Brión - Novo servizo de recollida de aparellos eléctricos e electrónicos

O Concello de Brión pon en marcha un servizo municipal de recollida de aparellos eléctricos ou electrónicos (electrodomésticos, equipos informáticos, ferramentas eléctricas...), que xa non son recollidos pola Mancomunidade Serra do Barbanza. “Inicialmente, o servizo terá carácter mensual e os interesados deberán solicitalo no Concello chamando ao teléfono 981 887 006 a fin de organizar a recollida dos residuos”, explica Iolanda Bouzas, primeira tenente de alcalde.

Cando se trate de outro tipo de enseres, os veciños e veciñas deberán seguir comunicándose co servizo de recollida do lixo da Mancomunidade Serra do Barbanza, a través do teléfono 981 19 12 40. Un servizo que se realiza dúas veces ao mes. O Concello de Brión vén de emitir un bando municipal no que informa aos veciños deste cambio e lles lembra que está prohibido o depósito inxustificado de residuos xunto aos colectores de lixo ou en lugares non habilitados para este fin.

Neste sentido, o Concello de Brión fai un chamamento á responsabilidade dos veciños e na necesidade de coidar o extraordinario medio natural do municipio. Ademais, lembra que en caso de incumprimento, o Concello de Brión verase obrigado a adoptar as medidas pertinentes, que no seu caso inclúen a imposición das sancións que procedan.

Ningún comentario: