Mancomunidade de Ordes – dia contra a violencia de xénero

O CIM DA MANCOMUNIDADE DE ORDES DARÁ DÚAS CHARLAS, EN FRADES E OROSO, SOBRE VIOLENCIA DE XÉNERO E RECURSOS PARA COMBATILA NA COMARCA

O CIM está a adaptar a súa plataforma web ao territorio comarcal e prestará novos servizos de apoio ás vítimas

Os sete concellos da comarca ofrecen un amplo programa de actividades en conmemoración do 25-N

23 de novembro de 2011.- Para conmemorar o 25 de novembro, Día Internacional contra a Violencia de Xénero , o Centro de Información á Muller (CIM) da Mancomunidade de Municipios da Comarca de Ordes vai realizar dúas charlas informativas sobre violencia de xénero e recursos existentes para combatila na comarca ordense. Dúas charlas que terán lugar no multiusos de Frades (ás 17:00 horas) e no centro cultural de Oroso (ás 19:00 horas). A asistencia é totalmente libre e gratuita.

Estas charlas servirán para dar a coñecer as accións na loita contra a violencia de xénero que se están a levar a cabo na comarca e, en particular, informar dos servizos do CIM a todos os veciños dos sete concellos da Mancomunidade de Ordes: Cerceda, Frades, Mesía, Ordes, Oroso, Tordoia e Trazo. As dúas primeiras xornadas informativas están previstas para este venres 25 de novembro no multiudos de Frades (17:00 horas) e no centro cultural de Sigüeiro-Oroso (ás 19:00 horas). Unhas sesións que se celebrarán en próximas datas nos outros municipios da comarca.

Maior accesibilidade

Nestas xornadas, o persoal do CIM informará tamén das distintas accións que está a levar a cabo para facilitar o acceso das mulleres maltratadas a este servizo. Para iso está a adaptar a páxina web www.ordessenviolencia.org, inicialmente baixo titularidade do Concello de Ordes, ao ámbito comarcal. Deste xeito, esta plataforma servirá de instrumento de loita contra a violencia de xénero en todos os municipios, pois non só informa á vítima dos seus dereitos e axudas dispoñibles, senón que mesmo permite o contacto (anónimo ou personalizado) desa persoa co persoal do CIM, sen ter que desprazarse en persoa ás instalacións do Centro de Información á Muller.

Ademais, o CIM vai asinar un convenio de colaboración coa Xunta de Galicia para prestar un servizo de traducción na atención telefónica ás mulleres estranxeiras vítimas. Unha medida moi significativa tendo en conta o gran número de mulleres inmigrantes rexistrado na comarca de Ordes e que romperá a primeira barreira na comunicación con estas persoas: a lingüística.

Así mesmo, a Mancomunidade de Ordes aheríuse á campaña institucional da Xunta para o 25 de novembro, adaptándoa para que inclúa información sobre os servizos que se prestan na comarca en relación coa violencia de xénero. Unha campaña que se está a difundir nestes días nos medios de comunicación dos municipios a través de: cuñas radiofónicas (en Radio Ordes e Radio Cerceda), anuncios televisivos (TV de Cerceda) e na páxina web da Mancomunidade de Ordes.

Mesas de seguemento

Outra medida que xa se puxo en marcha esta mesma semana, a proposta dos sete alcaldes da Mancomunidade, é a creación en cada municipio da comarca dunha Mesa Técnica de Seguemento dos Casos de Violencia de Xénero, que estarán coordinadas polo CIM da Mancomunidade de Ordes. Estas mesas constituiranse dentro das Xuntas Locais de Seguridade (nos concellos que dispoñen de Policía Local) e nas Comisións Informativas de Seguridade dos respectivos municipios.

Con esta medida, a Mancomunidade de Ordes facilitará enormemente o intercambio de información entre o CIM e as distintas forzas e corpos de seguridade que actúan na comarca, o que redundará nun mellor servizo ás vítimas de violencia de xénero. Esta medida implicará a posta en marcha das Xuntas Locais de Seguridade nos concellos de Oroso e Tordoia (xa que Ordes e Cerceda xa as teñen operativas), así como daquelas Comisións Informativas de Seguridade que aínda non existan nos resto dos municipios.

As funcións destas mesas son: analizar a incidencia da violencia de xénero na localidade, detectar aqueles elementos que provocan disfuncións importantes na atención ás víctimas de violencia de xénero, avaliar a efectividade das intervencións, detectar aqueles casos que se detiveron no percorrido asistencial (así como as posibles causas) e elaborar estratexias para a continuidade da atención. Tamén se encargan de realizar propostas de actuación conxunta entre os servicios implicados para a consecución dos obxectivos, fixar documentalmente (a través dun mapa de utilización dos recursos) os criterios básicos de coordinación entre todas as institucións en aras dunha total eficacia na actuación conxunta e aprobar as propostas ou plans de actuación.

Accións por concellos

Ademais das accións conxuntas programadas dende o Centro de Información á Muller (CIM) da Mancomunidade de Municipios da Comarca de Ordes para conmemorar o día 25 de novembro, Día Internacional contra a Violencia de Xénero, e das dúas charlas en Frades e Oroso, o resto dos municipios ten programadas outra serie de iniciativas.

MESÍA

- 25 de novembro. Teatro. Representación da obra “RR.HH. (o método)”, da asociación O Aturuxo de Melpémone. Casa da Cultura, ás 21:30 horas.

ORDES

- Durante as últimas semanas, Radio Ordes está emitindo unha cuña radiofónica contra a violencia de xénero, elaborada pola Secretaría Xeral de Igualdade, e que a maiores inclúe os datos de contacto do CIM da Mancomunidade de Ordes.

- Gravación dun videoclip sobre a igualdade de oportunidades e a violencia de xénero, a cargo de mozos e mozas ordenses de entre 12 e 18 anos. Unha iniciativa organizada no marco do programa “Enrolarte en igualdade”, que ten como finalidade concienciar e sensibilizar á mocidade sobre as desigualdades de xénero existentes e fomentar actitudes igualitarias. Unha iniciativa que forma parte do programa “Educar en igualdade”, subvencionado pola Secretaría Xeral de Igualdade da Xunta e polo Fondo Social Europeo. “Enrolarte en igualdade” incluíu actividades como un obradoiro de hip hop (celebrado o 22 e o 29 de outubro), un obradoiro de cómic (21 e 28 de outubro), vídeo relato (4 e 5 de novembro), un obradoiro de cociña creativa (12 e 18 de novembro) e unha gymkana de supervivencia no fogar (19 de novembro). Todas as actividades tiveron lugar na Casa da Culutra de Ordes e foron totalmente de balde.

TORDOIA

- O 25 de novembro terá lugar a clausura do programa “Igualdade, un traballo en equipo”, levado a cabo polo Concello de Tordoia no CPI Pecalama e subvencionado pola Deputación da Coruña. Entre o 21 e o 25 de novembro o Concello de Tordoia celebrou a I Semana da Corresponsabilidade, no marco da celebración de actividades previstas no Plan de Igualdade de Mulleres e Homes do Concello de Tordoia posto en marcha o ano pasado. Durante eses días, maiores e pequenos participaron nunha Gymkana do fogar, un cineforum e un obradoiro de cociña, concebidos para traballar na superación dos roles que tradicionalmente se lle outorgan ás mulleres. O obxectivo desta semana é continuar co traballo que durante todo o mes de novembro están levando adiante o Concello de Tordoia en colaboración co CPI Pecalama dentro do I Mes de Corresponsabilidade, dirixido a sensibilizar tanto a pais e nais como ao profesorado sobre a igualdade de sexos e corrixir estereotipos sexistas e traballar o incremento da corresponsabilidade no traballo doméstico e coidado dos nenos. Despois de actividades como o obradoiro “Cambiemos os Contos”, “O amo da casa” ou “Vaia canción”, esta semana máis de 180 rapaces de EI, ESO e EP do Pecalama participarán nas actividades previstas., que culminará cun obradoiro de cociña común que correrá a cargo da Escola Superior de Hostalería de Galicia, que dirixirá aos rapaces para elaborar todos xuntos unha receta de cociña.

TRAZO

- O Concello de Trazo elaborou unha tarxeta conmemorativa do Día Internacional contra a Vilencia de Xénero.

- Xornadas sobre “Saúde integral da Muller”, dirixidas a mulleres de entre 18 e 60 anos empadroadas en Trazo. As xornadas abordarán todos aqueles temas de interese para as mulleres: anatomía, afeccións comúns, patróns de pensamento, accións e emocións, roles sociais, formas de relacionarse... Terán lugar os días 13 e 16 de decembro, en horario de 20:00 a 22:00 horas. Para anotarse só é preciso presentar fotocopia do DNI, antes do 30 de novembro, no departamento de Servizos Sociais do Concello de Trazo.

CERCEDA

- Xoves 24 de novembro. Presentación do II Plan de Igualdade de Oportunidades Municipal 2011-2013, cuxo obxectivo é acadar unha sociedade totalmente igualitaria en todos os ámbitos da vida: o familiar, o laboral, o sociual e o persoal. Este plan nace da estreita colaboración e o traballo en común de todos os ámbitos (político, técnico, sanitario, de seguridade, movemento asociativo, axentes educativos,…) que foron convidados a participar na súa elaboracióin e aprobación, así como en comprometerse a pór en marcha as accións que nel se acordaron. Despois de realizar unha enquisa municipal e de varios grupos de traballo complementados por unha análise exhaustiva dos principais datos oficiais existentes sobre o concello, definironse as prioridades, as necesidades e os obxectivos que se pretenden acadar coa posta en marcha deste Plan, tendente a impulsar e desenvolver unha política transversal que se orienta ás prácticas de igualdade de oportunidades entre mulleres e homes en todas as accións municipais de maneira que repercuta no benestar e na calidade de voida da cidadanía de Cerceda. As áreas de actuación do II PIOM son 7:

1.- Información e orientación: co obxectivo de favorecer a igualdade entre mulleres e homes, a través do fomento da sensibilización e da información ofrecida á poboación do Concello de Cerceda.

2.- Formación e emprego: coa finalidade de fomentar o emprego e a mellora da formación, co fin de eliminar as desigualdades de xénero existentes.

3.- Conciliación laboral, familiar e persoal: perseguirá facilitar a satisfactoria conciliación dos tempos laborais, familiares e tamén persoais da poboación de Cerceda

4.- Reparto Igualitario de tarefas e responsabilidades domésticas: fomentar a corresponsabilidade entre a poboación do Concello de Cerceda

5.- Educación en Igualdade: Coeducación: Promover a coeducación e a formación baseada na igualdade de oportunidades entre mulleres e homes

6.- Benestar Social e Asociacionismo: fomentar a participación da poboación na esfera pública do Concello e mellorar o seu nivel de benestar social

7.-Prevención e eliminación da violencia de xénero: fomentar a prevención e a eliminación da violencia de xénero no Concello de Cerceda

- Venres 25 de novembro. Ás 20:30 horas, auditorio municipal de Cerceda. Representación da obra “Nunca nada de ninguén”, de Luisa Costa e representada polo Grupo Municipal de Teatro de Ames. A obra permite un achegamento do espectador a aquelas mulleres que cada nada agardan ou que o teñen todo por descubrir, as que calaron e as que deciden ter voz.

- 25 de novembro. Os nenos e nenas dos distintos centros educativos de Cerceda elaboraron un manifesto contra a violencia de xénero. O manifesto será leído polos cativos nos seus respectivos centros entre as 11 e as 12:00 horas.

- Durante as últimas semanas, Radio Cerceda está emitindo unha cuña radiofónica, de elaboración propia, contra a violencia de xénero.

BNG Ordes – proposta para instar a xunta para manter a asistencia sanitaria

O BNG PROPORÁ QUE O PLENO INSTE Á XUNTA A MANTER A ASISTENCIA SANITARIA AOS DESEMPREGADOS

Gonzalo Castro afirma que a Orde da Consellería de Sanidade deixaría a máis de 800 veciños de Ordes sen cobertura sanitaria

O portavoz municipal do BNG de Ordes, Gonzalo Castro anunciou que o seu grupo proporá que o Pleno de Ordes, que terá lugar este xoves, inste ao goberno do PP na Xunta de Galiza a manter a asistencia sanitaria aos desempregados e persoas sen recursos, debido á confirmación da existencia dun protocolo polo que estas persoas só terían dereito á atención de urxencias .

Castro afirmou que “o propio presidente da Xunta, Alberto Núñez Feijóo, nunha interpelación parlamentaria do portavoz do BNG no Parlamento Galego, Carlos Aymerich, recoñeceu a existencia dun protocolo remitido pola Consellería de Sanidade o pasado 29 de setembro, polo que as persoas sen recursos, é dicir, os desempregados que agotaron a súa cobertura hai máis de doce meses, non terían dereito a asistencia sanitaria completa, tal e como viña denunciando o BNG.”

Segundo o portavoz municipal do BNG de Ordes, “dende a entrada en vigor desta Orde, as persoas sen recursos só teñen dereito á atención de urxencias e emerxencias”, é dicir, perden o dereito á sanidade pública universal, fican sen médico de cabecera, probas diagnósticas, nin especialistas, é dicir, non teñen dereito á asistencia sanitaria completa.

Gonzalo Castro salientou que “con este recorte, máis de 800 veciños e veciñas de Ordes poderían quedarse sen asistencia sanitaria completa, polo que agardamos que a Corporación Municipal de Ordes manifeste de forma unánime a súa disconformidade con estas políticas de recortes cos máis necesitados que está a levar a cabo o PP e esixa á Xunta o mantemento dos servizos públicos e as coberturas sociais que forman parte do Estado de Benestar”.

Ames – charla contra a violencia de xénero

Máis de 130 alumnos do IES de Ames asistiron a unha clase sobre a violencia de Xénero

A Secretaria Xeral de Igualdade, Susana López Abella, o alcalde de Ames, Santiago Amor, e a concelleira de Asociacionismo, Igualdade, Muller e Xuventude María González presentaron a charla que impartiu un policía nacional que se enmarca dentro dos actos do 25 de novembro, Día Internacional para a eliminación da violencia contra as mulleres

Ames, 23 de novembro de 2011. Esta mañá 130 alumnos do IES de Ames asistiron a unha charla cun policía nacional, na que se lles explicou de xeito interactivo e con casos prácticos o tema da violencia de xénero. A Secretaria Xeral de Igualdade, Susana López Abella, o alcalde de Ames, Santiago Amor, e a concelleira de Asociacionismo, Igualdade, Muller e Xuventude, María González, presentaron este acto ao que tamén asistiron membros dos grupos políticos da oposición amiense. Susana López Abella pediu “complicidade e axuda aos máis novos porque sodes as xeracións de futuro e a nosa esperanza”, e dixo que espera que entre todos logremos a tolerancia cero para a violencia de xénero. O alcalde de Ames, Santiago Amor, e a concelleira de Muller, María González pediron implicación e sensibilización na sociedade e agradeceron tamén a presenza de membros dos grupos municipais socialista e nacionalista. Santiago Amor aludiu á importancia “da unidade das forzas políticas na loita contra a lacra social que supón a violencia de xénero”.

Esta charla enmárcase dentro dos actos programados pola concellería de Asociacionismo, Igualdade, Muller e Xuventude de cara ao Día Internacional para a eliminación da violencia contra as mulleres, Alejandro Gómez, foi o policía nacional que impartiu hoxe ante máis de 130 rapaces e rapazas de entre 14 e 17 anos unha clase moi didáctica para explicar diversos aspectos do tema da violencia contra as mulleres. A clase consistiu na presentación dun caso práctico que aconteceu este verán en Galicia, para que os rapaces, por medio dun método de preguntas e respostas fosen sacando conclusións sobre as causas primarias da violencia de xénero. Na investigación proposta polo policía o obxectivo non era buscar culpables, se non estudar o fenómeno da violencia machista.

Alejandro Gómez aportou datos na charla coma que o 60% das mulleres no mundo van sufrir violencia de xénero ou que entre os anos 2007 e 2010 en España producíronse 430.000 denuncias e morreron 308 mulleres o que fai que por cada 1.500 denuncias morre unha muller. O monitor explicou a partir dos datos anteriores a lacra que supoñen os crimes, pero tamén a terrible realidade das persoas que sofren este tipo de violencia aínda que non cheguen a ser asasinadas.

“Calquera pode ser vítima e calquera pode ser agresor”, “as doenzas poden ir máis alá do físico” ou “o problema radica en que a persoa que agrede non considera á súa parella como un igual, polo que a violencia de xénero ten unha gran carga ideolóxica” son premisas ás que os rapaces puideron chegar a partir do exercicio plantexado polo policía.

Silleda – notas mércores 23 novembro

O Centro de Información á Muller de Silleda estrea unha orixinal campaña de sensibilización contra a violencia de xénero

-E ti que dís? é o lema da iniciativa coa que se poden deixar mensaxes, debuxos e reflexións nas paredes do centro social, no blogue do CIM e tamén en Facebook

Silleda, 23 de novembro de 2011. Con motivo da celebración do Día Internacional da Non Violencia contra as Mulleres, que se celebra o vindeiro venres día 25, o Centro de Información á Muller (CIM) de Silleda vén de iniciar una novidosa campaña de concienciación, na que as mensaxes conta a lacra da vilencia de xénero son as protagonistas.

As portas do CIM, nas dependencias do Centro Social de Silleda, están abertas a todas aquelas persoas que queiran deixar a súa reflexión, citas, ou mesmo debuxos nas paredes. Baixo o lema E ti que dís? esta campaña tamén se pode seguir a través das redes sociais, deixando as mensaxes no muro do Facebook do centro silledense ou no blogue da entidade (cimsilleda.blogspot.com), onde os usuarios xa levan colgadas as súas aportacións nas últimas horas.

Ademais, todas as achegas no muro do Facebook tamén se están a imprimir para completar a mostra do CIM, que espera convertirse de xeito simbólico nun muro para frear a violencia contra as mulleres.

A alcaldesa, Paula Fernández, e a concelleira de Servizos Sociais, Dolores García, acudirán o venres a deixar tamén as súas mensaxes, participando desta iniciativa orixinal que está a recibir numerosos apoios.

 

----------------------------------------------------

O Concello de Silleda solicita un bolseiro á Fundación Empresa-Universidade Galega (Feuga) para contar cun xeógrafo

-Matías Rodríguez explica que con esta medida se dará apoio aos departamentos de Cultura e Turismo para desenvolver estudios que logo sirvan como base na xestión de recursos

Silleda, 23 de novembro de 2011. O Concello de Silleda vai acollerse ao programa de bolsas da Fundación Empresa-Universidade Galega (Feuga), que promove a contratación de mozos/s recén licenciados que nunca antes tiveran traballado na súa especialidade, para contar con un xeógrafo/a. O contrato do bolseiro formalizaríase xa para o vindeiro mes de decembro (a media xornada) continuando despois durante todo o exercicio de 2012 a xornada completa. “Queremos que sexa un apoiuo para os departamentos de Cultura e Turismo de cara a desenvolver estudios que logo sirvan para a xestión dos diferentes recursos cos que conta Silleda, xa que se precisa un traballo rigoroso para a posta en valora do noso patrimonio, espazos naturais …”, explica o concelleiro de Cultura e Turismo, Matías Rodríguez da Torre.

Entre os cometidos para este bolseiro/a figuran a elaboración dun proxecto integral para o desenvolvemento territorial dos espazos naturais e patrimoniais do municipio e a dinamización dos mesmos; unha análise territorial de espazos rurais e urbanos para aplicar ao ordenamento territorial ; a elaboración cartográfica dos espazos analizados ou a análise e xestión ambiental da paisaxe xeográfica. Da Torre explica que xa se puxo en contacto coa Feuga para que realice os trámites oportunos no Servizo Galego de Colocación. Así, o concelleiro apunta que se hai algún licenciado/a en Xeografía interesado na bolsa, pode acudir ao Servizo Galego de Colocación, que se encargará de facer a preselección.

Tordoia – plan de obras e servicios 2012

O CONCELLO DE TORDOIA DESTINARÁ O POS 2012, POR IMPORTE DE MÁIS DE 244.000 EUROS,

A INFRAESTRUTURAS E GASTOS CORRENTES

A corporación celebrou un segundo pleno extraordinario a solicitude do grupo municipal socialista aínda que non presentou moción algunha

23 de novembro de 2011.- O pleno municipal do Concello de Tordoia ven de aprobar por unanimidade o Plan de Obras e Servizos correspondentes a 2012 que suporán un investimento no municipio de 244.615€, dos cales 124.402€ irán destinados a obras e o restante 45%, isto é, 120.213€, a gastos correntes nun reparto moi similar ao executado no POS do ano pasado. Segundo explicou o rexedor tordoiés, Antonio Pereiro, o investimento en obras, sufragado pola Deputación e o Concello de Tordoia, permitirá levar adiante tres grandes proxectos dirixidos a mellorar as infraestructuras do municipio.

O de maior cuantía, de 57.115 euros, fará posible acondicionar os accesos en Santaia e executar catro camiños en Requeixo, Campo de Millo, Graveira e o que comunica Tarroeira-Corredoira nos que se executarán os traballos necesarios para consolidar estas pistas, executando bacheados e riego asfálticos que garantan a súa conservación e uso. Outro dos proxectos contempla o remate da senda entre Campo de Millo e Castenda. Cun importe de máis de 32.000 euros o proxecto contempla a continuación das obras nas que se está a executar as beirarrúas, as arcas de recollida de pluviais, o saneamento e a iluminación da recta da Tarroeira.

Finalmente, o Alcalde de Tordoia anunciou con gran satisfacción a execución dun último proxecto, a reforma do alumeado en Casadabade e Bedrobe que permitirá retirar os postes de alumeado que se situaban nos arcenes da estrada de titularidade supramunicipal. “Era unha vella demanda que tivemos que agardar durante tempo para poder levar adiante, xa que os postes só podían moverse unha vez estiveran sen o cableado eléctrico, de feito a Deputación da Coruña xe movera algúns, e agora por fin poderemos reformar o alumeado e substituir as luminarias actuais por unhas de aforro enerxético, o que nos permitirá darlle solución o problema da circulación e tamén aforrar no recibo”, explicou Antonio Pereiro. A cuantía destes traballos será de 35.138,56€.

Aprobación do presuposto

O pleno con carácter extraordinario celebrado esta mañá tamén serviu para a aprobación do orzamento de 2011 cos votos a favor do grupo de goberno e a oposición do PSOE. Por un importe de 3.050.000 euros, un 39% menor que o do pasado ano, Antonio Pereiro explicou que demoraron a súa aprobación ata coñecer exactamente os investimentos doutras administracións cos que ían contar, e así poder cadrar as contas. En canto ao descenso do tivo que soportar os gastos derivados na compra de terreos como os destinados a Gardería e o Centro Multiusos, nin os da execución do Obradoiro de Emprego, polo que o orzamento volve recuperar a tónica dos anos anteriores, cando rondaba os tres millóns de euros.

Pleno Extraordinario solicitado pola oposición

A corporación municipal rematou a súa intervención coa celebración dun segundo pleno, tamén de carácter extraordinario, pero esta vez solicitado polo grupo socialista municipal, quen presentou no rexistro do Concello unha solicitude para levar ante o pleno municipal catro puntos a debate, aínda que non presentou ningunha moción a debate. Así a corporación celebraba un pleno extraordinario no que se debatiron catro puntos: os dous primeiros relativos ao cambio de titularidade dun camiño e máis ao acceso a unha casa e os dous últimos relativos ao estado de contas do Concello de Tordoia e máis á solicitude de que se lle retirara a dedicación exclusiva do Alcalde, por entender que non é compatible co seu traballo como deputado provincial.

Desde o goberno, Antonio Pereiro demandou aos socialistas que presentaran algunha moción ou proposta para debater e non unha relación de puntos sen concretar ningunha solicitude, rogándolles que en vindeiras ocasións presentaran a solicitude de pleno extraordinario incluíndo a documentación dos temas que se van abordar para poder enriquecer o debate e poder ofrecer a información solicitada. O rexedor explicou, ademais, que as contas do concello están presentadas no Tribunal de Contas en tempo e forma e aí poden facer calquera consulta que desexen.

oroso – o plan de obras e servicios destinarase a obras

O CONCELLO DE OROSO DESTINARÁ INTEGRAMENTE A OBRAS O PLAN DE OBRAS E SERVIZOS DE 2012 E APORTARÁ 108.000 EUROS ADICIONAIS AO PLAN

O Concello de Oroso investirá un total de 358.885 euros en obras

O pleno aprobará un informe de sustentabilidade económica para a modificación puntual do PXOM da Barciela e o regulamento de organización do acollemento civil en Oroso

23 de novembro de 2011.- O Concello de Oroso destinará a obras o 100% dos 250.365,65 euros correspondentes ao Plan Provincial de Cooperación ás Obras e Servizos de Competencia Municipal (POS) 2012. De feito, o alcalde orosán, Manuel Mirás Franqueira, explica que “non só imos aportar os 11.922 euros que nos corresponden proporcionalmente a este POS 2012, senón que imos reforzalo con outros 108.000 euros para facer aquelas obras que precisan os nosos veciños e veciñas”.

Deste xeito, o Concello de Oroso aportará un total de 120.442,39 euros das arcas municipais ao POS 2012 (11.922,17 euros correspondentes á obriga legal de aportar o 5% do total e outros 108.520,22 euros adicionais para poder acometer os proxectos). Así, o POS 2012 en Oroso sumará un total de 358.885,87 euros, un 43% máis que o inicialmente proxectado pola Deputación Provincial.

Obras a executar

O pleno municipal ordinario de mañá xoves, ás 19:00 horas, debaterá a proposta da Alcaldía coas obras a incluír no POS 2012. O proxecto máis importante, orzamentariamente falando, terá lugar na parroquia de Oroso, onde se investirán un total de 145.586,36 euros en dúas fases. A primeira fase das obras inclúen traballos de execución de rede eléctrica, preinstalación de alumeado público e dotación de zonas peonís no vial que une os núcleos rurais de Vilalbarro e O Cruceiro coa estrada nacional N-550. A segunda fase dos traballos inclúe obras de instalación de alumeado público e habilitación de zonas peonís nesta mesma zona, á que hai dous anos se dotou de abastecemento e saneamento de augas.

Ademais, a proposta da Alcaldía inclúe outros importantes proxectos como:

- a construción dunha senda peonil no núcleo de poboación de Baxoia (parroquia de Deixebre) por un importe de 81.860,56 aeuros. Un proxecto que dará continuidade á senda peonil feita na anterior lexislatura.

- a mellora da rede viaria e o rechedo dunha parcela para aparcamento na parroquia de Trasmonte. Orzamentada en 77.775,06 euros, este proxecto inclúe a habilitación dunha zona de aparcamento de vehículos nas proximidades da igrexa de Trasmonte.

- obras de abastecemento de agua na estrada AC-460 por un importe de 53.663,89 euros. Unhas obras que complementarán a senda peonil construída en 2009 dende a antiga estación do tren de Garga (Trasmonte) ao longo da estrada AC-460, que dende xuño de 2010 é titularidade do Concello de Oroso.

PXOM Barciela

Por outra banda, o pleno municipal aprobará provisionalmente o informe de sustentabilidade económica e da memoria ambiental da modificación puntual número 1 (A Barciela) do Plan Xeral de Ordenación Municipal. Un informe que se aproba a requerimento do Servizo de Urbanismo do Departamento Territorial da Consellería de Medio Ambiente, Territorio e Infraestruturas.

Manuel Mirás explica que “se trata dunha petición de máis detalles á documentación adxunta, sobre todo un informe sobre como imos financiar os traballos nas redes de abastecemento e saneamento na zona. Unha vez presentados e aprobados polo pleno, esperamos que sexa o último paso de cara á aprobación definitiva desta modificación puntual do PXOM”. Esta modificación do PXOM realízase para incluír nel unha superficie de 67 hectáreas da Barciela (procedentes do proceso de segregación-agregación acontecido entre os termos municipais de Santiago de Compostela e Oroso).

Acollementos civís

Finalmente, o pleno municipal aprobará o Regulamento de organización do Acollemento Civil en Oroso, que establecerá a posibilidade de celebrar actos de acollemento civil que non terán carácter administrativo nin valor legal ningún, e que tampouco presupoñen privilexio o preferencia algún do neno ou nena no acceso aos distintos servizos municipais. A cerimonia do acollemento civil celebrarase a instancia dos pais/nais ou titores sen custo algún para os solicitantes.

A cerimonia de acollemento será individual e consistirá nun acto público que se celebrará nas dependencias municipais e no que se dará lectura aos artigos 12 e 27 da Convención sobre os Dereitos da Infancia da ONU e aos artigos 39.3 e 39.4 da Constitución Española, sen prexuízo da posibilidade de que os solicitantes poidan ler outro artigo ou texto. Ao acto poderán asistir familiares e amigos.

Teo – pleno ordinario novembro

O PLENO DO CONCELLO DE TEO DEBATERÁ A PROPOSTA DAS OBRAS A INCLUÍR NO POS DA DEPUTACIÓN

· Outro dos asuntos destacados é a proposta de regulamento do cemiterio municipal de Teo

· PSdeG-PSOE e BNG levarán tamén propostas conxuntas en materia de violencia de xénero e sobre o plan concertado

23 de novembro de 2011. A corporación teense reúnese este xoves 24 de novembro para celebrar a sesión ordinaria do pleno deste mes. O debate terá lugar, como xa é habitual, en horario de tarde, ás 20:00 horas, para facilitar a asistencia das persoas interesadas e celebrarase no salón de sesións da Casa Consistorial, na Ramallosa.

O punto máis destacado da sesión é a propsta de obras que se incluirán no Plan de Obras e Servizos (POS) da Deputación da Coruña. O edil de Urbanismo, Rafael Sisto, destaca que se trata dunha proposta que ten en conta “as necesidades municipais e as conversas mantidas entre todos os grupos políticos co obxecto de valorar a necesidade e a urxencia das obras a realizar”. O Concello de Teo investirá o total do orzamento previsto no Plan supramunicipal en obras, e non usará financiamento para gastos correntes. “A pesar de que a situación de liquidez nos Concellos non éa máis desexable consideramos que o investimento en infraestructuras é primordial nun momento no que o gasto en obras, tanto a nivel municipal como por parte doutras administracións se ten minimizado ata case desaparecer” explica Sisto.

Entre as obras previstas no POS, que segundo destaca o edil de Urbanismo foron consensuadas coa oposición, destaca o acondicionamento do vial Lucí-Vilariño que precisa de máis da metade do orzamento, con 236.093 euros de custe. “Trátase dunha arteria viaria principal que dende a Ramallosa cruza as parroquias de Lucí e Vilariño e con esta actuación tamén se compensa a falla de investimentos na zona” explica Rafael Sisto. No POS tamén se contempla o afirmado das pistas entre Socastro e Fixó e Carballal-Fixó na parroquia de Calo. Outra das obras importantes é a reparación do firme en Fontenlo, Pontevea, Olveira e Cerdeira cun orzamento de 110.985 euros. A obra do Plan complementario do ano 2012 e o afirmado da pista entre o cruceiro de Francos e a ponte de Paradela, cun custe superior ós 100.000 euros.

Outro dos puntos de debate será o regulamento do cemiterio municipal no que se recollen as condicións de uso das instalacións así como de concesión de nichos e panteóns. Entre outros aspectos establécese o horario de apertura ó público da instalación, que en inverno será de 10:00 a 18:00 horas e no verán de 09:00 a 20:00 horas. Outros aspectos recollidos no documento son a necesidade de estar empadroado en Teo para poder ter a concesión dun nicho ou a duración da concesión administrativa que será de 75 anos.

O PSdeG-PSOE e o BNG defenderán dúas propostas no pleno consensuadas sobre os recortes do plan concertado da Xunta de Galicia e sobre as políticas de prevención e tratamento da violencia de xénero. Aínda que cada formación presentara a súa moción, como se recolle na orde do día, na propia sesión estas serán retiradas e propoñerase unha conxunta. O PP tamén propón unha moción sobre o plan concertado.

A orde do día ten os seguintes puntos:

1. Aprobación das actas das sesións do 29.09.2011 e 24.10.2011.
2. Dar conta das resolucións da alcaldía (da 790/11 á 854/11).
3. Aprobación da conta xeral 2010.
4. Ditame da proposta de elección de xuíz/a de paz substituto/a do Concello de Teo.
5. Ditame da proposta da alcaldía do POS 2012.
6. Ditame da proposta da alcaldía de regulamento do cemiterio municipal.
7. Ditame da moción do grupo mixto municipal (PSdeG-PSOE) sobre o plan concertado.
8. Ditame da moción do grupo mixto municipal (PSdeG-PSOE) sobre a violencia de xénero.
9. Ditame da moción do grupo municipal do PP sobre o plan concertado.
10. Ditame da moción do grupo municipal do BNG sobre os recortes do plan concertado da Xunta de Galicia.
11. Ditame da moción do grupo municipal do BNG relativa ás políticas de intervención e tratamento da violencia de xénero.
12. Mocións.
13. Rogos e preguntas.

Ordes – tapons “unha sonrisa para Aitana”

Ordes entrega o primeiro lote de tapóns de plástico para a campaña “Una Sonrisa para Aitana”

Ordes, 23 de novembro de 2011: Esta mañá fíxose entrega do primeiro lote de tapóns de plástico que os veciños e veciñas de Ordes e de toda a comarca depositaron no punto habilitado para tal recollida polo Concello de Ordes en beneficio da campaña “Una Sonrisa para Aitana”.

Concretamente entregáronse esta mañá á empresa de transporte que participa tamén na campaña e que llos fará chegar á familia de Aitana, máis de 50 kg de tapóns.

Despois desta primeira entrega, a campaña segue adiante e dende o Concello de Ordes animan aos seus veciños e veciñas a que participen nesta acción solidaria a través da que se están a recoller tapóns de plástico co fin de que a familia de Aitana, unha nena de Tarazona de 9 anos, poida recaudar fondos para ser operada en Boston a causa dunha cardiopatía conxénita.

Todos aqueles que queiran participar poderán seguir depositando os tapóns de plástico no punto habilitado no 1º andar da Casa do Concello, colaborando así nunha boa causa a través dun pequeno xesto.

Para máis información acerca desta campaña que leva a cabo a familia da pequena pódese consultar a web www.unasonrisaparaaitana.org ou contactar a través do mail luisgarciagarcia@live.com

Información sobre Aitana

Aitana é unha nena de 9 anos de Tarazona (Zaragoza), que naceu cunha cardiopatía conxénita, atresia pulmonar sin tronco pulmonar con colaterales.civ, comunicación interventricular e fisura palatina. A solución para a que buscan agora a axuda económica é unha operación, consistente na reconstrucción do tronco pulmonar que se realizará no Children´s Hospital de Boston, a onde esperan poder trasladar á rapaza coa recaudación da campaña.

Fundación Araguaney – redes sociales

O Araguaney Gran Hotel sitúase na redes sociais e ofrece gozar aos seus clientes dunha ponte da Constitución gastronómica, cultural e saudable

Santiago de Compostela, Mércores 23 de Novembro de 2011. O Araguaney Gran Hotel, coas súas cinco estrelas e un emprazamento privilexiado é, dende practicamente os seus comezos, unha icona da capital galega que acolle a celebración de todo tipo de eventos sociais e profesionais, ademais de ofrecer un servizo e trato de primeira calidade aos seus clientes. Dende hai máis de 25 anos, o emblemático Araguaney é a opción pola que se decanta xente de todas partes do mundo á hora de hospedarse nas súas vacacións ou viaxes de negocio.

Polas demandas do mercado e os seus clientes, que cada vez son máis esixentes, o Araguaney Gran Hotel propón diferentes opcións para que Santiago de Compostela reciba a visita de turistas de calquera parte do mundo. Así, durante a Ponte de Decembro ofrece promocións en grao sumo apetecible. Propón estancias gastronómicas, culturais e enfocadas ao coidado do corpo e a mente cos seus paquetes Gastronomita, Urbanita e Sibarita. Degustar a mellor gastronomía galega nun restaurante de primeira como o Caney, polo que pasan a diario centos de composteláns, xa é posible grazas á opción Gastronomita. Ademais, grazas á opción Urbanita, os clientes poderán gozar tamén de visitas guiadas aos monumentos máis destacados de Santiago, como a Catedral e a Cidade da Cultura. O Sibarita está feito para aqueles que queiran descansar e relaxar corpo e mente. Para iso, o hotel ten un acordo co Espagat Complexo Saúde, onde os que elixan o Sibarita poderán recibir masaxes, baños relaxantes e, en definitiva, moldear e coidar o seu corpo a través de tratamentos especiais.

O Araguaney nas redes sociais

O Araguaney sempre quixo estar á última en tódolos aspectos, por iso incorporouse ás redes sociais para manter unha relación máis próxima cos seus clientes. Dende a súa páxina de Facebook, o hotel mantén informados aos seus clientes das ofertas, promocións e servizos que xorden diariamente trátase dunha estratexia grazas á que miles de potenciais clientes están coñecendo o hotel e coa que se reduce a distancia entre o establecemento e o consumidor. En Facebook ou Twitter a xente consulta as promocións, preguntan sobre aspectos do hotel, solicitan orzamentos para celebrar eventos ou banquetes e deixan as súas opinións e críticas.

O restaurante Caney do Araguaney ofrece caza e cogomelos na súa carta de tempada

O Caney é un restaurante caracterizado pola súa cociña de fusión de diferentes culturas. Con motivo da tempada de caza e por ser época de cogomelos, a carta inclúe estes días pratos como focaccia de cogomelos e queixo manchego, sartenada de boletus e lepiotas con ovos camperos, perdiz asada con castañas, lombo de cervo con marmelos e puré de mazá.

Santiago – axenda xoves 24 novembro

Xoves 24

11.30 h

No CEIP de Roxos, o concelleiro de Educación, Ángel Currás, e o responsable de institucións de La Caixa, Santiago Picallo, inauguraran as actividades da Cibercaixa para os vindeiros meses.

12.30 h

Na Casa do Concello, ROLDA DE PRENSA do concelleiro de Deportes, Adrián Varela, para presentar a Campaña de Minibásquet Memorial Lorenzo de la Torre. Estará acompañado polo presidente da Federación Galega de Baloncesto, Francisco Martín. A continuación, o concelleiro dará detalles sobre a instalación da pista de xeo do Nadal.

12.45 h

No Hotel San Francisco, o alcalde compostelán, Xerardo Conde Roa, asiste á inauguración do Congreso da Asociación Especializada de Vacunología.

13.00 h

Na explanada do mercado de Salgueiriños, a concelleira de Benestar Social e Muller, Paula Prado, participa no reparto de lazos solidario realizado polo Equipo de Dinamización Social do Urbana Santiago Norte con motivo da celebración do Día Mundial contra a Violencia de Xénero.

14.15 h

No Polígono de Sabón, o alcalde compostelán, Xerardo Conde Roa, asiste ao acto de entrega dos Premios Fernández Latorre.

17.30 h

Pleno ordinario

Na Casa do Concello, sesión ordinaria do Pleno da Corporación coa seguinte orde do día:

1. Aprobación, se procede, de actas de sesións anteriores.

2. Aprobación definitiva da modificación puntual do plan parcial de ordenación do solo urbanizable programado núm. 5 (SUP-5) no ámbito de dotación EU-7. Choupana.

3. Desestimación de recursos de reposición contra acordos plenarios, en materia de incompatibilidades.

4. Proposición do grupo municipal do PSdeG-PSOE relativa á creación da comisión municipal de absentismo escolar.

5. Proposición do grupo municipal do PSdeG-PSOE relativa a non celebración de vodas os sábados polo serán, domingos e festivos.

6. Proposición do grupo municipal do BNG relativa á conexión do Parque de Belvís coa Porta do Camiño mediante o derrubo do edificio que alberga a Casa da Xuventude.

7. Proposición do grupo municipal do PSdeG-PSOE relativa á paralización de obras na Cidade da Cultura.

8. Solicitude de comparencia do grupo municipal do BNG, da concelleira delegada de mercados, Dna. Reyes Leis.

9. Dar conta da designación de representantes do grupo municipal do PSdeG-PSOE nos Consellos municipais.

10. Dar conta de resolucións da Alcaldía, das concellarías delegadas e acordos da Xunta de Goberno Local.

11. Rogos e preguntas.

12. Toma en consideración de mocións presentadas polos grupos municipais.

18.00 h

Na Fundación Novacaixagalicia CSM (Rúa do Vilar), presentación e encontro co público tras a proxección de Outro máis, de Ricardo Llovo.

18.00 h

No Local Sociocultural da A Peregrina, obradoiro Montamos o Belén, no marco do programa Vive o Nadal.

21.00 h

No Auditorio de Galicia, concerto de abono da Real Filharmonía de Galicia dirixida por Manuel Hernández Silva con Johannes Moser, violoncello. [Shostakovig, Dvorák]

Toda a programación de Cineuropa en http://cineuropa.compostelacultura.org

BNG Ordes – petición de arranxo dos accesos a Buscás

O BNG ESIXE AO GOBERNO MUNICIPAL QUE ARREGLE O ACCESO A BUSCÁS DESDE A AC-524

Os nacionalistas presentarán unha moción no Pleno do xoves para que o Concello arregle o acceso a Buscás e inclua o seu custo nas obras da Ronda Leste que deberá pagar a Xunta

O portavoz do BNG de Ordes, Gonzalo Castro, anunciou que o BNG presentará unha moción no Pleno deste xoves para que “o goberno municipal arranxe de inmediato o deplorable estado do acceso á parroquia de Buscás desde a AC-524, que se atopa cheo de fochancas e case non permite a circulación de vehículos”.

A proposta dos nacionalistas, pasa, segundo Castro “porque o Concello acometa o arreglo do principal acceso á parroquia de Buscás, situado no cruce coa AC-524, e despois integre o mesmo no custo das obras da rolda leste que debe pagar a Xunta, ao formar parte este acceso dun tramo da Rolda”.

O portavoz do BNG xustificou esta proposta no feito de que “os veciños e veciñas de Buscás non poden agardar máis para que arranxen este acceso, xa que o mal tempo está a agravar a situación e a imposibilitar o normal acceso dos veciños a unha parroquia que conta con máis de 500 habitantes”.

Gonzalo Castro criticou duramente ao goberno municipal e ao goberno do PP na Xunta aos que culpou de “facerlle pagar aos veciños de Ordes, e en particular aos de Buscás, a súa actitude irresponsable e partidista ao manter paralisada a execución da Rolda Leste, cun contencioso entre Concello e Xunta que xa resulta esperpéntico”.

Para o portavoz nacionalista, a actitude do alcalde e do goberno do PP na Xunta podería resumirse co seguinte dito: “uns polos outros e a casa sen barrer, mais o que resulta inadmisíbel é que quenes pagan as consecuencias desta actitude irresponsábel do alcalde e do goberno do PP na Xunta sexan os veciños e veciñas de Ordes”.

Silleda - ´programa “vacacións en paz”

Chamamento ás familias de Silleda para participar no programa Vacacións en Paz de acollida de nenos e nenas saharauis

-Os interesados en participar poden informarse no departamento de Servizos Sociais

-No mes de febreiro haberá una cea solidaria para recaudar fondos que permitar costear a viaxe dos cativos

Silleda, 22 de novembro de 2011. As familias silledenses interesadas en acoller no verán de 2012 a nenos/as saharauis xa poden informarse sobre o procedemento a seguir a través do departamento municipal de Servizos Sociais. Dende o Concello, e facendose eco tamén da petición dalgúns dos veciños que veñen participando nos últimos anos no programa de Vacacións en Paz quere facese un chamamento á solidaridade entre os silledenses, tendo en conta que o vindeiro verán está previsto que viaxen ata a comarca do Deza máis nenos e nenas dos campamentos de refuxiados que en anos anteriores.

Dende o Concello de Silleda vaise colaborar na medida do posible coa asociación Solidariedade Galega co Pobo Saharaui. Entre as accións a levar a cabo está prevista a organización dunha cea solidaria, coa que se pretenden recaudar fondos para financiar a viaxe en avión dos participantes. A cea celebraríase en febreiro do vindeiro ano.

Melide – estudo da depuradora

A Consellería de Medio Ambiente elaborará un estudio sobre a viabilidade de absorción dos residuos industrias pola actual depuradora

• A Consellería de Medio Ambiente, Territorio e Infraestructuras está a estudar a posibilidade de que os residuos industrais do Polígono industrial da Madanela poidan ser absorvidos pola actual depuradora do Concello de Melide.

• A administración autonómica puxo en coñecemento do Concello de Melide a súa diposición para comezar coa máxima celeridade posible as investigacións co fin de estudar a posibilidade de absorción de residuos ou por outra banda, a construcción dunha depuradora no parque empresarial.

Melide, 22 de novembro de 2011.- A Consellería de Medio Ambiente ao cargo da cal se encontra Agustin Hernández puxo en coñecemento do Concello de Melide a intención de levar a cabo un estudio co fin de avaliar se é posible que os residuos industriais do parque empresarial da Madanela poidan ser absorbidos pola depuradora que actualmente está en uso no Concello de Melide. Para tal fin, solicitarase a colaboración das empresas afincadas na área empresarial para cubrir unha serie de datos e, en función do análese dos mesmos, avaliar a viabilidade ou non de que a actual depuradora sexa a encargada de absorber os residuos, ou pola contra, a necesidade de instalar unha nova depuradora no poligono. A alcaldesa de Melide, Ánxeles Vázquez, en aras de manter a sostibilidade medioambiental e económica a longo prazo a mellor opción- sempre que fose posible- sería a de absorber os residuos pola actual depuradora en aras de manter o servizo no tempo. Asi mesmo, a Consellería traladou á alcaldesa do Concello de Melide que o proceso de informe de estudo xa foi trasladado á Augas de Galicia para comezar no menor prazo posible o seu traballo.

Brión – II plan de igualdade de oportunidades entre homes e mulleres

O CONCELLO DE BRIÓN PRESENTARÁ ESTE VENRES 25-N O II PLAN DE IGUALDADE DE OPORTUNIDADES ENTRE HOMES E MULLERES, QUE TERÁ VIXENCIA DE 2012 A 2015

O grupo brionés Trangalleiro Teatro escenificará catro pequenas obras relacionadas coa igualdade de oportunidades

22 de novembro de 2011. Coincidindo coa conmemoración do Día Internacional contra a Violencia de Xénero, o Concello de Brión vai presentar este venres 25 de novembro o II Plan de Igualdade de Oportunidades entre homes e mulleres do Concello de Brión, que terá vixencia entre 2012 e 2015. Un acto que terá lugar entre as 18:30 e as 19:00 horas no auditorio do centro social polivalente de Pedrouzos (Brión) e que contará coa participación do grupo de teatro afecionado local Trangalleiro Teatro, conformado por nove veciños maiores de 55 anos, que representarán catro breves sketches relacionados coa igualdade de oportunidades.

Todos os que asistan á presentación poderán recoller un exemplar deste II Plan de Igualdade de Oportunidades, un documento que será entregado o vindeiro mes de decembro en todos os fogares de Brión xunto coa revista municipal Altamira, que a partir de agora incluirá tamén artigos informativos sobre igualdade de xénero en todos os seus números.

A concelleira de Servizos Sociais, Patricia Vázquez, explica que este Plan de Igualdade de Oportunidades “recolle a intención de avance, mellora e optimización dos recursos e da experiencia obtidos co plan anterior” e destaca que “para a redacción deste segundo Plan contouse coa colaboración directa dos veciños e veciñas, así como dos principais axentes sociais de Brión, o que garante que se trata dun documento creado por e para a cidadanía”.

Áreas de actuacion

Así, para a elaboración do II Plan de Igualdade de Oportunidades realizouse unha enquisa á poboación das distintas parroquias de Brión, así como entrevistas en profundidade aos principais axentes sociais do municipio (departamentos do Concello, CEIP de Pedrouzos, IES Brión, gardería municipal, centro de saúde, ANPAs “Andaravía” e “Pedra Viada” e asociacións como Pedra do Moucho, Carballeira ou Xuntanza). Deste traballo concluíuse que, desgraciadamente, entre mulleres e homes aínda sobreviven grandes e pequenas desigualdades que afectan a diferentes eidos da vida diaria como, por exemplo, no reparto das tarefas e responsabilidades domésticas, nas dificultades de conciliación, no eido laboral e formativo (con diferencias nas modalidades de traballo e contratación, maior taxa de analfabetismo) e na terrible realidade da violencia de xénero.

Para axudar a reducir estas desigualdades, o Concello de Brión vai levar a cabo unha serie de actuacións encamiñadas a que mulleres e homes vivan e medren en igualdade de oportunidades, fóra dos estereotipos tradicionais de xénero que limitan o desenvolvemento persoal e que relegan, de maneira especial, o papel da muller na vida pública e participativa. Estas actuacións vanse enmarcar durante os próximos catro anos nas seguintes grandes áreas:

1- Información e sensibilización: para promocionar a conciencia de igualdade entre a poboación local

2- Formación e emprego: para fomentar a mellora da formación, e apoiar a inserción sociolaboral e o autoemprego das mulleres de Brión

3- Conciliación e corresponsabilidade: para favorecer a cotrresponsabilidade no fogar e a conciliación da vida familiar, laboral e personal de toda a población.

4- Coeducación: para fomentar a educación en igualdade

5- Benestar social e Asociacionismo: para impulsar o tecido asociativo de Brión, tentando mellorar o nivel de benestar en xeral, e o das mulleres en particular

6- Prevención e eliminación da violencia de xénero: para previr e erradicar a violencia contra as mulleres no Concello de Brión

Trangalleiro teatro

A presentación do vindeiro venres 25 de novembro constitúe xa a primeira actividade de promoción do novo Plan de Igualdade de Brión. Durante o acto, ademais de presentar o manual editado diante dos veciños que asistan, terá lugar unha actuación especial do grupo de teatro afeccionado local Trangalleiro Teatro. Nove veciños e veciñas do municipio, todos eles maiores de 55 anos, porán en escea catro pequenas representacións nas que darán a súa visión sobre a igualdade de xénero.

Así, un dos integrantes lerá un poema que escribiu para a ocasión sobre a igualdade entre homes e mulleres; outro veciño dará lectura a un manifesto contra a mentalidade dos homes machistas; e varios veciños simularán unha entrevista de traballo para escenificar as desigualdades entre homes e mulleres á hora de acceder a un posto de traballo. A actuación rematará coa representación do conto “O maltrato sutil”.

Catro pequenas escenas que terán unha duración aproximada de pouco máis de 15 minutos e que “levan ensaiando durante estas dúas últimas semanas para que se vexa que estamos sensibilizados e poder aportar o noso gran de area na loita contra a desigualdade de xénero”, explica Elisa Iglesia, directora de “Trangalleiro Teatro”. Elisa Iglesias apunta que esta actuación “xurdíu a proposta dos Servizos Sociais de Brión, gustounos e esperamos que así non sexa un acto soso, senón que se converta en algo máis festivo e interactivo”.

Boqueixón – acotos do día internacional para a eliminación da violencia contra as mulleres

Con motivo do 25 de novembro, Día internacional para a eliminación da violencia contra as mulleres, o Concello de Boqueixón pon en marcha unha nova campaña de sensibilización e de apoio ás mulleres vítimas da violencia machista. Con esta iniciativa, o goberno municipal procura concienciar a todas as boqueixanesas e boqueixaneses da importancia de loitar para a erradicación desta lacra social, ao tempo que se faga visible a situación das vítimas.

Baixo o lema “Di non. Denuncia” preténdese, así mesmo, concienciar á cidadanía, en xeral, e ás mulleres vítimas dunha situación de violencia, en particular, da importancia de denunciar os feitos para que o sistema de protección poida exercer a súa función.

Así mesmo e como previa a esta xornada, dende o CIM do Concello de Boqueixón, e conscientes da importancia da educación en igualdade como método de prevención e concienciación das xeneracións máis novas, estiveron a levarse a cabo durante os meses de setembro e outubro un ciclo de obradoiros para escolares do CPI “Antonio Orza Couto”, no Forte. Na programación, ademais do tratamento da violencia de xénero, abordáronse temas sobre socialización de xénero, roles e estereotipos; linguaxe e publicidade sexista e corresponsabilidade doméstica.

Asemade esta semana están a levarse a cabo diversas actividade lúdicas nas Ociotecas do Concello que terán o seu acto final o 25 de novembro coa presentación dos traballos e as actividades realizadas polos mais pequenos durante estas xornadas.

Oroso – concurso de postais de nadal

O CONCELLO DE OROSO CONVOCA O CONCURSO DE POSTAIS DE NADAL CON MENSAXE EN GALEGO

O prazo de presentación de orixinais remata o vindeiro 15 de decembro

22 de novembro de 2011.- O Concello de Oroso vén de convocar o seu tradicional concurso de postais de Nadal, que por segundo ano consecutivo incluirán tamén unha mensaxe de felicitación en lingua galega. Así, o xurado valorará non só a presentación, o esforzo e a orixinalidade da postal, senón tamén o contido da mensaxe e a calidade do galego empregado.

O concurso está aberto a todos os veciños e veciñas de Oroso que desexen participar. O Concello de Oroso establece catro categorías: de 4 a 6 anos, de 7 a 9 anos, de 10 a 13 anos e maiores de 14 anos. Os participantes poden escoller tanto a técnica como os materiais ou o formato da postal, sempre que non exceda dun 21 x 15 cm.

Premio: lote de libros

Aqueles que desexen participar terán que presentar as súas postais no centro cultural Fernando Casas e Novoa antes do 15 de decembro. Canda a postal, os concursantes presentarán un sobre pechado cos seus datos persoais (nome, apelidos, idade e teléfono de contacto).

O premio para o gañador de cada unha das catro categorías será un lote de libros. A entrega dos premios terá lugar xusto antes da recepción aos Reis Magos de Oriente do vindeiro 5 de xaneiro no centro deportivo Juanito Amigo de Sigüeiro.

Auditorio de Galicia – creadoras galegas en cineuropa

C | I | N | E | U | R | O | P | A 2011

Cineuropa pon o foco sobre o traballo das creadoras galegas

· O festival ofrece mañá unha mesa redonda, aberta ao público e gratuíta, na que senlleiras realizadoras galegas exporán o seu punto de vista sobre a produción cinematográfica no noso país

· Hoxe, nova oportunidade de afondar en “La mujer del Eternauta” a través dun Encontro co público, ás 18 horas, no Teatro Principal e estrea absoluta de ‘The Conspirator’ dirixida por Robert Redford

Santiago de Compostela, 22/11/2011.- Dentro das actividades paralelas ao Festival, Cineuropa ofrece mañá, mércores 23 de novembro, a posibilidade de asistir a unha mesa redonda na que destacadas realizadoras galegas de distintas xeracións analizarán o presente e o futuro da produción cinematográfica no noso país. A mesa redonda celebrarase hoxe na sede da Fundación NovaCaixagalicia-CSM (Rúa do Vilar), ás 18 horas. A entrada é aberta e gratuíta ata completar o aforo.

Neste foro participarán as cineastas Margarita Ledo, Sónia Méndez, Olaia Sendón, Adriana Páramo e Silvia Roca. Estará ademais unha persoa asignada pola directora María Reimóndez. A mesa será moderada por Encarna Otero, membro do Consello da Cultura Galega, organismo promotor desta iniciativa.

Posteriormente á Mesa redonda e como complemento a esta, Cineuropa ofrece un programa especial, “Creadoras galegas” a través da súa sección “Panorama Audiovisual Galego”. Así, na mesma sede da Fundación Novacaixagalicia, a partir das 20.00 horas proxectarase “Cienfuegos, 1913” de Margarita Ledo e Belkis Vega; “Gato encerrado” de Peque Varela; “Mulleres da raia” de Diana Gonçalves; “Illa Pedra” de Adriana Páramo Pérez; “As damas negras” de Sonia Méndez; “Os fabulosos irmáns da luz” de Olaia Sendón; “A semente” de María Reimóndez; “Linguas cruzadas” de Mónica Ares e María Yánez; “Cousas do Kulechov” de Susana Rey; e “O mito de Venus” de Cristina Castro, Carmen Costa, Nuria López e Silvia Roca.

Estrea de ‘The Conspirator’ dirixida por Redford e coloquio con ‘La mujer del eternauta’

Doutra banda, hoxe no Teatro Principal, ás 18 horas, o público de Cineuropa poderá gozar dun novo achegamento á cinta de Adán Aliaga, “La mujer del Eternauta” cun coloquio posterior á proxección. É a cuarta longametraxe do director Adán Aliaga. En 2005, o cineasta obtivo un nomeamento da Academia de Cine Europeo polo documental “La casa de mi abuela”, tamén premiado en varios festivais internacionais. No campo da ficción, debutou en 2009 con Estigmas, que se alzou co premio Pilar Miró a Mellor Opera Prima na SEMINICI.

E hoxe tamén Cineuropa ofrece no Principal a estrea absoluta de "The Conspirator", a última película dirixida por Robert Redford. "The Conspirator", reconstrúe o asasinato de Abraham Lincoln e a investigación deste magnicidio. No seu reparto, Robin Wright, Kevin Kline e Tom Wilkinson. Unha oportunidade de ver en primicia o novo filme dun Redford que, como director, deixounos obras da altura de "Quiz Show", "O río da vida" ou "Ordinary People".

Ordes – clausura dos obradoiros “enrolate en igualdade”

Clausurados os obradoiros enmarcados dentro do programa “Enrolarte en Igualdade” do Concello de Ordes

A pasada fin de semana os participantes realizaron unha nova sesión do obradoiro de cociña creativa e unha gymkana de tarefas domésticas para despedir as actividades

Ordes, 22 de novembro de 2011: A pasada fin de semana o Concello de Ordes deu por finalizados os obradoiros enmarcados dentro do programa “Enrolarte en Igualdade” posto en marcha durante o mes de outubro.

Os participantes nesta iniciativa despediron as actividades coa celebración dunha nova sesión do obradoiro de cociña creativa no que realizaron platos de fácil elaboración e baseados nunha alimentación saudable, e por último unha gymkana. En concreto tratouse dunha gymkana moi especial, na que os rapaces e rapazas deberon realizar unha serie de probas por equipos consistentes nalgunhas das tarefas domésticas máis comúns como doblar e tender roupa, colocar unha bombilla, etcétera.

Desta maneira púxose fin a este programa promovido polo Concello de Ordes que tivo como obxectivo concienciar e sensibilizar á mocidade sobre as desigualdades de xénero existentes e fomentar actitudes igualitarias.

Santiago – axenda mércores 23 novembro

Mércores 23

9.00 h

No Hostal dos Reis Católicos, o alcalde compostelán, Xerardo Conde Roa, asiste ao almorzo informativo do “Forum Europa. Tribuna Galicia” no que actuará como ponente o reitor da USC, Juan Casares Long.

11.00 h

Na Casa do Concello, o alcalde compostelán, Xerardo Conde Roa, recibe o físico matemático Roger Penrose, Premio Fonseca 2011. Ás 11.15 h, recepción da Corporación municipal.

11.30 h

Na Casa do Concello, ROLDA DE PRENSA do voceiro do grupo municipal do BNG, Rubén Cela, sobre asuntos de carácter local.

12.00 h

Na Casa do Concello, ROLDA DE PRENSA da concelleira do grupo municipal socialista Marta Álvarez-Santullano sobre asuntos de carácter local.

12.30 h

Na Casa do Concello, ROLDA DE PRENSA dos concelleiros de Familia e Benestar Social, Paula Prado, e de Participación Cidadá e Centros Socioculturais, Francisco Noya, para presentar a programación de Nadal das súas áreas.

13.00 h

Na Casa do Concello, ROLDA DE PRENSA da concelleira de Urbanismo, María Pardo, sobre asuntos da súa área.

18.00 h

Na Fundación NovaCaixagalicia CSM (Rúa do Vilar), Mesa redonda sobre Creadoras Galegas coa participación de Margarita Ledo, Sónia Méndez, Olaia Sendón, Adriana Páramo e Silvia Roca e moderada por Encarna Otero.

19.00 h

No CSCXM do Ensanche, proxección do documental Vidas Sonoras (Fundación Widex Audifonos).

20.00 h

No Auditorio de Novagalicia Banco (Preguntoiro, 23), o alcalde compostelán e presidente do Consorcio de Santiago participa na cerimonia de entrega do IV Premio Fonseca a Roger Penrose.

Toda a programación de Cineuropa en http://cineuropa.compostelacultura.org

Ames – o concello agarda polas propostas dos sindicatos

O GOBERNO DE AMES CONFÍA NO DIÁLOGO COMO MEDIO PARA CHEGAR Á MELLOR OPCIÓN POSIBLE

O GOBERNO ESTÁ Á ESPERA DE PROPOSTAS DOS SINDICATOS UNHA VEZ REMATADA A REUNIÓN DE HOXE

Ames, 21 de novembro de 2011. Esta mañá reuníronse de novo o goberno de Ames e os representantes sindicais para tratar sobre a reorganización de postos de traballo. O goberno manifesta que se produciu un avance e que “os sindicatos solicitaron documentación de índole económica que se lles vai a entregar, algunha no día de hoxe e outra durante estes días”. Unha vez remitida esa información espérase que os sindicatos fagan algunha proposta.

O Goberno de Ames non vai plantexar a súa proposta de reorganización de postos de traballo vía trámite plenario ata que se resolva dentro da Mesa Xeral de Negociación. O Goberno amiense mantense á espera das propostas dos sindicatos e “non se pecha en banda, pero segue considerando como a mellor das opcións a que propuxo”. O feito de non levar a pleno a proposta é un xesto co que o goberno quere amosarse dialogante para “chegar á mellor opción posible”.

O Goberno segue disposto a manter abertas as canles de diálogo para chegar á mellor solución. O alcalde de Ames, Santiago Amor, segue apelando ao sentido común e á responsabilidade e deixa claro que “ a reorganización de servizos municipais non ten nada que ver nin con afrentas sindicais nin directrices de partido”.

Ames – inauguración do mercadillo

inaugurouse o mercado ambulante de Milladoiro

Á inauguración asistiu o alcalde de Ames, Santiago Amor, o concelleiro de Comercio, Promoción Económica, Traballo e Turismo, Bernardo Moar e membros do grupo socialista e asociacións

O mercado conta con 70 postos de gran variedade de produtos e abrirá nos meses de inverno de 16:30 a 19.30, e no verán de 16.30 a 20.30

Ames, 17 de novembro de 2011. Esta tarde ás 16.30 horas inaugurouse o mercado de Milladoiro na Praza Manuel Murguía. Á inauguración asistiriu o alcalde de Ames, Santiago Amor acompañado do concelleiro de Promoción Económica, Comercio, Traballo e Turismo, Bernardo Moar e doutros concelleiros do grupo de goberno. Tamén asistiron membros do grupo municipail socialista así coma asociacións de comerciantes e empresarios do Concello. Segundo explica o concelleiro de Promoción Económica, Bernardo Moar, o novo mercado conta con ofertas e importantes novidades con respecto ao de Bertamiráns; entre as novidades destaca que haberá un polbeiro durante todo o día, tres postos de artesanía, unha adega das Rías Baixas poñerá á venda o seu Albariño, haberá tamén un posto de queixos, un posto de plantas, e sete postos de venda de produtos ecolóxicos (froitas, hortalizas, etc). Tamén contará con dous postos de churros, e os típicos postos de calzado e téxtil. Ofertarase unha zona específica para alimentación e produtos da horta.

No primeiro día do mercado ofrecéronse actividades para nenos. Entre as 16.30 e as 20.00 horas a escola de música Allegro, sita na Rúa Raxoeira ofreceu aos máis cativos o programa “coñece o país da música” a través de xogos, canto, baile, cancións, instrumentos etc. Tamén contaron na Galería de Arte Di Carvalho sita na mesma Praza de Manuel Murguía con actividades que lles permitiron achegarse ao mundo da Arte e facer os seus primeiros bocetos dun cadro. Pensando en tódolos públicos, e non só nos máis cativos, dende as 18.30 ás 19.30 convidouse aos asistentes a un chocolate con churros das dúas churrerías.

O novo mercado do Milladoiro conta cun total de 70 postos pero nace cun claro obxectivo de ampliación para que nun corto prazo se poidan incrementar o número de postos así como a oferta comercial. Está previsto que este mercado abra nos meses de inverno de 16.30 a 19.30, e no verán de 16.30 a 20.30. O concelleiro de Comercio, Promoción Económica, Traballo e turismo, Bernardo Moar, explicou que os comerciantes de Milladoiro e moitos vendedores ambulantes levan anos demandando este mercado e amosouse sorprendido ante a gran expectación e aceptación que está a ter a iniciativa, agora “só espero que a apertura do mercado lle dea un importante impulso á economía do Milladoiro, e que se achegue ata el moita xente cada luns” asegura Moar.

O Pleno celebrado a principios de setembro, correspondente ao mes de agosto, aprobara cos votos do grupo municipal popular e cos do grupo socialista a modificación do Regulamento de venda ambulante do Concello de Ames. Naquel momento o concelleiro Bernardo Moar levara a pleno a proposta de dotar dun novo mercado ao núcleo do Milladoiro e ampliar o de Bertamiráns á Praza da Maía. A iniciativa de Moar contou dende o principio co apoio de comerciantes, asociacións de vendedores ambulantes e da Mesa Local de Comercio.

BNG Oroso – abandono de Porto Avieira

O BNG de Oroso presentou hoxe día 21 de novembro un escrito no Concello de Oroso denunciando a situación de completo abandono que sofre a Urbanización de Porto Avieira.

Esta urbanización, recepcionada polo Concello de Oroso no momento en que este era cogobernado polo BNG xunto ao actual alcalde, sofre desde o actual goberno (PSOE) un total abandono, sendo necesario comezar as seguintes actuacións, todas elas promesas electorais dun PSOE de Oroso, que sempre promete pero poucas veces cumpre:

• Facer un cerre no parque infantil.
• Mellorar o firme e o asfaltado dos viais de acceso a Porto Avieira.
• Acondicionar e asfaltar a pista de deportes.
• Reforzar o alumeado na primeira entrada da urbanización.
• Colocar outra marquesiña na parada do bus.
• Pintar e mellorar a sinalización viaria na urbanización.

O BNG de Oroso esíxelle ao Concello que de inmediato realice, a parte de cumprir as súas promesas, as seguintes accións para que a veciñanza desta Urbanización de Oroso poida vivir nunhas condicións aceptábeis: 

• Amañar as beirarrúas, nomeadamente as da mazá 4.
• Colocar iluminación na rúa dende a estrada da Grabanxa ata a entrada da urbanización.
• Colocar beirarrúas dende esa mesma estrada ata a urbanización.
• Colocar algunha fonte de auga no parque infantil.
• Limpar o parque infantil, na actualidade semella un “reservado” para cans, dado o alto número de excrementos caninos que alí atopan as veciñas e veciños.
• Resituar a parada de autobús, pois agora está diante de varios garaxes, coa situación de risco que isto conleva.

Brión – o grupo de metáis Santa Cecilia da hoxe un concerto didáctico

O GRUPO DE METAIS SANTA CECILIA (FERROL) OFRECE HOXE MARTES UN CONCERTO DIDÁCTICO NA CASA DA CULTURA DE BRIÓN ABERTO A TODOS OS VECIÑOS

21 de novembro de 2011.- O Grupo de Metais Santa Cecilia Cidade de Ferrol ofrecerá mañá martes 22 de novembro, día de Santa Cecía (patroa dos músicos), un concerto didáctico en Brión denominado "Os sons dos instrumentos de vento-metal”. Unha iniciativa que terá lugar ás 20:00 horas na sala de exposicións da Casa da Cultura de Brión. Aínda que está especialmente pensado para os rapaces que estudian ou queren estudiar música, a entrada é libre e gratuita ata completar aforo.

“O concerto terá unha duración aproximada dunha hora con obras especialmente atractivas para o público, cunha variada selección de obras dende o Renacemento ata a música Contemporánea”, explica o director da escola municipal de música Magariños, Carlos Pintor. Este concerto completará dúas semanas de actividades organizadas pola escola municipal de música Magariños e o Concello de Brión dentro da terceira edición das Xornadas Musicais Santa Cecía, que por primeira vez se abriron aos veciños e veciñas de Brión a través deste concerto e dunha conferencia sobre música tradicional galega. Un programa que non esquenceu a súa parte formativa, xa que incluíu un curso de iniciación á percusión.

Grupo de Metais Santa Cecilia

O Grupo de Metais Santa Cecilia Cidade de Ferrol está integrado por cinco músicos de diferentes agrupacións instrumentais e Conservatorios de Galicia. O grupo baséase na formación típica de quinteto de vento metal, isto é dúas trompetas (Miguel Brea Seoane e Roberto Verde Prieto), un trombón (Roberto Rodríguez Fagúndez), una trompa (Miguel Brotóns Pérez) e unha tuba (Raúl Galán Cerveró).

O principal obxectivo deste grupo, fundado no ano 1980, é atopar a través da experiencia as máis variadas posibilidades expresivas dos instrumentos que o forman. O Grupo de Metais Santa Cecilia actuou nas principais cidades de Galicia dentro dos ciclos musicais organizados pola Xunta de Galicia, Diputacións, Universidades, Museo de Pontevedra, Xacobeo e IGAEM. No campo didáctico, desde o ano 1985 realiza Concertos Didácticos baixo o patrocinio da Fundación Caixa Galicica. Ciclo dirixido a alumnos/as de EXB, BUP, FP e Conservatorios.

Para este Grupo compuxeron música entre outros os compositores galegos: Xoán Viaño, Juan Durán, Pulino Pereiro, Miguel Brotóns, Rudesindo Sotelo, etc. Tamén estreou en Galicia a obra de Henry Purcell, “Funeral Music of Queen Mary” xunto ó Coro Universitario de Compostela dirixido por Xoán Viaño. En 1993 participou no Ciclo de Concertos “Música na Cidade”, organizado polo Concello de A Coruña.

Realizou gravacións para a TVG, Radio Nacional en Galicia (Radio 4) e Radio Nacional de España en Madrid (Radio 2). Ten estreado obras de compositores galegos no Ciclo de Concertos organizados pola Asociación Galega de Compositores. Así mesmo realizou un Ciclo de Concertos nas principais cidades de Galicia patrocinado pola Fundación Caixa Galicia cun programa adicado integramente á música de W. A. Mozart con motivo do Bicentenario da súa morte.

Desde 1995 o Grupo de Metais Santa Cecilia participa asiduamente no ciclo de concertos pertencentes á “Semana de Música Sacra” de Ourense. En marzo de 1996, o Grupo de Metais Santa Cecilia estreou no Auditorio de Galicia, a partitura do compositor Tomás Marco, “Detrás de los árboles”, obra de encargo para unha exposición do pintor Rafael Úbeda. No inverno de 1997 realizaron unha xira polas principais cidades de Galicia presentando un concerto de música contemporánea dentro do Ciclo organizado por Caixa Galicia denominado “A música no século XX”.

Desde o ano 1999 ata a actualidade esta agrupación participa na Gala de Entrega de Premios de Teatro María Casares. Así mesmo realizaron concertos didácticos dentro da “Decena da Música” de Ferrol, en colaboración con Fernando Argenta e Araceli González Campa, presentadores do famoso programa “Clásicos Populares”, de Radio Nacional de España e o Conciertazo de TVE. En varias ocasións ten ofrecido concertos para a Universidade de A Coruña, destacando entre outros o concerto de “Música de Compositores Galegos” ofrecido con motivo do día das Letras Galegas en Maio de 1999.

O 28 de Xaneiro de ano 2000 O Grupo de Metais Santa Cecilia ofreceu un concerto na Universidade de A Coruña con motivo do acto de entrega da medalla de ouro da Universidade ó Concello de Ferrol. É Premio da Música Gregorio Baudot 2011 concedido pola Sociedad Artística Ferrolana (SAF).

Teo – visita as obras da piscina climatizada

O ALCALDE DE TEO REALIZA UNHA VISITA ÁS OBRAS DA PISCINA CLIMATIZADA DA RAMALLOSA

· O persoal do Departamento de Urbanismo explicou o avance das obras que comezaron a finais do mes de setembro

· Martiño Noriega estivo acompañado do edil de Urbanismo, Rafael Sisto e do de Servizos Básicos, Xurxo Francos

21 de novembro de 2011. Esta mañá o alcalde de Teo realizou unha visita ás obras da piscina climatizada da Ramallosa, acompañado do edil de Urbanismo, Rafael Sisto, e do concelleiro de Servizos Básicos, Xurxo Francos. Durante a mesma o persoal do Departamento de Urbanismo explicou os pormenores do traballo realizado ata o momento. As obras comezaron a finais do mes de setembro pasado e avanzan a bo ritmo.

O prazo de execución é de só sete meses e trátase dunha infraestructura cun custe superior a 1,6 millóns de euros. Tendo en conta estas circunstancias e que a piscina municipal xa tivo un adxudicatario anterior que non a rematou “a vixiancia permanente dende o Concello faise imprescindible” destaca o rexedor.

Esta mañá os representantes municipais xa puideron ver, ademais do vaso da piscina, que ocupa o gran espazo central da obra, as zonas nas que se instalarán o ximnasio, a entrada, ou a zona na que irán as pistas deportivas. Tamén tiveron ocasión de contemplar o perímetro exterior da obra propiamente dita que deixa liberados diferentes espazos para os que se está estudando un uso acorde coa infraestructura.

A piscina municipal climatizada da Ramallosa conta con dúas prantas de case 2.000 metros cadrados cada unha. A planta do soto é a que albergará os cuartos técnicos así como a zona de instalacións. Ademais da parte máis técnica tamén terá zonas de distribución, ascensor e unha superficie de 400 metros cadrados para pistas deportivas.

A planta baixa é a que alberga o vaso da piscina de 300 metros cadrados ademais dos vestiarios, un ximnasio de 200 metros cadrados e mesmo un patio exterior.

Silleda – doacions de sangue no concello

A unidade móbil do Centro de Trasfusión de Sangue de Galicia visita Silleda o vindeiro martes día 29

Silleda, 21 de novembro de 2011. O municipio de Silleda volve recibir este mes a visita da unidade móbil do Centro de Trasfusión de Sangue de Galicia (CTG). Será o vindeiro martes día 29 de novembro, onde os que desexen facer donacións poden acudir á unidade, que estará no lugar de costume (avenida do Parque) en horario de 10.00 a 14.00 e de 16.30 a 21.00 horas. O Concello e o CTG, amosan o seu agradecemento a todos os veciños que participan cada ano nas campañas de doazón de sangue e permiten deste xeito que moitos enfermos recuperen a súa saúde. O pasado ano 2010 houbo 498 doazóns no concello trasdezán, aínda que é preciso incrementar a participación para que Silleda continúe sendo uns dos concellos mais solidarios de Galicia.

Ames – campaña contra a violencia machista

A Concellería de Muller presenta a campaña “Ser xove non te inmuniza contra a violencia machista”

O Concello de Ames centra este ano a súa campaña contra a violencia machista na sensibilización dos xóvenes

O Concello ten programado para o mércores día 23 de novembro unha charla no IES Ames á que asistirá a Secretaria Xeral de Igualdade, Susana López Abella

O 25 de novembro os tres grupos políticos con representación na corporación amiense lerán un manifesto conxunto en repulsa á violencia de xénero

Ames, 21 de novembro de 2011. A Concellería de Asociacionismo, Igualdade, Muller e Xuventude, pon en marcha a campaña “Ser xove non te inmuniza contra a violencia machista” que se vai dar a coñecer durante esta semana e con motivo do Día Internacional para a eliminación da violencia contra as mulleres do vindeiro 25 de novembro. A concelleira desta área, María González, explica que “este ano a campaña se centra nos máis novos xa que é preciso conciencialos deste problema social”, “a sociedade ten que estar atenta a calquera sinal e denunciar, e máis aínda se as víctimas son menores” engade a concelleira.

O Concello de Ames ten programado para o mércores día 23 de novembro unha charla ás 11.30 no IES Ames na que Alejandro Gómez, un policía nacional do Sindicato Unificado de Policía (SUP) abordará o tema da violencia de xénero presentando o tema da violencia contra as mulleres ós xóvenes con casos prácticos para xerar debate e implicación. A este acto asistirán a Secretaria Xeral de Igualdade, Susana López Abella, o alcalde de Ames, Santiago Amor, e a Concelleira de Asociacionismo, Xuventude, Muller e Igualdade, María González, así como representantes dos distintos grupos municipais.

O Concello de Ames organizou outro acto de cara ao 25 de novembro ás 20.30 na Casa da Cultura de Milladoiro. Trátase dun acto institucional no que se lerá un manifesto conxunto das tres forzas políticas con representación na corporación amiense. A continuación representarase a obra teatral “Ceg@s” que se encadra dentro da V Mostra de Teatro afeccionado do Concello de Ames, representada pola Escola de teatro municipal de Muros.

Dende o Concello maniféstase un rotundo rexeitamento a esta lacra social que supón a violencia machista e xa nos últimos anos se realizaron campañas similares co mesmo fin.

Santiago – axenda martes 22 novembro

Martes 22

11.30 h

Na Casa do Concello, ROLDA DE PRENSA do concelleiro de Mobilidade, Albino Vázquez, sobre asuntos da súa área.

12.00 h

Na Casa do Concello, ROLDA DE PRENSA da concelleira do grupo municipal socialista Mercedes Rosón sobre asuntos de carácter local.

12.30 h

Na Casa do Concello, ROLDA DE PRENSA da concelleira de Economía, Comercio, Turismo e Mercados, Reyes Leis, e o representante da Asociación de Jóvenes Empresarios de A Coruña, Daniel Ramos, para presentar dous cursos destinados a emprendedores e xestores de Pemes.

12.45 h

Na Casa do Concello, ROLDA DE PRENSA da concelleira de Urbanismo, María Pardo, sobre asuntos da súa área.

17.00 h

No CSC do Castiñeiriño, Contacontos interactivo O Camiño de Santiago.

18.30 h.

No Teatro Principal, encontro co público tras a proxección de La mujer del eternauta.

20.30 h.

No CSC do Castiñeiriño, proxección de Os heroes non sempre levan capa dentro de +Curtocircuíto.

Toda a programación de Cineuropa en http://cineuropa.compostelacultura.org

Comite de empresa do concello de Ames – nota despedimentos

Os despedimentos propostos polo goberno de Ames implican tamén a desaparición da web municipal e o peche dunha das sedes da biblioteca

Os recortes en Ames poñen en serio perigo a continuidade da páxina web do Concello, dado que un dos xornalistas despedidos é o único traballador adscrito a este medio de comunicación municipal. Ademais, o desmantelamento do servizo de animación á lectura e o despedimento das súas dúas traballadoras que facían tamén funcións de atención ao público na actividade diaria das bibliotecas e o despedimento, a maiores, do axudante técnico da biblioteca, traerá serias consecuencias nas prestacións que ofrece a biblioteca pública, posto que deixa o cadro de persoal en tan só dous traballadores para cubrir o horario completo das dúas sedes de Bertamiráns e do Milladoiro o que implica o peche dunha das sedes ou unha drástica reducción de horario de apertura. Por outra banda coa eliminación da Brigada de Medio Ambiente mermará considerablemente a atención ao medio, toda vez que os traballadores que cubren estes servizos encárganse da eliminación dos vertedoiros incontrolados, a limpeza das beiras dos ríos e a recollida de animais abandoados, ademais de manter a súa disponibilidade 24 horas ininterrompidas na época de incendios. A desaparición do Servizo de Normalización lingüística implica o cese das actividades de impulso da nosa lingua que se veñen desenvolvendo desde 2004 en colaboración co tecido social, empresarial e educativo do concello, ademais dos programas de promoción da cultura galega que se realizaban desde este servizo. Ao mesmo tempo, o peche da Radio Municipal corta os programas de colaboración que desde o inicio e ata a actualidade mantén a emisora coas asociacións veciñais, a comunidade educativa, e os sectores sociais, culturais e empresariais do Concello.

Ames experimentou un incremento vertixinoso de poboación nos últimos dez anos e pasou de 16.549 habitantes do ano 2000 aos preto de 30.000 que ten na actualidade. Este aumento de poboación requiriu un incremento de servizos prestados á cidadanía. Servizos que agora pretende eliminar o actual goberno municipal.

http://www.concellodeames.org/nova.php?noticia=6746&idioma=gl&sec=32

Páxina web

Cos recortes que propón o goberno municipal teríase que pechar tamén a web municipal, un servizo que leva funcionando dende o ano 2005 e que serve como canle de comunicación entre a Administración local e a cidadanía amesán. www.concellodeames.org ofrece a posibilidade de acceder a documentos administrativos e a unha completa lista de contidos entre os que se contan noticias, avisos de servizo público, convocatorias de axudas, información sobre concursos públicos, previsións informativas e mesmo unha cumprida axenda municipal. Co despedimento do xornalista que xestiona e actualiza diariamente a páxina, e que se inclúe no lote de despedidos da Radio Municipal aínda que está adscrito especificamente á xestión da páxina web, este portal web deixaría de prestar un servizo público ao que todos os cidadáns teñen dereito e coartaríase a liberdade de expresión.

Brigada de Medio Ambiente

Outro dos servizos que pretende suprimir o goberno municipal de Ames é a brigada de garda ambiental que ata o de agora estivo composta por dous peóns ambientais, que serían despedidos, e unha coordinadora, que pasaría ao departamento de obras. Esta brigada ten como obxectivo principal traballar en prol do contorno natural facendo cumprir a normativa vixente. Entre as súas funcións cómpre destacar o control de vertidos, a recollida de animais abandonados, o mantementos das rutas naturais, a colaboración na prevención de incendios, labores de vixilancia, atención de escritos veciñais, a participación en actividades de educación ambiental promovidas pola Aula da Natureza e outros traballos que implican a restauración do equilibrio no medio natural e vixiar o cumprimento da normativa medio ambiental.

Servizo de normalización lingüística

O Concello de Ames puxo en funcionamento en abril de 2004 o Servizo de Normalización Lingüística, que naceu coa idea de ser un elemento dinamizador do uso do galego tanto dentro como fóra do Concello. Os seus obxectivos principais son incrementar o uso e prestixio social da lingua galega, contribuír á completa galeguización da Administración local e mellorar a calidade comunicativa da adminstración. A única traballadora adscrita a este servizo é a presidenta do comité de empresa e está incluída na proposta de despedimentos.

Servizo de animación á lectura e Bibliotecas

Na proposta do Concello elimínase totalmente o persoal de animación á lectura (2 persoas) e 1 posto de axudante de bibliotecas. Desta maneira os dous puntos de atención de Bertamiráns e do Milladoiro pasarán a estar atendidos unicamente por 1 persoa en cada lugar, o que é claramente insuficiente para atender o servizo nun concello destas características. Isto implica o peche dunha das sedes ou unha drástica reducción de horario de apertura.

A Biblioteca de Ames pasou de ser, até o ano 2004, un servizo de “depósito” de libros a converterse, nos anos seguintes, nun servizo punteiro de Bibliotecas. Pasou de ter un servizo atendido por dous auxiliares de bibliotecas, a media xornada (20h. semanais en horario de tarde), un servizo descentralizado, cos fondos sen catalogar e desorganizados, con poucos usuarios e poucos préstamos, sen actividades de animación á lectura, e contando unicamente con libros entre os seus documentos, a ser un servizo de referencia en Galicia na prestación de todos estes servizos.

Durante o 2010 atendeu preto de 40.000 persoas e na actualidade conta con 5.700 socios/as reais, o que representa o 18% da poboación.

Radio Municipal

Desde a súa posta en funcionamento, hai catro anos, a Radio Municipal actuou como canle de expresión da actividade e das necesidade dos distintos sectores da sociedade amesán. Cómpre destacar a súa estreita relación, a través de espazos especificos, coa comunidade educativa e cos sectores sociais, culturais e empresarias do Concello. Concursos de radio para promover o uso da lingua e alertar á mocidade sobre o perigo do consumo de drogas, espazos de divulgación de boas prácticas nutricionais, médicas ou ecolóxicas, atención aos emprendedores e á comunidade inmigrante, a infancia e a poboación maior a través de seccións especificas onde estes sectores eran os protagonistas, ademais dunha información diaria de servizo que atende, como non o pode facer ningún outro medio, desde a proxinidade, perdénse co peche deste medio de comunicación propio que axudou a vertebrar aos distintos sectores da sociedade, a conferir unha identidade singular ao Concello e que foi catalogado, pública e informativamente, como un dos máis veraces e plurais de toda a comunidade autónoma.

O goberno municipal propón a supresión deste servizo sen estudar ningunha outra fórmula de financiamento que permitiría seguir prestando este servizo reducindo considerablemente o seu custo.

Silleda – semana cultural na parroquia de Cira

A parroquia de Cira celebra a súa semana cultural, a máis veterana do concello de Silleda

-A localidade foi pioneira na celebración desta iniciativa, que leva celebrándose durante case tres décadas de forma ininterrumpida

Silleda, 19 de novembro. A parroquia silledense de Cira inicia o vindeiro xoves a súa Semana Cultural. O ciclo abrirase cun concerto do Quinteto de Vento Pentafonía, que actuaría o xoves 24 ás 21.00 horas no local social da localidade. O venres día 25, á mesma hora, terá lugar a actuación do contacontos Celso Fernández Sanmartín, coa sesión titulada Contos que non falten. Xa o sábado día 26, tamén a partir das 21.00 horas, o ciclo rematará cunha cea-baile, que estará amenizada polo dúo Vida. Dende a concellería de Cultura e Participación Cidadá, Matías Rodríguez da Torre lembra que a Semana Cultural de Cira foi pioneira no municipio de Silleda. Este tipo de iniciativas comezou a celebrarse na localidade hai xa tres décadas, convertíndose pois no ciclo cultural parroquial máis veterano en Trasdeza.

Silleda – trámites para o novo centro empresarial

O Concello de Silleda inicia os trámites para a construcción do Centro Empresarial no polígono Área 33

-Haberá unha modificación do plan parcial para dotalo de usos administrativos, hosteleiros e tamén deportivos

-A idea é sacar a concurso o proxecto, obra e explotación dun centro que albergaría aulas de formación, un espazo para o empresariado, viveiro de empresas e restaurante cafetería

Silleda, 19 de novembro de 2011. O goberno local de Silleda iniciará nos vindeiros días os trámites precisos, a nivel urbanístico, para dotar ao polígono Área 33 dun centro empresarial, como se vén demandando dende o sector nos últimos anos. A tramitación comezará a vindeira semana na xunta de goberno local, cunha modificación puntual do plan parcial que rixe esta zona. O cambio en cuestión pasa por ampliar os usos do parque empresarial Área 33, posibilitando os usos hosteleiros, administrativos e tamén deportivos. O obxectivo é facilitar a construcción dun Centro Empresarial nos terreos que lle corresponden ao Concello de Silleda no parque empresarial.

“Neste momento de dificultades económicas, tratamos de buscar as vías urbanísticas e legais que nos permitan ter unha salida para esta actuación con capital privado”, sinala a alcaldesa e responsable de Urbanismo, Paula Fernández Pena. Así, e utilizando a figura de cesión de dereito de superficie, o Concello, sacaría a concurso o proxecto, construcción e explotación do futuro centro empresarial. Segundo as primeiras estimacións, na planta baixa situaríase un restaurante-cafetería, e na primeira estaría o espazo destinado ao sector empresarial así como aulas de formación e outros servizos coma un viveiro de empresas.

A cesión de dereito de superficie, permitirá a construcción do centro por parte das persoas ou empresas interesadas en concursar na mesma, que terán o dereito de explotar a cafetería e o restaurante durante un periodo de 75 anos, mentras que a planta primeira de servizos será do Concello para “desenvolver actividades vinculadas ao sector empresarial e sobre todo, apara potenciar aos emprendedores e a formación de desempregados”.

Con esta actuación o departamento de Urbanismo en colaboración coa Concellería de Industria e Comercio, que dirixe Klaus Brey, daría cumprimento á unha das demandas do sector, ademais de dotar de máis servizos ao parque empresarial silledense.

No tocante aos usos deportivos, éstes tamén se inclúen na modificación do plan parcial “porque non descartamos construir a piscina climatizada, outra das grandes demandas deste municipio, no parque empresarial Área 33”, engade Paula Fernández Pena.

Naves adosadas e convenio con Xestur

Ademais da ampliación de usos do polígono, a modificación tamén se aproveitará para dar resposta a outra das demandas que veñen formulando os empresarios asentados no recinto silledense: a posibilidade de adosar naves. Aínda que na primeira fase de Área 33 estaba permitido se existía acordo previo, esta posibilidade quedou fóra coa segunda fase de ampliación. Agora aproveitararse o cambio urbanístico para posibilitar de novo o adosamento, pero sempre sen implicar aumentos na edificabilidade nin na ocupación máxima da parcela.

Cómpre lembrar que no ano 2008 firmouse o convenio con Xestur polo que o Concello de Silleda recibía os terreos que lle correspondían das cesións do plan parcial. “Agora queremos rexistrar estas propiedades municipais, algo que non fixo o anterior goberno non adscrito”, sinala a alcaldesa, apuntando que dentro deses terreos algúns figuran con aproveitamento lucrativo.

Aínda que por tratarse dunha modificación de escasa entidade o expediente non precisa pasar polo Pleno, a alcaldesa e responsable de Urbanismo deu conta ao resto dos grupos destes trámites, nas comisións informativas celebradas o pasado xoves.“Entendemos que se abre unha posibilidade de futuro para o empresariado con este procedemento e gustaríanos que tivera o respaldo de toda a Corporación poir iso decidín facelos a todos partícipes”, sinala.

Unha vez aprobada na xunta de goberno local, a modificación puntual do plan parcial de Área 33 será remitida á Xunta de Galicia, para determinar se precisa ou non de avaliación ambiental.

O proceso para contar co centro empresarial e outros detalles dos cambios urbanísticos serán expostos aos empresarios na vindeira xunta da entidade de conservación do polígono silledense.

Ames – almorzo na aula da natureza

O Concello ofrece un almorzo e un obradoiro para aprender a facer marmelada na Aula da Natureza

Arredor de 20 persoas asisitiron a esta actividade na que a receita da marmelada de mandarina foi un éxito

Ames, 19 de novembro de 2011. A concellería de Medio Ambiente, Desenvolvemento Sostible e Sanidade organizou para hoxe un almorzo de chocolate con churros e un obradoiro para aprender a facer marmelada na Aula da Natureza. Ademais unha técnico guiou tanto a nenos coma maiores pola exposición “O noso mundo, o noso futuro, a nosa opción”, que acolle a Aula ata o vindeiro 29 de novembro. Dentro das actividades previstas fíxose tamén a carreira “Pedalea a favor do clima” que consiste en que todos os que o desexen suban nunha bicicleta estática e pedaleen, de xeito que ao final o grupo de arredor de 20 persoas entre nenos e maiores, puido saber o aforro en emisión de gases de efecto invernadoiro que se produce indo en bicicleta en comparación con outro tipo de transporte. As actividades, que foron totalmente gratuitas, fixéronse na Aula da Natureza da Ameixenda este sábado de 10.30 a 13.30 horas.

A receita da marmelada de mandarina resultou un éxito e moitas nais e pais tomaron boa nota deste obradoiro. Do mesmo xeito, tanto maiores coma nenos gozaron dun chocolate con churros á media mañá que lles permitiu repoñer forzas antes de pedalear na bicicleta e de atender ás explicacións da técnico sobre a exposición que reflexa a situación do cambio climático.

A técnico do Concello explicou distintos aspectos relacionados co cambio climático que se reflexan na exposición "O noso mundo, o noso futuro, a nosa opción". Esta exposición está baseada no proxecto CLARITY -Acción Educativa polo Clima- que pretende contribuír ao coñecemento do fenómeno do cambio climático, as súas causas e as respostas que se están propoñendo para facerlle fronte.

Moitas actividades que realizamos na nosa vida cotiá provocan, directa ou indirectamente, emisións de gases efecto invernadoiro, e polo tanto contribúen a un dos principais problemas ambientais deste século: o cambio climático. A subida do nivel do mar, as vagas de calor, tormentas, inundacións... son algunhas das consecuencias que previsiblemente provocará a aceleración do cambio climático. Nas nosas mans está impedir que isto aconteza, pero é preciso que todos os sectores sociais se involucren na loita contra este fenómeno global. Tamén cabe dicir que a temática do cambio climático é complexa, e como consecuencia hai unha gran confusión sobre el por parte da cidadanía. Con esta exposición preténdese dar a coñecer aos amienses o problema ambiental do cambio climático, informando sobre as súas causas e consecuencias a nivel global e tamén en Galicia.

A Concellería de Medio Ambiente trae esta exposición a Ames para potenciar a difusión da realidade do cambio climático e as súas consecuencias a curto, medio e longo prazo e para dar a coñecer as medidas que cada quen individualmente pode adoptar para contribuír na desaceleración do mesmo. A exposición consta de 19 paneis que tratan de xeito amplo distintos aspectos do tema do cambio climático, tamén ten unha proxección audiovisual e módulos interactivos nos que por exemplo se pode calcular cantas emisións se evitan collendo a bicicleta en lugar do coche.

A exposición intenta estimular a participación e reflexión dos visitantes propoñendo novos comportamentos comprometidos e accións positivas co clima que loiten contra o cambio climático e fomenten un desenvolvemento máis equilibrado, social e ambientalmente.

As consecuencias da aceleración do cambio climático poden provocar importantes custos ambientais, sociais e económicos que condicionarán o noso desenvolvemento. De non concienciar á cidadanía para que contribúa con boas prácticas á desaceleración do cambio, este pódese converter nunha ameaza para a supervivencia dos seres vivos.

Brión – conferencia sobre música tradicional galega impartida por Pablo Carpintero

PABLO CARPINTERO ARIAS OFRECE ESTE LUNS EN BRIÓN UNHA CONFERENCIA SOBRE A MÚSICA TRADICIONAL GALEGA NOS SÉCULOS XIX E XX

19 de novembro de 2011.- Pablo Carpintero Arias, un dos máis prestixiosos representantes da música tradicional galega, ofrecerá este luns 21 de novembro en Brión a conferencia "A música tradicional galega nos séculos XIX e XX". A cita é ás 20:00 horas na Aula 6 da Escola Municipal de Música Magariños (Pedrouzos-Brión). A entrada é libre e gratuita ata completar aforo.

Unha conferencia organizada dentro da terceira edición das Xornadas Musicais Santa Cecía, preparadas pola escola municipal de música Magariños e o Concello de Brión para homenaxear á patroa da música. O director da escola municipal de música Magariños, Carlos Pintor, explica que “Pablo Carpintero Arias vén realizando unha intensa labor encamiñada a recoller información de primeira man sobre a música de tradición e os instrumentos musicais que emprega. Este traballo levouno á gravación do disco "Os sons esquecidos".

Currículum

Pablo Carpintero Arias estudiou a carreira de Bioloxía en Santiago de Compostela. Dende 1992 é doutor en Ciencias pola USC e actualmente traballa coma investigador no Instituto de Ortopedia e Baco de Texidos e Músculoesqueléticos desta institución. Dende 2003 é profesor de Bioquímica na USC.

Comenzou a tocar a “gaita de fol” aos oitos anos e con dezaoito fundou a Banda de Gaitas da Asociación Cultural Val do Asma de Chantada e o grupo “Folerpas de Chantada”. Anos despois ingresou na agrupación “Cantigas e Agarimos” e en 1992, xunto con outros compañeiros, a agrupación “Obradoiro de Cultural Tradicional “Ultreia” de Santiago de Compostela. Actulamente está preparando un segundo doutorado no Departamento de Historia da Arte de Facultade de Historia, que versará sobre a “gaita fol” en Galicia. En 1999 formou un grupo de requinteiros (integrado por dúas gaitas, dúas requintas, tambor e bombo) con que editou “A Requinta de Xián” (2003).

Exerce coma profesor de “gaita fol” en diversas asociación e escolaras. Dende 2003 colabora no programa da Radio Galega “Lumen a Palleira”, levando a cabo unha selección especialmente adicada á música tradicional galega. Ao longo do ano 2004 participou no programa matinal Xusto Carril realizando unha selección adicada ao canto tradicional. No 205 entrou a formar parte da directiva da Asociación Gaiteros Galegos, onde desenvolveu un proxecto de posta en valor e difusión no noso folclore musical.

Entre as súas obras cabe reseñar “Os sons esquencidos” despois dunha longa investigación recollendo información sobre a música de tradición e os instrumentos musicais. No ano 2005 comenzou unha colaboración co grupo de música barroca “Resonet” dirixido por Fernando Reyes e que fructificou na grabación dun disco basado nos relatos dun peregrino italiano a Santiago de Compostela no século XVIII.