtores vendendo verduras, froitas, doces, ovos, queixos, mel, conservas caseiras...

Esta fin de semana para continuar coa celebración do entroido actuará o grupo de música tradicional a requinta Follas Novas. E como novidade tamén haberá postos de artesanía. 

Respecto do número de postos, dende a Área de Desenvolvemento Local do Concello de Teo destácase que xa se tramitaron 31 solicitudes para a venda no mercado. Cando comezou a funcionar, en xuño do ano pasado, había só 14 postos. Aínda que non é habitual que coincidan todos no mesmo día o número de persoas que poden vender nos Tilos incrementouse notablemente. 

Ningún comentario: