O CONCELLO DE BRIÓN DENUNCIA O CAMBIO DE SINALIZACIÓN NA AC-541 QUE IMPIDE O XIRO DE ACCESO A IGREXA E CEMITERIO PARROQUIAL DE BRION E AS PARROQUIAS DA ZONA ALTA DO CONCELLO
Xosé
Luís García advirte sobre a progresiva incomunicación á que a Xunta está
condenando ao Concello, coa falta de apertura do tramo rematado da variante AC-300
“Desde a Xunta parecen empeñados en castigar ao
Concello de Brión”. Así se manifestaba o seu rexedor, Xosé Luis García, que
denuncia o repitando que se fixo da AC-541 e que impide o xiro que se podía
executar ata o de agora para acceder ás Torres de Altamira, Igrexa e Ceminterio
e parroquias da zona alta do Concello. A esta modificación do trazado únese o
malestar pola falla de contestación por parte da Xunta á solicitude de apertura
do tramo rematado da variante AC-300 entre a estrada de Noia (AC-543) e a
rotonda de entrada/saída da autovía AG-65 en Brión. Xosé Luís García afirmou
que “seica cometemos o grande delicto de non ser da corda adecuada para que
atendan as necesidades dos veciños de Brión, impedíndolles ter unhas adecuadas
comunicacións”.
E é que no Concello recibíronse nos últimos días un gran número de queixas
por parte dos veciños que ven como agora teñen que percorrer un traxecto de 2,4
quilómetros a maiores e atravesar os catro carriles da AC 544 para voltar sobre
os seus pasos, se queren poder tomar o vial que comunica a AC-541 coa igrexa e ceminterio, coas parroquias da zona alta do
concello (Viceso, Luaña e Ons) e coas Torres de Altamira. Esta situación xerou
amplo descontento entre os veciños, e moitos deles seguen xirando no lugar sen
advertir o cambio de sinalización, coa conseguinte infracción de tráfico.
Apertura do tramo rematado
A esta situación únese tamén a falta de resposta por parte da Consellería
de Medio Ambiente, Infraestruturas e Territorio, á que se lle remitiu a comezos
do mes de pasado un escrito solicitando, cando menos, a apertura do tramo
rematado do vial AC-300. Na actualidade, os vehículos que queren acceder á
autovía dende a estrada de Noia teñen dúas opcións: empregar unha estreita
pista municipal paralela ao tramo construído da variante da AC-300, que provoca
numerosos problemas de circulación cando se trata de vehículos voluminosos, ou
dar un rodeo de 1,2 quilómetros polo Alqueidón, onde se xuntan co tráfico
procedente de Bastavales e Os Ánxeles.
Desde o Concello lémbrase que o compromiso por parte da Consellería era ter
rematado este vial a finais de ano pero o que non se entende é que non se poida
abrir o tramo que xa está rematado, debidamente asfaltado e que melloraría
considerablemente o servizo que se lles ofrece actualmente aos veciños. “O
Concello de Brión non ten que pagar os platos rotos doutras administracións que
non se poñen de acordo para rematar unha obra á que apenas sí lle queda un
pequeno tramo”, lamentou o rexidor, que lembrou que este traxecto inclúe unha
ponte sobre o rego do Pego, execución dunha glorieta na AC-543 e a colocación
da sinalización vertical e horizontal definitivas. Uns traballos cuxos costes
se estiman en 750.000 euros de execución material (1.027.00 euros de execución
por contrata) e que en nada inflúen no tramo que agora permanece pechado á
circulación.
Cabe lembrar, por último, que o Concello de Brión cedeu os terreos
necesarios para a excución da AG-65 co compromiso de executarse tanto este vial
como o da AC-541, coñecido como o vial oeste da autovía e polo que o Concello
de Brión ten presentado un recurso contencioso administrativo contra a
resolución da Axencia Galega de Infraestruturas pola que se desistía do
convenio de colaboración asinado entre o Concello de Brión e a Xunta para a
execución da variante da AC-451. De acordo con este convenio, o Concello de
Brión cedeu os terreos municipais por onde pasa a autovía e transferíu á Xunta
unha cantidade de 250.000 euros, uns cartos que xa foron pagados polo Concello
brionés hai varios anos. Despois de asinar unha adenda a este convenio en 2009,
o conselleiro de Medio Ambiente, Territorio e Infraestruturas, Agustín
Hernández, comprometeuse a facer a AC-451 nunha reunión mantida con Xosé Luís
García o pasado 22 de decembro de 2010 e incluíu unha partida de 1,6 millóns
para estas dúas variantes nos Orzamentos da Xunta para 2012.



Ningún comentario:
Publicar un comentario