![]() |
O BNG de Ames esixe ao goberno local que constitúa canto antes a Mesa Local de Comercio
Ames (08.03.11) O BNG de Ames ven de presentar un escrito dirixido á
concelleira de desenvolvemento económico solicitando que se “constitúa canto
antes a Mesa Local de Comercio”, tal e como sinala a Lei de Comercio Interior
de Galicia aprobada en decembro de 2010.
En dita lei sinálase que este órgano deberá existir en cada concello e “actuará
como órgano colexiado de participación, coordinación, cooperación e colaboración
entre a Administración local e os axentes representativos do sector comercial”.
Neste senso, a concelleira do BNG de Ames, Olalla Alvite, lembra que “é ao
concello a quen lle corresponde a convocatoria da Mesa Local de Comercio e “as
asociacións de comerciantes están á espera”.
Olalla Alvite sinala que “é imprescindible a convocatoria da Mesa para que
as asociacións poidan por en marcha as iniciativas que teñen na súa axenda,
como por exemplo, a Expoliquidación”, ao tempo que afirma que “non nos vale de
excusa que a Mesa non se ten constituido aínda porque houbo cambios nas
directivas das asociacións de comerciantes, posto que a designación pode ser
por cargo de presidencia independentemente de que cambie a persoa”.

Ningún comentario:
Publicar un comentario