Brión - José Luis García representará a FEGAMP na Comisión de Urbanismo de Galicia
Xunta - Colaboración coa Fegamp para respostar os afectados por execucións hipotecarias
Silleda - O concello estará na directiva dos concellos con interés turístico
Brión - o concelleiro José Cambón representante suplente na FEGAMP
Fondo Galego de cooperación + Fegamp – comisión permanente de relacións exteriores
O Fondo Galego e a Fegamp reforzan a súa colaboración a prol da cooperación internacional
- A asemblea da Federación de Municipios e Provincias aprobou por unanimidade unha resolución para promover a solidariedade do municipalismo pese á crise
- No seo da Fegamp crearase unha Comisión Permanente de Relacións Exteriores onde o Fondo Galego de Cooperación terá un papel protagónico
Illa de San Simón, 29 de novembro de 2011. O Fondo Galego de Cooperación e Solidariedade e mais a Federación Galega de Municipios e Provincias reforzarán os seus lazos de colaboración a prol da solidariedade internacional. A asemblea xeral da Fegamp aprobou por unanimidade a pasada fin de semana unha proposta de resolución neste sentido que foi presentada pola presidenta do Fondo, Teresa París, e que recibiu unha exitosa acollida por parte dos asistentes.
Perante o novo ciclo dos gobernos locais, o texto aprobado propoñía a creación, no seo da Fegamp, dunha Comisión Permanente de Relacións Exteriores na que o Fondo Galego teña un papel protagónico, inseríndose dentro da propia vida institucional da Federación, como auténtica axencia para a cooperación internacional das entidades locais galegas. Ademais das catro Deputacións, na actualidade son socios do Fondo 94 Concellos, que representan máis do 70% da poboación galega.
Esta rede cumprirá en 2012 quince anos de traballo conxunto fronte aos inxustos desequilibrios da realidade internacional, tanto apoiando procesos de desenvolvemento nos países do Sur como promovendo actividades de sensibilización entre a cidadanía do Norte. Proponse agora consolidar este proxecto, exemplo de traballo cooperativo superador das diverxencias, axuntando esforzos e sen que o contexto de crise supoña dar pasos atrás.
O Fondo Galego aposta por enraizar a capacidade de traballo conxunta coa Fegamp, que segundo recolle a resolución presentada debe sentir como propio o éxito desta experiencia en rede solidaria, asimilando e estimulando o sentido da cooperación xerada ata o momento. O obxectivo é xerar sinerxías favorecedoras do compromiso solidario e do municipalismo galego.
O Fondo Galego
O Fondo Galego de Cooperación e Solidariedade é unha rede que engloba a 96 Concellos e ás catro Deputacións de Galicia. Fundouse en 1997 como un foro a través do que consensuar e concentrar os esforzos dos poderes locais galego no eido da cooperación ao desenvolvemento. Trátase deste xeito de garantir unha xestión profesional e transparente, así como a realización de proxectos ambiciosos que teñan un verdadeiro impacto nos países do Sur e facilitar unha meirande sensibilización da sociedade galega a prol da solidariedade internacional.
Desde a súa fundación, a asociación ten desenvolvido 135 proxectos en máis de 20 países, e organizado e editado multitude de actividades e materiais en relación aos desequilibrios existentes entre os países do Norte e do Sur. Ten garantido a presenza da solidariedade do pobo galego nas catástrofes que afectan a aqueles países do mundo con menor capacidade para as enfrontar, con proxectos de reconstrución (como os casos de Sri Lanka, despois do maremoto de 2004, Cuba, despois dos furacáns de 2008 ou Gaza, despois dos bombardeamentos israelitas de finais de 2008 e primeiros de 2009). Na actualidade está a implementar unha intervención de post-emerxencia no Haití e mantén aberta unha conta de emerxencia para contribuír a paliar a crise alimentaria no Corno de África.
Silleda - Paula Fernández Pena formará parte da comisión executiva da Fegamp
Paula Fernández Pena formará parte da comisión executiva da Fegamp
A alcaldesa de Silleda foi tamén a vicepresidenta nunha das ponencias da oitava asamblea da federación celebrada hoxe en Santiago
Silleda, 26 de novembro de 2011. A alcaldesa de Silleda, Paula Fernández Pena, formará parte da executiva da Federación Galega de Municipios e Provincias (Fegamp). A rexedora socialista resultou elexida xunto con outros alcaldes galegos na sesión celebrada esta tarde no Pazo de Congresos de Santiago, no marco da oitava asamblea da Fegamp.
Ademais, Paula Fernández exerceu como vicepresidenta nunha dos relatorios que formaron parte da xuntanza, concretamente na de Cohesión e Ordenación Territorial. Baixo o título “Por un novo marco normativo en materia de ordenación do territorio e do urbanismo”, nesta sesión abordaron cuestións relacionadas sobre todo co urbanismo, ademais doutros asuntos coma o o transporte ou o medio ambiente como factor de sostibilidade.
