O PROGRAMA DE EDUCACIÓN EN VALORES “CINENSINO” DA MANCOMUNIDADE DE ORDES MULTIPLICA POR CATRO O SEU NÚMERO DE USUARIOS
O programa chegará este curso a un total de 793 rapaces e rapazas de Cerceda, Frades, Mesía, Ordes e Oroso
30 de novembro de 2011.- O programa de educación en valores “Cinensino”, que organiza a Mancomunidade de Municipios de Ordes, chegará este ano a un total de 793 rapaces e rapazas de oito colexios de Cerceda, Frades, Mesía, Ordes e Oroso. Unha cifra que supón cuadruplicar o número de participantes na edición de 2010-2011, xa que este ano o programa chegará a máis centros escolares da comarca e incluirá tamén aos nenos e nenas de 4º, 5º e 6º de primaria.
Os centros educativos de Ordes (315) e Oroso (244) concentran o maior número de usuarios de “Cinensino”, algo máis do 70% dos participantes. Así, “Cinensino” chegará este curso a 135 alumnos do IES Maruxa Mallo (Ordes), a 55 rapaces do IES Nº 1 (Ordes) e a 125 nenos do CEIP Castelao (Ordes). No municipio orosán participarán 123 rapaces do IES Oroso e 121 nenos do CEIP Sigüeiro. Completan os 793 alumnos de “Cinensino” os 113 alumnos do CPI O Cruce (Cerceda), os 69 alumnos do CPI Xanceda (Mesía) e os 52 alumnos do CPI Pontecarreira (Frades).
A técnica de Prevención de Drogodependencias da Mancomunidade, Mónica González López, explica que Cinensino “proporcionará a estes cativos principios, orientacións e ferramentas para o seu desenvolvemento integral como persoas, implementando actividades que permitan o desenvolvemento de habilidades sociais que permitan un cambio progresivo nos valores, actitudes e comportamentos do alumno. Uns cambios que actuarán como factores de protección fronte a futuros procesos aditivos como o alcol ou as drogas”.
Ademais, Mónica González apunta que a decisión de incluir tamén no programa a nenos de 8 e 11 anos (e non só aos de 12 a 14 anos) explícase no feito de que “esas idades son un periodo crítico na formación de crenzas e actitudes no rapaz, unha etapa na que aumenta a curiosidade e o risco para o inicio de condutas esporádicas de abuso que poden establecer pautas de comportamento que xeren trastornos aditivos no futuro”.
Colaboración esencial dos profesores
Para conseguir estes obxectivos, o Servizo de Prevención de Drogodependencias da Mancomunidade de Ordes empregará tres unidades didácticas, unha por cada trimestre escolar. “Cada unidade didáctica baséase e articúlase en función dunha película”, explica Mónica González, “pois partimos das experiencias narradas no filme, de xeito que o cinema convértese nunha ferramenta pedagóxica e no eixo dinamizador dos contidos do programa”.
Outro cambio do programa é que os filmes proxectaranse nas propias aulas dos centros educativos, en vez de facelo no auditorio da casa da cultura ordense. Deste xeito, a interacción entre os alumnos e os profesores será moito maior. De feito, a Mancomunidade de Ordes agradece especialmente a colaboración dos 44 mestres e mestras que participarán no programa e sen cuxa colaboración non podería levarse a cabo.
Para os 336 nenos e nenas de Primaria, “Cinensino” ten preparados tres filmes. O primeiro é unha película de animación, “Enredados”, que actualiza o conto de Rapunzel e é escollido como exemplo de cómo acadar as metas co propio esforzo. A película xuvenil “Grupo tigre” foi escollida como exemplo do traballo en grupo fronta a calquera adversidade; mentres que a comedia “Los pingüinos del Sr. Poper” levará o debate en torno ao valor da amizada e da familia.
A metodoloxía das clases é a seguinte. Os rapaces dispoñen duns cadernos de traballo con cuestionarios para encher e puntos para ser debatidos na clase. Uns cuestionarios relacionados co filme que se proxecta. Deste modo, e grazas á guía dos seus profesores, os rapaces non só debaten sobre as películas que ven na clase, senón sobre os valores que se agochan neles.
Alumnos de ESO
No caso dos 447 alumnos e alumnas do primeiro ciclo da ESO (é dicir, entre 12 e 14 anos) o programa “Cinensino” centrarase máis na prevención do consumo de alcohol e outros trastornos aditivos. “Pensamos que a nosa estratexia de prevención será máis efectiva se incidimos no problema antes de que se produza, axudando aos alumnos a consolidar actitudes incompatibles con condutas aditivas como o alcohol, as drogas e outro tipo de condutas”, sinala Mónica González.
Para conseguilo, o programa empregará tres películas diferentes. A primeira será “En un mundo mejor”, un filme danés que servirá como base para debatir sobre a racionalización do uso das tecnoloxías da información e da comunicación, previndo as adiccións a redes sociais e condutas relacionadas. No caso de “Diario de Greg 2: la ley de Rodrick”, o obxectivo será reducir a intensidade no consumo de alcohol en menores, fomentando unha actitude crítica fronte á publicidade. Finalmente, a exitosa “Super 8” servirá como reforzo para retrasar o inicio de conductas aditivas no colexio. Ademais, permitirá analizar o risco da busca de novas sensacións a través dunha actitude que minimiza a percepción dos riscos reais.
O programa “Cinensino 2011-2012” está incluído no Plan Nacional contra a Drogadicción. Organizado polo Servizo de Prevención de Drogodependencias da Mancomunidade de Municipios da Comarca de Ordes, conta coa financiación da Consellería de Sanidade.
