Rematou o campo de traballo do Pico Sacro

Boqueixón, 02/08/2016 - Dende o 18 ata o 28 de xullo tivo lugar en Boqueixón o Campo de Traballo Internacional “O Pico sacro” que tivo como obxectivo fundamental a posta en valor do Pico Sacro como referente fundamental no plano histórico, paisaxístico e o seu carácter máxico. 
O Campo de Traballo estivo composto por un grupo de 16 mozo s e mozas entre voluntariado do Concello de Boqueixón e mozos e mozas de procedencias moi diversas: Taiwán, Alemaña, Suiza, Canarias, Ceuta, Valencia, etc... 

O traballo de promoción e posta en valor do Pico Sacro materializouse no Campo de Traballo a través de diferentes actividades:

- Elaboración de audiovisuais promocionais do Pico Sacro

- Organización dunha visita guiada ao centro de Interpretación e ao Pico Sacro para participantes doutros Campos de Traballo.

- Realización de Enquisas a Peregrinos do Camiño da Vía da Prata para coñecer a súa percepción do Pico Sacro.

- Elaboración de propostas para a dinamización do Pico Sacro no Camiño de Santiago. 

Ademais ao longo do Campo de Traballo, puideron estar en contacto con diferentes axentes sociais que aportaron a súa visión e coñecementos sobre o Pico Sacro e os diferentes recursos patrimoniais existentes en Boqueixón . 

Como en todo Campo de traballo, os e as participantes tiveron un espazo para a convivencia e o ocio a través de diversas actividades (kayak, xogos tradicionais, excursións, piscina, obradoiro de cociña internacional, observacións astronómicas no Pico Sacro, Visita a Santiago de Compostela, etc...).

O derradeiro día, tivo lugar un acto de presentación dos diferentes traballos á comunidade, no que se deron a coñecer os resultados finais dos traballos realizados ao longo deste Campo de Traballo.

Ningún comentario: