Amosando publicacións coa etiqueta FONDO GALEGO DE COOPERACION. Amosar todas as publicacións
Amosando publicacións coa etiqueta FONDO GALEGO DE COOPERACION. Amosar todas as publicacións

Fondo Galego de Cooperación - Encontros de calceta para concienciar sobre a situación das mulleres peruanas

Poñer en contacto a realidade das mulleres peruanas coas galegas é o principal obxectivo das citas para calcetar que InteRed organiza en Santiago de Compostela. Os encontros ‘Entretecendo’ encádranse no proxecto que o Fondo Galego de Cooperación e Solidariedade lle financia á ONGD para mellorar a atención ás vítimas da violencia de xénero no país andino. Ao tempo que reflexionan sobre os dereitos das mulleres, as participantes elaboran unha obra colectiva coa que se cubrirá a escultura dalgunha persoeira destacada.

As xuntanzas deron comezo en abril e reeditaranse o 12 e o 26 de maio e mais o 9 de xuño na sede de InteRed, situada na Praza do Matadoiro, de 20 a 22 horas. Durante as sesións preséntase o proxecto en Perú e campañas como ‘Actúa con coidados, transforma a realidade’, amais de debater sobre economía feminista, gordofobia, publicidade, etc. O día 26 contarase coa presenza de Ángeles López, destacada defensora dos Dereitos Humanos en México, que exporá a difícil situación das mulleres en Guanajato. As persoas interesadas só teñen que levar as agullas, xa que a organización facilita a la e asesoramento de balde. 

A actividade culminará o 16 de xuño cunha acción de “yarn bombing” ou “urban knitting”, unha técnica de arte urbana baseada nunha tarefa, a de tecer, que comparten mulleres de todos os tempos e culturas. Celebrarase un acto arredor da escultura dunha dona significativa, que se cubrirá coa peza elaborada en conxunto. Trátase dunha aposta polo recoñecemento das mulleres, pero tamén pola apropiación do espazo público, por facer do persoal político, relacionando o individual co colectivo e rompendo a dicotomía público/privado.

‘Entretecendo’ organízase en solidariedade co grupo de mulleres quechuas e aimaras que na rexión peruana de Puno traballan para mellorar a efectividade do itinerario de atención ás vítimas de violencia familiar e sexual. O Fondo Galego apoia este labor achegando 29.343 € ao proxecto de cooperación internacional impulsado por InteRed e o Movimiento Manuela Ramos. A iniciativa capacita a lideresas das organizacións indíxenas e sensibiliza aos operadores policiais e xudiciais para que se respecten os dereitos das mulleres.

O Fondo Galego



O Fondo Galego de Cooperación e Solidariedade está integrado por 85 Concellos e as Deputacións da Coruña e Lugo, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido máis de 150 proxectos en 25 países e promove numerosas actividades e materiais en relación aos desequilibrios Norte-Sur.

Teo - reunión do Fondo Galego de Solidariedade

A Rede Municipalista Solidaria do Fondo Galego de Cooperación reúnese en Teo
- O Concello coorganiza esta xuntanza na que persoal das Administracións socias revisará os proxectos no Sur e as actividades de sensibilización para 2013

Fondo galego de cooperación – encontro co PSdeG

Altos representantes do PSdeG apoiarán a cooperación municipalista no Encontro co Fondo

- Pachi Vázquez, Laura Seara, Carmen Cajide, Margarita Pérez Herráiz e Isaura Abelairas participan na xuntanza canda ong de Galicia e Nicaragua

- O Econtro 'Institucións locais e solidariedade' repetirase co PPdeG e o BNG para consolidar o compromiso coa cooperación internacional de Concellos e Deputacións, e das forzas políticas, tras o cambio de lexislatura

Destacados cargos do PSdeG-PSOE participan hoxe sábado 28 de xaneiro no Encontro 'Institucións locais e solidariedade', que se celebrará a partir das 10.30 horas no Parlamento de Galicia. O Fondo Galego de Cooperación e Solidariedade promove no primeiro trimestre de 2012 estes foros con cada un dos tres grandes partidos: PPdeG, PSdeG e BNG. As xuntanzas están dirixidas principalmente ás e aos representantes políticos das Deputacións e Concellos socios do Fondo Galego, co fin de consolidar o seu compromiso coa cooperación para o desenvolvemento.

O secretario xeral do PSdeG, Pachi Vázquez, abrirá a xornada canda a vicepresidenta do Fondo Galego e concelleira en Vigo, Isaura Abelairas, e mais a portavoz socialista de Igualdade e Cooperación no Parlamento de Galicia, Carmen Cajide. Intervirá logo a ex deputada con amplo percorrido en cooperación Margarita Pérez Herráiz, e relatarán as súas experiencias neste eido representantes dos Concellos de Lugo, O Barco de Valdeorras e Viveiro. Ademais da Secretaría Técnica do Fondo Galego, haberá oco para a Coordinadora Galega de ONGD e para a ONG nicaraguana INPRHU-Somoto.

Tamén participará a escritora e xornalista María Xosé Porteiro, integrante do Consello Reitor do Instituto Galego de Análise e Documentación Internacional (IGADI), que achegará o enfoque de xénero. Antes das conclusións, falarán sobre 'Os efectos da crise na cooperación para o desenvolvemento' a deputada no Congreso e secretaria de Igualdade e Cooperación da Executiva do PSdeG, Laura Seara, e mais Carmen Cajide.

Os Encontros 'Institucións locais e solidariedade' enmárcanse no Plan de Sensibilización do Fondo Galego, como unha fórmula de diálogo cos tres partidos políticos maioritarios en Galicia, piares do proceso de nacemento e consolidación da propia entidade. Tras o cambio de lexislatura municipal, preténdese reflexionar sobre o compromiso das institucións locais coa solidariedade e muscular a implicación dos partidos políticos co Fondo Galego de Cooperación, despois de quince anos de andaina.

PPdeG, PSdeG e BNG están representados na Comisión Executiva, órgano directivo da asociación, e son artífices do consenso que vén rexendo o seu funcionamento. Trátase agora, pese ao contexto de crise económica, de non dar pasos atrás. O obxectivo é renovar ese compromiso e fortalecer esta rede de institucións e persoas a prol da solidariedade internacional, da promoción dos Dereitos Humanos, do desenvolvemento dos países do Sur e da sensibilización da cidadanía galega.

O Fondo Galego

O Fondo Galego de Cooperación e Solidariedade está integrado por 94 Concellos e as catro Deputacións de Galicia, que concentran a través desta rede os seus esforzos no eido da cooperación ao desenvolvemento. Garántese deste xeito unha xestión profesional e transparente, así como a realización de proxectos con impacto nos países do Sur e a sensibilización da sociedade galega a prol da solidariedade internacional. Desde a súa fundación en 1997, o Fondo Galego ten desenvolvido 142 proxectos en 25 países e promove numerosas actividades e materiais en relación aos desequilibrios Norte-Sur.

Fondo galego de soliedariedade – encontros cos partidos

O Fondo Galego inicia os Encontros con representantes locais dos tres grandes partidos

- Os Encontros ‘Institucións locais e solidariedade’ dan comezo mañá na sede do PPdeG, mentres que as xuntanzas con PSdeG e BNG serán en 2012

- O obxectivo é consolidar o compromiso coa cooperación internacional de Concellos e Deputacións, e das forzas políticas, tras o cambio de lexislatura

Illa de San Simón, 22 de decembro de 2011. O Fondo Galego de Cooperación inicia mañá venres os Encontros ‘Institucións locais e solidariedade’, aos que se convoca os representantes políticos das Deputacións e Concellos socios. A primeira das tres xuntanzas, que se celebrará a partir das 10.30 horas na sede do PPdeG en Santiago de Compostela, está dirixida aos membros do Partido Popular. Os encontros con PSdeG-PSOE e BNG terán lugar no primeiro trimestre de 2012.

Abrirá a xornada a deputada no Parlamento de Galicia, María Seoane, e falará a continuación a presidenta do Fondo Galego de Cooperación e Solidariedade, Teresa París. A Secretaría Técnica (Igadi) fará logo un balance da traxectoria da entidade e tamén participará o director de Servizos Sociais do Concello da Coruña, José Luis Quintela, membro da Comisión Executiva. Antes de dar paso ás conclusións, intervirá unha técnica de cooperación internacional da Xunta de Galicia.

Esta actividade enmárcase no Plan de Sensibilización do Fondo Galego, como unha fórmula de diálogo cos tres partidos políticos maioritarios en Galicia, piares do proceso de nacemento e consolidación da propia entidade. Tras o cambio de lexislatura, preténdese reflexionar sobre o compromiso das institucións locais coa solidariedade e muscular a implicación dos partidos políticos co Fondo Galego de Cooperación, despois de quince anos de andaina.

PPdeG, PSdeG e BNG están representados na Comisión Executiva, órgano directivo da asociación, e son artífices do consenso que vén rexendo o seu funcionamento. Trátase agora, pese ao contexto de crise económica, de non dar pasos atrás. O obxectivo é renovar ese compromiso e fortalecer esta rede de institucións e persoas a prol da solidariedade internacional, da promoción dos Dereitos Humanos, do desenvolvemento dos países do Sur e da sensibilización da cidadanía galega.

O Fondo Galego

O Fondo Galego de Cooperación e Solidariedade é unha rede que engloba a 94 Concellos e ás catro Deputacións de Galicia. Fundouse en 1997 como un foro a través do que consensuar e concentrar os esforzos dos poderes locais galego no eido da cooperación ao desenvolvemento. Trátase deste xeito de garantir unha xestión profesional e transparente, así como a realización de proxectos ambiciosos que teñan un verdadeiro impacto nos países do Sur e facilitar unha meirande sensibilización da sociedade galega a prol da solidariedade internacional.

Desde a súa fundación, a asociación ten desenvolvido 142 proxectos en máis de 20 países, e organizado e editado multitude de actividades e materiais en relación aos desequilibrios existentes entre os países do Norte e do Sur. Ten garantido a presenza da solidariedade do pobo galego nas catástrofes que afectan a aqueles países do mundo con menor capacidade para as enfrontar, con proxectos de reconstrución (como os casos de Sri Lanka, despois do maremoto de 2004, Cuba, despois dos furacáns de 2008 ou Gaza, despois dos bombardeamentos israelitas de finais de 2008 e primeiros de 2009). Na actualidade está a implementar unha intervención de post-emerxencia no Haití.

Fondo Galego de cooperación + Fegamp – comisión permanente de relacións exteriores

O Fondo Galego e a Fegamp reforzan a súa colaboración a prol da cooperación internacional

- A asemblea da Federación de Municipios e Provincias aprobou por unanimidade unha resolución para promover a solidariedade do municipalismo pese á crise

- No seo da Fegamp crearase unha Comisión Permanente de Relacións Exteriores onde o Fondo Galego de Cooperación terá un papel protagónico

Illa de San Simón, 29 de novembro de 2011. O Fondo Galego de Cooperación e Solidariedade e mais a Federación Galega de Municipios e Provincias reforzarán os seus lazos de colaboración a prol da solidariedade internacional. A asemblea xeral da Fegamp aprobou por unanimidade a pasada fin de semana unha proposta de resolución neste sentido que foi presentada pola presidenta do Fondo, Teresa París, e que recibiu unha exitosa acollida por parte dos asistentes.

Perante o novo ciclo dos gobernos locais, o texto aprobado propoñía a creación, no seo da Fegamp, dunha Comisión Permanente de Relacións Exteriores na que o Fondo Galego teña un papel protagónico, inseríndose dentro da propia vida institucional da Federación, como auténtica axencia para a cooperación internacional das entidades locais galegas. Ademais das catro Deputacións, na actualidade son socios do Fondo 94 Concellos, que representan máis do 70% da poboación galega.

Esta rede cumprirá en 2012 quince anos de traballo conxunto fronte aos inxustos desequilibrios da realidade internacional, tanto apoiando procesos de desenvolvemento nos países do Sur como promovendo actividades de sensibilización entre a cidadanía do Norte. Proponse agora consolidar este proxecto, exemplo de traballo cooperativo superador das diverxencias, axuntando esforzos e sen que o contexto de crise supoña dar pasos atrás.

O Fondo Galego aposta por enraizar a capacidade de traballo conxunta coa Fegamp, que segundo recolle a resolución presentada debe sentir como propio o éxito desta experiencia en rede solidaria, asimilando e estimulando o sentido da cooperación xerada ata o momento. O obxectivo é xerar sinerxías favorecedoras do compromiso solidario e do municipalismo galego.

O Fondo Galego

O Fondo Galego de Cooperación e Solidariedade é unha rede que engloba a 96 Concellos e ás catro Deputacións de Galicia. Fundouse en 1997 como un foro a través do que consensuar e concentrar os esforzos dos poderes locais galego no eido da cooperación ao desenvolvemento. Trátase deste xeito de garantir unha xestión profesional e transparente, así como a realización de proxectos ambiciosos que teñan un verdadeiro impacto nos países do Sur e facilitar unha meirande sensibilización da sociedade galega a prol da solidariedade internacional.

Desde a súa fundación, a asociación ten desenvolvido 135 proxectos en máis de 20 países, e organizado e editado multitude de actividades e materiais en relación aos desequilibrios existentes entre os países do Norte e do Sur. Ten garantido a presenza da solidariedade do pobo galego nas catástrofes que afectan a aqueles países do mundo con menor capacidade para as enfrontar, con proxectos de reconstrución (como os casos de Sri Lanka, despois do maremoto de 2004, Cuba, despois dos furacáns de 2008 ou Gaza, despois dos bombardeamentos israelitas de finais de 2008 e primeiros de 2009). Na actualidade está a implementar unha intervención de post-emerxencia no Haití e mantén aberta unha conta de emerxencia para contribuír a paliar a crise alimentaria no Corno de África.

FONDO GALEGO DE COOPERACIÓN – NOVA COMISIÓN EXECUTIVA

O Fondo Galego de Cooperación e Solidariedade renova a Comisión Executiva

- O Concello de Redondela asume a Presidencia, o Concello de Vigo ostentará a Vicepresidencia e Allariz a Tesourería. Cambre, A Coruña, Viveiro, Oleiros e a Deputación de Lugo estarán nas vogalías.

- A nova presidenta aposta pola solidariedade internacional das Administracións locais galegas, sumando esforzos a través do Fondo Galego.

- Alfredo Novoa presidiu a entidade durante os últimos 14 anos, nos que todas as decisións se tomaron por unanimidade.

Santiago de Compostela, 30 de setembro de 2011. A Asemblea Xeral de socios do Fondo Galego de Cooperación e Solidariedade renovou esta mañá por unanimidade a Comisión Executiva, que nos próximos catro anos vai estar presidida por Teresa París (PP), representante do Concello de Redondela. A vicepresidenta será Isaura Abelairas (PSdeG-PSOE), do Concello de Vigo, mentres que a tesoureira vai ser Pilar Gallego (BNG), do Concello de Allariz. A Secretaría continuará correndo ao cargo do Instituto Galego de Análise e Documentación Internacional (IGADI), que impulsou a creación da asociación en 1997.FONDO GALEGO COOPERACION - EXECUTIVA 2011

O órgano de goberno e administración do Fondo Galego, que se renova despois de cada convocatoria de eleccións locais, conta tamén con cinco vogalías. Nelas estarán María Jesús González Roel, polo Concello de Cambre (PP); José Luis Quintela, polo Concello da Coruña (PP); Isabel Rodríguez polo Concello de Viveiro (PSdeG-PSOE); Antonio Veiga pola Deputación de Lugo (BNG) e Ángel García Seoane polo Concello de Oleiros (Alternativa dos Veciños). A composición da nova Executiva foi proposta pola Comisión saínte, tendo en conta a actual configuración partidaria das entidades locais galegas.

Alfredo Novoa, presidente do Fondo Galego desde 1997 ata hoxe, agradeceu ás compañeiras e compañeiros o traballo feito durante estes 14 anos, nos que todas as decisións se tomaron por consenso, pondo de lado diferenzas partidarias ou doutra índole. “Sempre houbo unha posición construtiva por parte de todos os socios que permitiu debater ata acadar consensos, pois a cooperación non ten siglas”, apuntou.

Tras recibir un agasallo da mans do director do IGADI, Xulio Ríos, Novoa desexoulle á nova presidenta “sorte e ánimo” para seguir apoiando aos países empobrecidos. Teresa París, pola súa banda, coincidiu na súa intención de traballar desde o consenso, sumando esforzos para atinxir unha cooperación máis eficaz e eficiente, sen perder nunca de vista o obxectivos principal: mellorar as condicións de vida das persoas dos países do Sur.

O Fondo Galego

O Fondo Galego de Cooperación e Solidariedade é unha rede que engloba a 96 Concellos e ás catro Deputacións de Galicia. Fundouse en 1997 como un foro a través do que consensuar e concentrar os esforzos dos poderes locais galego no eido da cooperación ao desenvolvemento. Trátase deste xeito de garantir unha xestión profesional e transparente, así como a realización de proxectos ambiciosos que teñan un verdadeiro impacto nos países do Sur e facilitar unha meirande sensibilización da sociedade galega a prol da solidariedade internacional.

Desde a súa fundación, a asociación ten desenvolvido 135 proxectos en máis de 20 países, e organizado e editado multitude de actividades e materiais en relación aos desequilibrios existentes entre os países do Norte e do Sur. Ten garantido a presenza da solidariedade do pobo galego nas catástrofes que afectan a aqueles países do mundo con menor capacidade para as enfrontar, con proxectos de reconstrución (como os casos de Sri Lanka, despois do maremoto de 2004, Cuba, despois dos furacáns de 2008 ou Gaza, despois dos bombardeamentos israelitas de finais de 2008 e primeiros de 2009). Na actualidade está a implementar unha intervención de post-emerxencia no Haití e mantén aberta unha conta de emerxencia para contribuír a paliar a crise alimentaria no Corno de África.

FONDO GALEGO DE COOPERACION


O FONDO GALEGO DE COOPERACIÓN IMPULSA UN PROXECTO DE CONSTRUCIÓNS ANTISÍSMICAS EN HAITÍ CO APOIO DO CONCELLO E DOS VECIÑOS DE BRIÓN

A iniciativa de reconstrución do tecido institucional local afectado polo terremoto promove accións formativas para erguer casas resistentes aos sismos

15 de novembro de 2010.- O Fondo Galego de Cooperación vén de pór en marcha en Haití un proxecto de intervención de post-emerxencia ao que contribuiu o Concello de Brión, mediante unha achega institucional, así como os veciños e veciñas do municipio coas súas doazóns particulares a través dunha conta aberta polo Fondo Galego de Cooperación tras o sismo que acabou de destruír o país americano o pasado 12 de xaneiro.

O proxecto permitirá, entre outras cuestións, formar preto dun cento de persoas en técnicas de construción antisísmicas e anticiclónicas con materiais tradicionais. A iniciativa, formulada canda o Fons Català de Cooperació, desenvolverase nos municipios de Carice, Vallières e Monbin Crochu, na fronteira nordeste coa República Dominicana. A entidade municipalista achega 160.000 euros procedentes de diversas administracións socias e algúns cidadáns de toda Galicia.

Actuacións

O proxecto de apoio ao desenvolvemento local presentado polo Fondo Galego actúa en varias frontes co fin de crear capacidades rexionais para mellorar as condicións de vida da poboación en equilibrio coa natureza, e así disipar os riscos e mitigar os desastres provocados polos fenómenos naturais na illa caribeña. Trátase, en definitiva, de apoiar as institucións e ás organizacións sociais para fortalecer a súa capacidade de desenvolveren plans de acción que disipen esa vulnerabilidade, aplicando políticas para o uso e ocupación do solo e sensibilizando á cidadanía para unha axeitada xestión da terra.

Para conseguilo, dunha banda impulsarase un programa intermunicipal de concertación de políticas públicas arredor de cuestións como a ordenación do territorio, a sostibilidade ambiental, o crecemento económico e a prevención de riscos. Tamén se adaptarán os plans de estudos que afectan aos 60 alumnos do Centro de Formación Profesional de Carice de acordo aos novos retos nas disciplinas de agroecoloxía, construción local adaptada, socio-administración e economía social.

Ao mesmo tempo, construirase un centro polivalente intermunicipal que se constituirá como un espazo intercomunal para o desenvolvemento local. Erguerase con estruturas e materiais resistentes aos terremotos e os furacáns que terán en conta a recuperación do medio ambiente e o emprego de elementos tradicionais. Entre eles destacan a arxila e o bambú, principalmente a clase chamada ‘guadua’, tamén coñecida como ‘aceiro vexetal’, que está a dar excelentes resultados noutros países de tradición sísmica. De xeito paralelo impartirase un taller sobre economía social e fortaleceranse as capacidades dos produtores coa plantación de bambú e outras especies vexetais, a transformación da arxila ou a reciclaxe de materiais para a construción. A edificación resultante será un exemplo para futuras vivendas na zona e servirá como práctica para unhas 90 persoas que sairán graduadas en construción.

A iniciativa cofinanciada en Haití polo Fondo Galego de Cooperación terá aínda un cuarto resultado. Crearase un sistema de información intercomunal en base á vulnerabilidade da poboación en relación aos riscos e desastres que implicará aos comités de Protección Civil de cada un dos tres municipios. En total, calcúlase que o proxecto completo repercutirá sobre preto de 500 beneficiarias e beneficiarios que se seleccionaron tendo en conta, entre outros, criterios de equidade territorial urbano-rural e de equidade de xénero. Son institucións, organizacións locais, profesionais e estudantes, aínda que se considera que indirectamente os efectos positivos repercutirán sobre os 64.000 habitantes que suman Carice, Vallières e Monbin Crochu.

O Fondo Galego

O Fondo Galego de Cooperación e Solidariedade é unha rede que actualmente engloba a 96 Concellos e ás catro Deputacións de Galicia. Foi fundado en 1997 como un foro a través do que consensuar e concentrar os esforzos dos poderes locais galegos no eido da cooperación ao desenvolvemento. Trátase deste modo de garantir unha xestión profesional e transparente, así como a realización de proxectos ambiciosos que teñan un verdadeiro impacto nos países do Sur e facilitar unha meirande sensibilización da sociedade galega a prol da solidariedade internacional.

Desde a súa fundación, a asociación ten desenvolvido 135 proxectos en máis de 20 países, e organizado e editado multitude de actividades e materiais en relación aos desequilibrios existentes entre os países do Norte e do Sur. Ten garantido a presenza da solidariedade do pobo galego nas catástrofes que afectan a aqueles países do mundo con menor capacidade para as enfrontar, con proxectos de reconstrución (como os casos de Sri Lanka, despois do maremoto de 2004, Cuba, despois dos furacáns de 2008 ou Gaza, despois dos bombardeamentos israelitas de finais de 2008 e primeiros de 2009). Na actualidade mantén aberta a conta de emerxencia para a reconstrución de Haití.