Arzua - Mesa redonda sobre o sextor lácteo dentro da Feira Ecolóxica

A XII Feira Ecolóxica, organizada polo Concello de Arzúa e xestionada por Culturactiva SCG, converterá Arzúa un ano máis no gran escaparate galego do sector verde.Como vén sendo habitual, a Feira Ecolóxica toma o pulso á actualidade medioambiental e agrogandeira e neste caso faino a través dunha mesa redonda sobre a problemática do sector lácteo galegoo domingo 15 ás 12:00 horasna aula 3 (Primeiro Andar) do Recinto Feiral Terra do Queixo. 

Esta mesa estará moderada pola concelleira de Medioambiente do Concello de Arzúa, Pilar Castro, e contará coa presenza do experto en xestión agrogandeira e natureza, Xan Pouliquen, o produtor lácteo, Jesús G. Pereira, e o coordinador do Sindicato Labrego Galego nas comarcas de Arzúa e Melide, Xulio Fernández. Desta maneira abordarase dende diferentes perspectivas a situación dun dos sectores clave da economía galega, que vén de vivir nos últimos meses unha gran mobilización dos produtores para reclamar unhas condicións xustas na comercialización do leite.En total, a Feira Ecolóxica ten programadas máis de vinte actividades paralelas que servirán para completar esta duodécima edición como obradoiros, mostras, conferencias e actuacións teatrais. 

O encontro referencial para o sector verde de Galicia contará con 60 expositores e expositoras de produción ecolóxica, terapias alternativas, entidades de traballo cooperativo e artesanía sustentable. As novidades ecolóxicas van dende seis variedades de pan ecolóxico, leite e licores ata sementes e infusións; tamén haberá postos de porco celta e produtos derivados. Do mesmo xeito, tampouco faltarán fabricantes de aceite ecolóxico, produtos de horta, cosmética natural ou mel ecolóxico. As terapias alternativas e as plantas aromáticas estarán presentes tamén, ademais dun espazo adicado entidades de traballo cooperativo e outro a oficios artesáns. Todos e cada un deles forman parte do sector verde e comparten un novo xeito de entender o vínculo entre produción e sustentabilidade, concepción que non parou de medrar e asentarse na nosa sociedade nos últimos anos.

Con esta nova edición, a Feira Ecolóxica de Arzúa afonda na súa consolidación como referente do respecto pola contorna e dunha vida en sintonía con ela, ademais de erixirse como o principal punto de encontro de produtores, consumidores, distribuidores, artesáns e público do sector verde. 

A Feira Ecolóxica asentouse en Arzúa no ano 2004 e, dende aquela, non abandonou a localidade coruñesa pola acollida que lle brindaron os veciños, a idoneidade do recinto ofrecido, o apoio do sector e a colaboración permanente do Concello. Malia un contexto económico adverso, o proxecto non esmoreceu e mantivo sempre o seu compromiso pola ecoloxía, a produción natural e a innovación.

Ningún comentario: