O equipo do Club de Debate Compostela da USC formado por María Táboas, Ignacio Seijo, Adrián González e Iván Rodríguez resultou finalista do primeiro torneo nacional de debate da Universidade de Salamanca sobre un futuro de Europa.
Esta primeira edición do certame versou arredor da cuestión concreta da viabilidade, e pertinencia, do futuro de Europa como unha federación de Estados. O proceso de debate era o usual no ámbito académico: catro membros por grupo, dous grupos en cada debate e un sorteo das posturas a favor e en contra xusto antes de comezar.
Participaron 12 grupos, dous pola ESADE de Barcelona, outros tantos pola Universidade de Salamanca, dous máis pola asociación DILEMA de Córdoba e pola USC, e un pola asociación CDU de Córdoba, pola Universidade de Lleida, pola Universidade de Deusto e pola de Comillas.
Os dous grupos da USC compóñanse por oito debatentes de diversas idades e carreiras. O segundo equipo –formado por Irene Picallo, Jessica Rodríguez, Ález González e Paula Mayo– chegou a cuartos tras superar unha fase de grupos e o primeiro a unha disputadísima final co equipo da Universidade de Córdoba, que finalmente se alzou en vencedor.
Os debates universitarios, nos que a USC soe moverse entre os primeiros postos, son para Nacho Seijo “necesarios para potenciar a facilidade de comunicación do estudantado, imprescindible na vida laboral de calquera persoa”. “Incentívase ademais o traballo cooperativo e o compañeirismo xunto á competitividade sana”, remarca.
Ningún comentario:
Publicar un comentario