A Escola de Música de Ames abre o prazo de inscrición nas novas prazas para a materia de música e movemento
A inscrición rematará o 26 de setembro, poderá realizarse no Pazo da Peregrina de Bertamiráns e na Casa da Cultura do Milladoiro.
En total, a EMMA oferta 9 novas prazas. Delas, un total de seis están destinadas a rapaces e rapazas nados no ano 2008. As outras tres prazas serán para os nenos e nenas nados no 2006
A Escola Municipal de Música de Ames (EMMA) inicia mañá o prazo de inscrición para as novas prazas na materia de música e movemento, destinadas a alumnos e alumnas nados nos anos 2006 e 2008. A inscrición, que rematará o 26 de setembro, pode realizarse no Pazo da Peregrina de Bertamiráns, en horario de 9:00 a 14:00 horas, ou na Casa da Cultura do Milladoiro, entre as 9:30 e as 13:00 horas. Os interesados e interesadas poden solicitar máis información na dirección escolademusica@concellodeames.org e no teléfono 981535940.
En total, a EMMA oferta 9 novas prazas para a materia de música e movemento. Delas, un total de seis están destinadas a rapaces e rapazas nados no ano 2008. As clases, que se impartirán ao igual que o resto das materias no multiusos de Aldea Nova, para os alumnos e alumnas desta idade serán os luns e os mércores entre as 17:30 e 18:30 horas. As outras tres prazas serán para os nenos e nenas nados no 2006. Neste caso, as clases impartiranse os luns e os mércores de 18:30 a 19:30 horas.
Para realizar a inscrición, os interesados e interesadas deben presentar cuberta a folla de matrícula, na que se inclúen os datos do alumno ou alumna e a autorización dos pais ou titores. En caso de haber máis solicitudes que número de prazas, realizarase un sorteo o vindeiro mércores, 26 de setembro, na Casa da Cultura do Milladoiro ás 20:00 horas. Despois do sorteo, darase de prazo ata o 28 de setembro para que os que teñan praza a confirmen, mediante a entrega de dúas fotos, do recibo do pagamento da cota de matrícula e da domiciliación bancaria. Coas persoas que non obteñan praza elaborarase unha lista de agarda para cubrir baixas no curso 2012-2013.
Ningún comentario:
Publicar un comentario