FRADES - HOMENAXE


O CONCELLO DE FRADES NOMEARÁ ESTE LUNS A JOSÉ MARÍA BOTANA LÓPEZ COMO FILLO PREDILECTO DE FRADES E DEDICARALLE O EDIFICIO MULTIUSOS

O acto comezará ás 17:30 horas e estará presidido por Alberto Núñez Feijoo, presidente da Xunta de Galicia

4 de marzo de 2011.- O Concello de Frades realizará este luns, 7 de marzo, unha homenaxe a un dos veciños máis ilustres do municipio: José María Botana López. Unha homenaxe que inclúe o nomeamento de Botana López como Fillo Predilecto de Frades e que o edificio multiusos de Cimadevila, a súa vila natal, leve dende o luns o seu nome. Uns actos que estarán presididos polo presidente da Xunta de Galicia, Alberto Núñez Feijoo.

O presidente da Xunta será recibido ás 17:30 horas polo alcalde de Frades, Miguel Prado, na casa do Concello, onde asinará no Libro de Ouro do Concello. Quince minutos despois, ás 17:45 horas, a comitiva oficial desprazarase ata o centro multiusos (situado na mesma praza), onde terá lugar o nomeamento de José María Botana López como Fillo Predilecto de Frades e o descubrimento da placa conmemorativa que lle dará o seu nome ao edificio multiusos, inmoble que tamén alberga o museo etnográfico de Frades. Despois dos discursos das autoridades, ás 18:15 horas terá lugar unha visita ao museo etnográfico. A xornada rematará cunha degustación de produtos típicos do entroido.

José María Botana


Na súa sesión de decembro de 2010, a corporación municipal decidiu por unanimidade darlle o nome de José María Botana López ao centro multiusos de Frades, que a partir deste luns pasa a chamarse “centro multiusos José María Botana”. José María Botana López naceu no 1933 en Frades. A familia Botana é oriunda da parroquia de Vitre, onde aínda existe a casa familiar.

É fillo de José María Botana Sánchez, que foi secretario do xulgado de Frades (cargo que compatibilizou co de  funcionario do Concello) e de Josefa López Díaz-Varela, que foi mestra en varias parroquias de Frades. A esta familia o Concello de Frades débelle ter o inmoble que alberga a casa consistorial, xa que o pai do homenaxeado mercou ese edificio para albergar a escola e as dependencias municipais.

Residiu ata os 11 anos en Cimadevila e ata o falecemento dos seus pais seguíu veraneando neste municipio. Actualmente reside en A Coruña ainda que segue vinculado a Frades, onde pasa coa súa familia varias temporadas ao longo do ano. Está casado con María Dolores Torrón Durán, coa cal ten tres fillos: José María, enxeñeiro de Telecomunicacións, María Dolores, arquitecta e exerce actualmente de profesora de debuxo na Coruña; e Francisco Manuel, notario en Cambados.

José María Botana López é magistrado xubilado do Tribunal Supremo con destino na Sala Cuarta e tomou posesión do seu cargo o 9 de marzo de 1998, en virtude do real Decreto 293/98 de 26 de febreiro, sendo nomeado maxistrado emérito por acordo do Pleno do Consello Xeral do Poder Judicial de 12 de maio de 2004. Está licenciado en Dereito pola Universidade de Santiago de Compostela no 1955 e Doctor en Dereito cun laude pola Universidade da Coruña no mesmo ano.

Ingresou na Carreria xudicial na Novena Promoción da Escola judicial, sendo nomeado xuíz de primeira instancia e Instrucción de entrada con destino en Belchite. Foi promovido a Maxistrado de Traballo, con destino na Maxistratura Nº 2 de Vigo, no 1973, de onde foi trasladado no 1979 á Maxistratura de Traballo Nº 3 da Coruña ata que foi nomeado Magistrado da Sala do social do Tribunal Superior de xustiza de Galicia, cargo do que tomou posesión o 23 de maio de 1989.

Desempeñou en Comisión de servizo en diversos xulgados de Galicia: Corcubión, Noia, Chantada, Lugo e outros. No ano 1997 foi nomeado Presidente da Sala do Social do Tribunal Superior de Xustiza de Galcia, cargo do que tomou posesión o 5 de setembro de 1997, cesando no mesmo ao ser promovido a Maxistrado do Tribunal Supremo, cargo no que se mantivo ata a súa xubilación en 2004.

Foille concedida a Cruz Distinguida de 2ª clase de San Raimundo de Peñafort por Orde de 22 de Janeiro de 1972, desempeñando no Xulgado de Primeira instancia e instrucción de Cambados. Realizou diversas publicacións individuais e colectivas e ten presentado numerosas ponencias en cursos e congresos.

Exerceu do 1990 ata o 1998 como profesor asociado de tipo 3 da área de Dereito de Traballo e de Seguridade Social da Facultade de Dereito da Universidade da Coruña ata que cesou ao ser promovido a Magistrado do tribunal Supremo e foi ademais profesor titor da UNED de dereito de Traballo e Seguridade Social na Centro Asociado da Coruña do 1985 ao 1998.
É académico de número e Secretario Xeral da Academia Galega de Xurisprudencia .

Ningún comentario: