Santiago - Modificacións no tráfico por mor das obras na rúa Montero Ríos

A partir do luns día 18 de xaneiro darán comezo as obras de humanización da rúa Montero Ríos, que consistirán na renovación de viais e beirarrúas, xunto coa substitución total da rede de saneamento e parte do abastecemento de auga.

As obras darán comezo nunha primeira fase coa colocación do primeiro tramo do novo colector, que afectará ao cruce formado polas rúas Montero Ríos, Rapa da Folla e rúa Nova de Abaixo, cunha duración de 15 días.

Esta primeira fase só afectará á circulación para aqueles vehículos que suban pola rúa Nova de Abaixo, que ao chegar a dito cruce terán que xirar á esquerda obrigatoriamente para saír á rúa Rosalía de Castro. Os vehículos que baixen pola Rapa da Folla poderán seguir facendo o xiro a esquerda ou dereita, tal e como fan ata o de agora.

A seguinte fase, unha vez acabada esta, afectará ao tramo comprendido entre o citado cruce e a rúa Rosalía de Castro.

Corte de tráfico na rúa de García-Sabell

Tamén dende mañá luns e ata o mércores 20 de xaneiro, permanecerá cortada ao tráfico a rúa de García-Sabell, con motivo das obras de acometida de auga necesarias para o novo Centro de Atención ao Peregrino da rúa Carretas. Só poderán acceder a esta rúa os residentes para entrar e saír dos seus garaxes.

O Concello de Santiago de Compostela prega aos cidadáns desculpen as molestias que estas alteracións no tráfico lles poidan ocasionar.

Ningún comentario: