O CONCELLO DE OROSO ORGANIZA UNHA RECOLLIDA DE XOGUETES PARA FAMILIAS DESFAVORECIDAS
Os xoguetes, novos e sen estrear, entregaranse nas garderías “A Ulloa” e “Trastes” ou nos Servizos Sociais antes do 21 de decembro
07 de decembro de 2011.- O Concello de Oroso abre o prazo para a tradicional recollida de xoguetes para a campaña de Nadal, que estará aberta ata o vindeiro mércores 21 de decembro. Unha iniciativa que beneficiará directamente a aquelas familias domiciliadas en Oroso que teñan ingresos baixos ou problemas sociais e que, ademais, teñan ao seu cargo fillos ou fillas menores de idade.
Todos os veciños e veciñas de Oroso que desexen colaborar poderán entregar os xoguetes e os libros, novos e sen estrear, na gardería municipal “A Ulloa” (A Ulloa s/n. Sigüeiro), na gardería “Trastes” (rúa do Deporte. Sigüeiro) ou no Departamento de Servizos Sociais (tamén na rúa do Deporte).
Baixo o lema “Ningún neno/a sen xoguetes”, dende o Concello de Oroso animan aos veciños e veciñas do municipio a seguir mantendo o alto nivel de solidariedade amosado nos últimos anos. O reparto dos xoguetes entre as familias beneficiarias farase con tempo e con total confidencialidade.
Ningún comentario:
Publicar un comentario