AMES - BIBLIOTECA MUNICIPAL CHEGA OS 5000 SOCIOS


A Biblioteca municipal de Ames chega aos 5.000 asociados
O día 10 de novembro de 2010 a Biblioteca Municipal acadou a cifra de 5.000 persoas asociadas. Esta cantidade correspóndese co 17% da poboación que está censada actualmente no Padrón municipal que se sitúa nos 28.955 habitantes. Un 93% do total son persoas censadas no Concello, e o resto doutras partes de Galicia e mesmo de España. Case un 60% son mulleres. A biblioteca de Bertamiráns comezou a funcionar no ano 1996, mentres que a do Milladoiro abriu as súas portas en 1998. En 2005 as dúas bibliotecas unificáronse nunha soa para funcionar de xeito conxunto. No que vai de ano rexistráronse 583 novos socios/as.
Vivimos na era da información e o papel que xogan as bibliotecas municipais é fundamental para facilitarlle a toda a veciñanza o acceso tanto a libros como a prensa diaria. O Concello de Ames dispón de dúas bibliotecas municipais, unha situada na Casa da Cultura de Bertamiráns, e outra na rúa da Raxoeira, no Milladoiro. A biblioteca de Bertamiráns comezou a funcionar no ano 1996, mentres que a do Milladoiro abriu as súas portas en 1998. En 2005 as dúas bibliotecas unificáronse nunha soa para funcionar de xeito conxunto. A partir dese momento comezou a contabilizarse o número de socios/as das dúas bibliotecas como se fose un único servizo.
No que vai de ano rexistráronse 583 novos socios/as. Estas novas altas engadidas as que xa había fixo que a Biblioteca municipal de Ames chegase aos 5.000 asociados. Cada tres anos depurase a base de datos de socios/as e as persoas que non actualizan o seu carné durante ese período son dadas de baixa. Así, o ano pasado déronse de baixa arredor de 700 socios. Este ano, ademais de recuperar eses 700 socios, déronse de alta 583 persoas.
Neste momento a Biblioteca Municipal de Ames ten, coas 5.000 persoas asociadas, o equivalente a un 17% da poboación actual do Concello. Sen embargo, aínda que esta cantidade se corresponde cunha porcentaxe sobre a poboación total do concello, non debemos esquecer que moitas das persoas atendidas non pertencen ao concello de Ames, senón que son dalgúns dos concellos limítrofes e mesmo doutros de Galicia e de España.
Do total de persoas asociadas, 4.640 están censadas en Ames (93% do total de socios/as) e 360 usuarios/as, que se corresponde co 7% restante, proceden doutros concellos próximos ou mesmo de España que empregan aínda así o noso servizo de bibliotecas. De fóra de Ames, a meirande parte dos usuarios proceden de Brión (127 persoas asociadas que representan o 2,5% do total de socios), de Teo (103 persoas asociadas que representan o 2,1% do total de socios) e de Santiago de Compostela (68 persoas asociadas que representan o 1,4% do total de socios), por esa orde.
Tamén hai 22 socias e socios doutros concellos da comarca como A Baña, Negreira, Padrón e Rois. De Concellos máis afastados hai 34 socios, e de fóra de Galicia 6. Estes dous últimos datos corresponden sobre todo a persoas que acostuman a utilizar a biblioteca durante os meses de verán. Ademais do total de asociados 7 corresponden a socios institucionais e o resto a socios persoais.
Clasificación por xénero
É notábel o número de mulleres fronte ao de homes. Así, dos 5.000 socios/as, 2.932 persoas (58'7%) son mulleres fronte aos 2.061 homes que representan o 41,3%. Se temos en conta os nenos e nenas que teñen ata 14 anos o 49,5% (758) son nenas e o 50,5% (773) nenos. En canto aos maiores de 14 anos, o 62,6% (2.168) son mulleres e o 37,4% (1.294) son homes.
Por idades 1.531 son nenos e nenas de ata 14 anos, que representan o 30,6% sobre o total de socios, e 3.462 son xoves e adultos maiores de 14 anos (59,4%). Como dato curioso podemos citar que o usuario máis novo é unha nena que ten un mes de vida, mentres que o máis vello é un home de 79 anos nado no ano 1921.
Entre as persoas adultas existe unha porcentaxe importante de socios/as con NIE non español, é dicir doutros países europeos e extra-comunitarios que se corresponde co 7,7% do total. Non se pode especificar esta cifra para menores de 16 anos xa que a estes non se lle esixe presentar copia do documento de identidade para poder expedir o carné de socio. Da mesma maneira descoñecemos con exactitude os estados de orixe destas persoas xa que na ficha de inscrición non se solicita.
Así, na Biblioteca Municipal hai socios e socias de países europeos como Portugal, Gran Bretaña, Italia, Bélxica, Países Baixos, Romanía, Rusia ou mesmo China, Taiwán, Marrocos e Angola. Tamén hai persoas de practicamente todos os países de Latinoamérica. Por todos é sabido que o concello amiense sitúase bastante por encima da media galega en porcentaxe de poboación inmigrante, chegando ao 6.20 % da súa poboación total. Isto supón preto de 1.800 estranxeiros empadroados no concello, ademais dos retornados. Concretamente son 1.779 as persoas estranxeiras que figuran censadas no padrón municipal dun total de 28.736 habitantes. Uns 470 son estranxeiros comunitarios mentres que 1.309 son estranxeiros non comunitarios.
Esta información provén de datos actualizados e correspóndese cos usuarios que recibiron ou renovaron o seu carné de socio nos últimos tres anos. Ademais do servizo de préstamos de documentos, a biblioteca dispón doutras numerosas actividades. Co lema "Conto, contas, contan... Cantos contos contas ti?" os amienses poden participar en diferentes actividades enmarcadas dentro do programa de achegamento ao hábito de lectura con unha serie de obradoiros e visitas organizados polas bibliotecas municipais.
A Biblioteca de Ames conta cun dos catálogos máis consultado dentro da Rede de Bibliotecas de Galicia. Esta conexión permite intercambiar información con outros centros grazas aos préstamos interbibliotecarios a nivel autonómico pero tamén nacional e incluso internacional. Desta forma, os usuarios poden gozar dunha oferta aínda maior para satisfacer a súa necesidade de lectura e ocio.

Ningún comentario: