O PSOE DE ORDES INSTA AO CONCELLO DE ORDES A HABILITAR UNHA PARTIDA ECONÓMICA PARA DISPOÑER DUNHA BRIGADA MÍNIMA DE GRUMIR
Xesús Pedreira propón reducir as partidas dos orzamentos dedicados “a festas e eventos que poden sobrevivir igualmente atenuando o seu custo”
A Agrupación Socialista de Ordes vén de instar ao Concello de Ordes a manter o servizo do grumir no municipio, diante da súa supresión confirmada no novo mapa de emerxencias consensuado entre a Xunta e a Fegamp. O secretario xeral do PSOE de Ordes, Xesús Pedreira xa lle pediu ao alcalde Manuel Regos que habilite unha partida económica “para poder ter unha brigada mínima de Grumir a cambio de reducir partidas nos orzamentos dedicados a festas e eventos que vén poden sobrevivir igualmente atenuando o seu custo”.
Xesús Pedreira lembra que o Grumir “a través de persoal competente e eficaz, presta uns labores moi específicos e necesarios para os veciños e veciñas de Ordes, que en ningún caso asumen os bombeiros”. Trátase de servizos tan necesarios como a retirada de árbores caídas nas estradas municipais, colaboración na seguridade de eventos organizados polo Concello, intervencións en situacións motivadas por temporais, derrubamentos, etc
Neste sentido, Pedreira recórdalle tamén ao alcalde ordense que na pasada lexislatura se comprometera publicamente a poñer en marcha un servizo de emerxencias que atendese as necesidades dos veciños no caso de que desaparecese o grumir, cousa que vén de suceder. Un compromiso que foi ratificado no pleno municipal de 31 de xaneiro de 2008 a través dunha moción presentada polo daquela grupo de Goberno, que estaba presidido polo propio Manuel Regos e do que formaba parte o partido socialista. Por iso, os socialistas instan ao alcalde de Ordes a cumprir a súa palabra.
Ningún comentario:
Publicar un comentario