AMPLIADO ATA O 3 DE MAIO O PRAZO DE INSCRICIÓN NO CURSO
DE MONITOR DE TEMPO LIBRE DO CONCELLO DE OROSO, DE 350 HORAS LECTIVAS
24 de abril de 2012.- O Concello de Oroso vén de ampliar ata
o vindeiro 3 de maio o prazo de inscrición no curso de monitor de tempo libre,
que o Concello orosán organiza en colaboración coa Escola de Tempo Libre
Keltia. Un curso de 350 horas lectivas, 200 teóricas e 150 de prácticas
laborais, que se impartirá todos os sábados e domingos dos vindeiros meses no
centro cultural de Sigüeiro e que dá acceso a un sector con moita demanda de
emprego, tanto en empresas como en administracións públicas.
O Concello de Oroso convoca un total de 25 prazas, que se cubrirán por orde
de inscrición. Aínda que terán preferencia os veciños e veciñas empadroados en
Oroso, o curso está aberto a veciños de toda a comarca ordense. Os únicos
requisitos precisos para participar son ter máis de 18 anos e dispoñer do
graduado escolar ou equivalente (4º da ESO).
As clases terán lugar os sábados (de 9:00 a 14:00 horas e de 15:30 a 20:30
horas) e os domingos (de 9:00 a 14:00 horas). A cuota de inscición é de 250
euros, que poderá aboarse en dous prazos. As inscricións formalizaranse no
centro cultural Fernando Casas e Novoa de Sigüeiro, no teléfono 981 69 09 03 ou
na web www.concellooroso.com.
Características do curso
Este curso de monitor de tempo libre será impartido por profesionais da
Escola de Tempo Libre Keltia. As 200 horas lectivas teóricas impartiranse no
centro cultural de Sigüeiro. Unhas sesións cunha metodoloxía eminentemente
práctica na que monitores especializados tratarán distintas áreas formativas,
entre as que destaca a área de animación onde os aprenderán técnicas de
animación para a terceira idade, obradoiros de expresión musical, animación á
lectura, xogos e, incluso, a organizar xornadas de teatro ou veladas con
grandes xogos.
A maiores, os alumnos recibirán formación en áreas como psicoloxía,
educación ambiental, expresión plástica e educación para a saúde, facendo
fincapé en temas como drogodependencias, sexualidade ou primeiros auxilios.
Finalmente, os participantes tamén recibirán unha formación en temas de
organización, programación e lexislación.
Unha vez rematadas esas 200 horas teórico-prácticas, os alumnos deberán
acometer outras 150 horas de práctica laboral. Unha vez conseguido o título, os
alumnos terán acceso a un sector que nos últimos anos está a experimentar un
gran crecemento e que demanda profesionais preparados.
Ningún comentario:
Publicar un comentario