Ames, 22/06/2016 - Onte un grupo de alumnos de cuarto de
primaria do CEIP A Maía participou xunto co concelleiro de Educación e Cultura,
David Santomil, nunha actividade do programa “Pés na rúa”, que se enmarca
dentro do Plan Proxecta, no que colaboran o Concello de Ames, o CEIP A Maía e
maila Xunta de Galicia.
O goberno municipal ten o
obxectivo de ampliar a beirarrúa que discorre entre o pavillón polideportivo de
Bertamiráns e maila entrada do IES
Plurilingüe de Ames. Segundo indica o concelleiro de Educación e Cultura, David
Santomil, “o noso obxectivo é primar a seguridade do alumnado e despois
reorganizar a dársena de autobuses do transporte escolar. Con esta finalidade
preténdese ampliar a beirarrúa da devandita dársena de autobuses”.
Para ampliar a beirarrúa
preténdese reducir a mediana que está pintada no medio da AC-544, e deste
xeito, gañar espazo para poder darlle maior amplitude a devandita beirarrúa.
Para iso hai que facer un repintado de toda a dársena e da AC-544. Isto xa
estará incluído dentro do plan que presentou no mes de febreiro en Bertamiráns
a conselleira de Infraestruturas, Ethel Vázquez, para mellorar o firme dun
tramo de 1.100 metros da estrada AC-544 que une Bertamiráns e Negreira.
Os traballos de ampliación da
devandita beirarrúa serán sufragado con fondos propios do Concello. Para iso
habilitouse unha partida de 50.000 euros dentro do orzamento de 2016, polo que
será preciso ter aprobado este presuposto para poder executar estas obras.
Cómpre lembrar que estes traballos de ampliación da beirarrúa contan con visto
bo dos técnicos da Consellería de Infraestruturas, que asistiron no mes de
febreiro a segunda proba para reorganizar o tráfico viario e mellorar a
seguridade peonil no CEIP da Maía e no IES de Ames.
Programa Pés
na rúa
O alumnado do CEIP A Maía
está participando no programa Pés na rúa, que se enmarca dentro do Plan
Proxecta (proxecto de educación en materia de seguridade viaria e mobilidade
sostible), no que colaboran o Concello de Ames, o CEIP A Maía e maila Xunta de
Galicia. Dentro desta iniciativa, esta mañá, os rapaces e rapazas marcaron de
xeito simbólico unha liña na estrada AC-544, para ampliar a beirarrúa que
discorre dende o pavillón polideportivo de Bertamiráns e o IES Plurilingüe de
Ames. Foi un acto simbólico para que os nenos e nenas saiban que se vai a tomar
esta medida co fin de mellorar a seguridade viaria nesta zona escolar.
Ademais, os rapaces e rapazas
deste colexio elaboraron unha maqueta da zona escolar do CEIP da Maía e do IES
de Ames, onde se poden apreciar as novas beirarrúas. Toda a información e
traballos realizados polo alumnado de cuarto de primaria deste centro de ensino
están recollido no sitio web: https://pesnarua.wordpress.com/
Outras medidas a adoptar
Ademais, da ampliación da
devandita beirarrúa o goberno municipal vai adoptar outras medidas para a
mellora da seguridade viaria nesta zona. Deste xeito, vaise a impedir o
aparcamento permanente nunha das beiras da AC-544. O lugar de estacionamento
permanente trasladarase á explanada do pavillón polideportivo de Bertamiráns,
que está situado a 200 metros destes centros escolares e conectada a través
dunha beirarrúa, para que todas as familias poidan aparcar o seus vehículos
neste lugar.
Outras medidas que está estudando realizar o goberno municipal é habilitar varias prazas de estacionamento, para persoas con mobilidade reducida, preto do paso de peóns situado diante da entrada do CEIP A Maía. Habilitaranse tamén zonas de parada rápida para os vehículos que só realicen paradas dun máximo de 10 minutos. Ademais, reorganizarase o horario do vehículo de transporte de comida da Rede Municipal de Comedores Escolares, para que non coincida co horario de entrada e saída dos autobuses de transporte escolar.
Ningún comentario:
Publicar un comentario