Touro - As crecidas derruban unha ponte sobre o río Beseño

As crecidas dos ríos dos últimos días acabaron por derrubar unha ponte na estrada que une Castelo, na parroquia de Andeade, con Santiso, en Cornado, no Concello de Touro. Actualmente o paso está cortado e non poden circular por esa vía ningún tipo de vehículo e tampouco poden pasar veciños e pé. A ponte, sobre o río Beseño, xa presentaba algunha deficiencia nas últimas semanas e estes días o efecto da crecida das augas provocou un amplo buraco no centro da estrada sobre a que sustenta a ponte. 

Esta vía de titularidade municipal e de moita circulación tanto de turismos, como de vehículos agrícolas e de camións que atenden as explotacións gandeiras da zona. Comunica as parroquias de Santiso e Calvos con Fonte Díaz, capital do Concello e é a estrada para que esta parte do Concello de Touro acceda a outras vías de comunicación, ainda que o alcalde de Touro, Ignacio Codesido, indica que os veciños poden utilizar estradas alternativas. O Concello, ante o perigo e risco que supón, procedeu ao corte da estrada para vehículos e persoas coa conseguinte sinalización.

O Concello confía en reparar a ponte nun breve prazo de tempo para que poida ser utilizada e cause poucos contratempos ás explotacións gandeiras e agrícolas desta zona. O Concello de Touro xa tramitou ante Augas de Galicia o permiso para ter a ‘luz verde’ para rehabilitar a ponte. 

O alcalde confía en recibir a autorización nos próximos días. Ignacio Codesido tamén solicita, unha vez tenha o ‘visto bo’ de Augas de Galicia, a axilización dunha partida da Deputación para reparar esta ponte e en consecuencia abrir o paso á circulación de vehículos desta vía. O Concello de Touro xa tiña previsto e aprobada esta partida de cartos procedente da Deputación para arranxar esta ponte e esta vía. Agora solicita a axilización para a disposición deste presuposto xa autorizado ante a urxencia de abrir a estrada á circulación.

Ningún comentario: