A concellaría de Acción Cultural está traballando nas bases reguladoras dunha convocatoria aberta de subvencións de apoio, en metálico ou en especies, a actividades culturais para este ano, 2016. Serán presentadas nos vindeiros días pola concelleira de Acción Cultural, Branca Novoneyra.
A Concellaría de Acción Cultural quere contribuír con elas á recuperación da vitalidade da cidade mediante a identificación e promoción de iniciativas que xorden do tecido cultural de Compostela, e fomentar o seu desenvolvemento autónomo e consolidación.
Con esa finalidade, esta convocatoria tenta favorecer a diversificación de propostas e potenciar novos ámbitos de creación artística e o diálogo entre tradición e vangarda, promocionar espazos que acollan as actividades e integrar nestas á Rede de Centros Socioculturais, potenciar novos usos doutros ámbitos privados e públicos como parques, prazas, rúas, mercados, bibliotecas, centros escolares, etc. Asemade, a convocatoria persigue a remuneración xusta do traballo dos axentes creativos e culturais, tendo en conta a situación de precariedade do tecido cultural.
As bases, que se presentarán a vindeira semana en rolda de prensa, conterán os criterios e o procedemento de concesión das subvencións dirixidas á promoción de actividades culturais e artísticas de amplo espectro orientadas a todo tipo de públicos e idades, que responsan aos criterios xerais de valor artístico, interese social, diversidade, redistribución territorial, desestacionalización e traballo en rede.
Ningún comentario:
Publicar un comentario