Santiago - Programa de Cineuropa do xoves 12









Este xoves estrearase Virgin Mountain, un traballo de Dagur Kári avalado polos seus tres galardóns no Festival de Tribeca nas categorías de mellor película, actor e guión, e cuxo actor principal, Gunnar Jónsson, tamén foi premiado na Seminci de Valladolid, polo seu papel de xigantón entrañable. Virgin Mountain é a historia de Fúsi, un neno grande e inadaptado nun mundo onde non é socialmente aceptable conservar a inocencia infantil con máis de 40 anos. Dagur Kári aposta polo humor e a tenrura para obrigarnos a empatizar co personaxe de tal forma que pasamos hora e media entre sorrisos e bágoas. Proxectarase ás 20:00 h no Teatro Principal.

Ademais, o outro plato forte do día é a colaboración xa habitual da Real Filharmonía de Galicia con Cineuropa. Ás 21.00 h no Auditorio de Galicia, a orquestra poñerálle música a ‘A woman of affairs’ (‘A muller lixeira’) de Clarence Brown, con Greta Garbo e John Gilbert e música de Carl Davis. Estarán dirixidos por Diego Masson e previamente, ás 20.15 h, teremos un Conversando con… Ángel Luis Hueso e José Luis Losa tamén no propio Auditorio de Galicia.

Ás 20:00 h pero no Salón Teatro estrearase The Lesson (Urok), ópera prima de Kristina Grozeva e Petar Valchanov, candidata ao Premio LUX desta edición e Premio Novos Realizadores en San Sebastián. É outra película centrada nun único personaxe, neste caso Nadezhda, unha profesora que dá leccións de ética aos seus alumnos pero que por certas circunstancias verase obrigada a cometer actos de dubidosa moralidade. A película achégase ao realismo característico do cinema social europeo co uso da cámara en man e a ausencia de banda sonora.

A continuación, ás 22:00 h no Salón Teatro, proxectarase She's funny that way, unha continuación natural do ciclo da pasada edición, Cando Tiburón devorou o cine: ascenso e caída do Novo Hollywood, un final feliz en forma de comedia coral clásica ao máis puro estilo Lubitsch que xa abordara (e bordara) en ¿Que me pasa, doctor? o seu director, o cineasta Peter Bogdanovich.

Esta xornada tamén se poderá asistir aos segundos pases de Slow West de John Maclean (Teatro Principal ás 21:45 h), The misplaced world de Margarethe von Trotta (Salón Teatro ás 18:15 h) e Cop Car de Jon Watts (Salón Teatro ás 23:45 h). E proxectaranse por última vez Listen Up Philip, de Alex Ross Perry (Teatro Principal ás 18:00 h), e Son of Saul, de László Nemes (ás 23:15 h tamén no Principal).

A programación do día completarase con outras películas das seccións Filmadas en 1965, Ciclo Amos Kollek, Docs Music e Roxos e Marcianos: a caza de Bruxas en Hollywood proxectadas no Teatro Principal, Salón Teatro, CGAC e sede Afundación. Todas as películas destas seccións son de entrada libre até completar capacidade.


PROGRAMA COMPLETO XOVES 12

TEATRO PRINCIPAL
16:15 LÁSKY JEDNÉ PLAVOVLÁSKY (OS AMORES DUNHA LOIRA) Milos Forman
18:00 LISTEN UP PHILIP Alex Ross Perry
20:00 VIRGIN MOUNTAIN Dagur Kári
21:45 SLOW WEST John Maclean
23:15 SON OF SAUL László Nemes
01:00 YOYO Pierre Étaix

SALÓN TEATRO
16:30 SUE (SUE, PERDIDA EN MANHATTAN) Amos Kollek
18:15 THE MISPLACED WORLD Margarethe von Trotta
20:00 THE LESSON (UROK) Kristina Grozeva, Petar Valchanov
22:00 SHE’S FUNNY THAT WAY Peter Bogdanovich
23:45 COP CAR Jon Watts

CGAC
16:30 RESPECT YOURSELF, THE STAX RECORDS STORY Robert Gordon y Morgan Neville
18:30 THE WHIP HAND (A MAN NA SOMBRA) William Cameron Menzies
20:00 THE THIEF (O ESPÍA) Russell Rouse
21:30 FOREVER LULU Amos Kollek
23:00 RAY CHARLES, THE GENIUS OF SOUL Yvonne Smith

SEDE AFUNDACIÓN
16:30 THE RED HOUSE (A CASA VERMELLA) Delmer Daves
18:15 THE NAKED CITY (A CIDADE ESPIDA) Jules Dassin
19:55 DESTINATION TOKYO (DESTINO TOKIO) Delmer Daves

AUDITORIO DE GALICIA
20.15 h Conversando con… Ángel Luis Hueso e José Luis Losa

21.00 h Concerto da Real Filharmonía de Galicia

Ningún comentario: