A unanimidade foi a protagonista do pleno ordinario de onte en Brión, xa que todos os acordos foron adoptados co apoio dos tres grupos municipais. Unha sesión na que se ratificou a adhesión do Concello de Brión á Addenda do Convenio para a Creación e Implantación dos Grupos de Emerxencia Supramunicipais (GES), polo que se prolonga a prestación deste servizo ata o 31 de decembro de 2018, así como os contratos do persoal.
O Concello de Brión achegará 52.000 euros anuais para o mantemento deste servizo, que se suman ás achegas da Xunta de Galicia e da Deputación Provincial da Coruña. O alcalde de Brión, José Luís García, explicou que o mantemento do GES “suporá un incremento do gasto municipal pero consideramos que é un servizo de interese para a nosa veciñanza”.
O GES de Brión atende as emerxencias municipais dos concellos de Brión, Ames, Negreira, Lousame e Noia, tales como lumes forestais ou urbanos, asistencia en accidentes de tráfico... A maiores, en Brión tamén realiza outros servizos como actuacións preventivas de lumes forestais, actuacións en situacións de risco (temporais, nevaradas...), limpeza e retirada de obxectos nas estradas, actuacións de prevencións de pragas (entre elas a retirada de niños da vespa velutina), colaboración con Protección Civil en casos de aglomeración de persoas...
Pago a provedores: -7,53 días
O pleno tamén aprobou o novo regulamento e a nova ordenanza fiscal da escola infantil municipal de Brión, que abrirá de luns a venres en horario continuo de 7:30 a 19:00 horas. José Luís García explicou que o cambio na ordenanza fiscal vén motivado polo feito de que “a pesar da baixada das achegas da Xunta, pensamos que os tramos que se establecían para as familias non eran xustos porque, por exemplo, pagaban o mesmo unha familia cun IPREM mensual de 500 ca outra familia con 800. Agora, as familias con menos ingresos pagarán menos”. García indicou que “a que menos pagará serán 5 euros e as familias con hipoteca ou aluguer poderán descontalo do IPREM” (Indicador Público de Renda de Efectos Múltiples).
O pleno tamén aprobou a proposta da Alcaldía sobre o Plan de Aforro e Investimento (PAI) 2016, que se destinará a amortizar os préstamos do Concello; e a corrección dun erro na suma de dous conceptos nun dos proxectos incluídos no Plan de Accións Social 2015, aprobado en decembro (cunha diferencia de 98 euros motivada por un erro na suma dos gastos xerais e do beneficio industrial). Ademais, derogouse a ordenanza reguladora da taxa pola prestación do servizo de apoio psicoterapéutico e estimulación/reeducación da linguaxe, que non ten demanda dende hai anos; e deuse conta da situación de cumprimento de obrigas de comunicación trimestral da execución do orzamento, do informe de morosidade e do período medio de pago. O Concello de Brión non ten ningunha factura recoñecida pendente de pago e o período medio de pago é de -7,35 días.
Centro de Saúde
Ao non terse presentado mocións por parte de ningún grupo municipal, o alcalde respondeu a unhas preguntas do BNG sobre a situación do centro de saúde de Brión. José Luís García explicou que o Concello é consciente da situación, polo que en outubro de 2015 se realizou unha reunión coa dirección do centro de saúde así como unha visita dos técnicos municipais que deu pé a un informe do arquitecto municipal sobre a situación do inmoble. De acordo co devandito informe, o inmoble presenta graves problemas de humidades, sobre todo na zona norte (a área de pediatría), e que non son un feito aillado, senón que se reproducen cada vez que chove.
O alcalde brionés explicou que “o Concello fai actuacións de mantemento de xeito períodico pero o problema é da cuberta, derivado dunha mala execución”. Ese mesmo mes de outubro, o Concello informou da situación á Consellería de Sanidade, que en decembro enviou a unha técnica a visitar o centro de saúde de Brión. Tras a inspección, a técnica recoñeceu que o problema vén derivado dunha incorrecta execución da cuberta do edificio, polo que lle corresponde á Xunta de Galicia acometer o arranxo.
“Temos o compromiso da Consellería de Sanidade de que vai arranxar a cubgerta do centro de saúde de Brión nos meses de verán e nós o vemos razonable”, indicou José Luís García, quen engadíu que “nós seguiremos con actuacións de mantemento e pintado ata entón. O próximo farémolo a semana que vén”.
De acordo co informe do arquitecto municipal, o cano interior para o desaugue das pluviais non ten a pendente necesaria para evacuar a auga, polo que queda retida na cuberta do edición. Ademais, tamén se especifica que non ten a altura precisa para resultar efectivo.
Finalmente, o alcalde anunciou que a Dirección Xeral de Patrimonio vén de autorizar a colocación dunha varanda de seguridade na contorna da Casa da Cultura, que o Concello de Brión leva reclamando dende hai dous anos. Neste sentido, García agradeceu a colaboración desinteresada do arquitecto César Portela, pois Patrimonio esixía que a solución fose elaborada por Portela, que foi quen deseñou a restauración dos inmobles que rodean a carballeira de Santa Minia.
»Agora sinto que debo devolverlle en público a Galicia os valores que me concedeu, os que levo
