TORDOIA - TDT


TORDOIA INSTALARÁ DÚAS NOVAS ANTENAS DE TDT PARA MELLORAR A COBERTURA DO MUNICIPIO

Antonio Pereiro mantivo unha xuntanza co secretario xeral de Medios para trasladarlle os problemas de recepción do sinal dixital


4 de marzo 2011.- O Concello de Tordoia instalará dous novos reemisores de TDT para paliar os problemas de cobertura do sinal dixital que sofre este municipio. Esta foi unha das principais conclusións que o Alcalde de Tordoia, Antonio Pereiro, obtivo trala xuntanza que mantivo hoxe co secretario xeral para as Relacións cos Medios, Alfonso Cabaleiro, e co subdirector de Telecomunicacións, Ignacio Otero.

O rexedor tordoiés mantivo este encontro cos responsables autonómicos, aos que lles trasladou a necesidade de instalar novos reemisores que cubriran as zonas de sombra que se detectaron neste municipio. Tras un estudio pormenorizado, Xunta e Concello acordaron a instalación de dúas antenas de TDT que se ubicarán no lugar de Fares, na parroquia de Viladabade e que dará cobertura a esta parroquia e a de Tordoia; e outra no lugar de Portociños, en Gorgullos, e que dará cobertura a esta parroquia e a veciña de Numide. A instalación dos equipamentos correrá a conta da Xunta de Galicia mentres que o mantemento e o subministro eléctrico das casetas será responsabilidade do Concello. A mellora da cobertura beneficiará a uns 900 veciños das catro parroquias.

Segundo explicou Antonio Pereiro, “estamos moi satisfeitos do resultado da xuntanza, posto que vimos unha grande sensibilidade por parte do secretario xeral de cara a poñer as medidas necesarias para que toda a poboación poida acceder á TDT posto que o obxectivo é que o 100% da poboación poida acceder a esta tecnoloxía”. Neste sentido, Pereiro Liñares explicou que na xuntanza tamén se abordou a posibilidade de que aquelas vivendas que queden ailladas ou en sombra poidan acceder a instalación dos receptores vía satélite. A intalación destes receptores ten que ser aprobada pola Xunta de Galicia tras facer unha análise por parte dos técnicos sobre as posibilidades de recepción.

Ningún comentario: