Frades - O Concello corta dúas novas pistas polas escorrentías

As fortes e continuas chuvias desta semana obrigaron ao Concello de Frades a cortar hoxe dúas novas pistas municipais, que se suman ás xa cortadas o pasado 8 de xaneiro pola caída de dúas pontes. Nesta ocasión os danos son de moita menor cuantía económica, se ben por razóns de seguridade o Concello de Frades optou por cortar as carreteras de Reboredo (Galegos) a Os Carballos (DP-3802 Ordes-Ponte Carreira) e a de Caboladrón (Mesos) a A Gándara (Abellá). En ambos casos, o corte de tráfico xustifícase nas escorrentías de terras producidas polas chuvias de onte xoves que deixaron varios buratos en parte desas pistas.

O alcalde de Frades, Roberto Rey, explica que “as brigadas municipais están a traballar arreo por todo o municipio e, unha vez sinalizado convintemente as zonas, xa estamos traballando para habilitar a financiación precisa para solucionar canto antes estes problemas”, polo que pediu desculpas aos veciños e veciñas do municipio polas molestias que estas interrupcións do tráfico poidan ocasionarlles.

Cómpre lembrar que dende o pasado 8 de xaneiro permanecen pechadas ao tráfico dúas pistas pola caída de dúas pontes: Ponte Raselo, emprazada na pista que une a localidade de Raselo (parroquia de Gafoi) coa parroquia de Vitre; e Ponte de Xeza, que comunica as localidades de Reboredo (Galegos) con A Gándara (Abellá).

Ningún comentario: