O CONCELLO DE
BRIÓN PON EN MARCHA NA RÚA DAS PEDRIÑAS O PRIMEIRO PARQUE BIOSAUDABLE DO
MUNICIPIO CON SETE MÁQUINAS PARA OS MAIORES
Xa están en
marcha as obras do segundo parque biosaudable, que estará situado na gran área
de ocio de Lamiño
15 de novembro de
2010.- O Concello de Brión vén de inaugurar o primeiro parque biosaudable do
municipio, situado na rúa das Pedriñas (Pedrouzos), e que conta con sete
máquinas para que os maiores brioneses poidan facer exercicio de xeito
saudable. O “Parque Biosaudable Rúa das Pedriñas” está situado nun punto
estratéxico do municipio: entre o centro de saúde e o centro social
polivalente, que concentra as actividades organizadas polo Concello de Brión
para a terceira idade nas que participan máis de douscentos veciños.
O parque conta
con sete máquinas deseñadas para a súa utilización por persoas adultas,
especialmente xente da terceira idade: pedais, balance, esquí, poni, surf,
cintura e temón. As máquinas poden ser utilizadas polos veciños e veciñas de Brión
cando e cantas veces queiran, se ben dende o Concello de Brión recomendan que
cadaquén consulte ao seu médico antes de utilizalas.
Recomendacións de
seguridade
Cada unha delas
está preparada para exercitar unha parte concreta do corpo e todas elas xeran
importantes beneficios tanto musculares como cardiorrespiratorios para os
usuarios. Iso si, o Concello de Brión instalou canda os aparellos dous carteis
informativos para a correcta utilización dos aparellos e recomenda que se
deteña o exercicio se aparecen síntomas como cansanzo intenso, dor no peito ou
palpitacións.
De feito, cada
máquina ten un texto informativo que explica non só os músculos que exercita e
os beneficios que aporta, senón tamén as instrucións para o seu uso. Un
exemplo, no caso dos Pedais infórmase de que exercita as extremidades
inferiores, mellorando a circulación, aliviando dores, evitando a retención de
líquidos e relaxando o corpo. Para o seu uso, recoméndase sentarse e pedalear a
ritmo cómodo, sen chegar a cansarse.
Así, cada unha
das sete máquinas do “Parque Biosaudable Rúa das Pedriñas” está pensada para
exercitar unha parte do corpo. Mentres o Balance fortalece e mellora a
axilidade de nocellos e xeonllos, o Poni fortalece a musculatura de brazos e
pernas mellorando as funcións cardíaca e pulmonar. O Temón serve para a
rehabilitación de extremidades, mentras que o Cintura permite reforzar a
musculatura lumbar e abdominal. Finalmente, o Surf exercita a columna e a
cadeira mentres que o Esquí fortalece os músculas das extremidades e da
cintura, mellorando ambos as funcións cardíaca e pulmonar.
Ao ser un espazo
saudable, o “Parque Biosaudable Rúa das Pedriñas” conta tamén cun panel
informativo da Fundación Deporte Galego, da Xunta de Galicia, e do Concello de
Brión que ofrecen recomendacións a seguir para a práctica de exercicio físico
saudable. Así, recoméndase non utilizar estas máquinas sen antes ter feito uns
exercicios de quecemento, como camiñar 5 minutos a ritmo medio e facer 2
minutos de exercicios de elasticidade muscular.
Así mesmo,
recomenda sesións de entre 20 e 60 minutos (cinco días á semana) nos aparellos
destinados a exercicios cardiorrespiratorios (como o Surf, o Esquí ou o Poni) e
sesións de forza de 20 ou 30 minutos (2 ou 3 días á semana) nas demáis máquinas
(Pedais, Balance, Temón e Cintura). En ambos casos, recomenda facer exercicios
de baixa intensidade e en quendas de 10 minutos. Finalmente, lembra a
importancia de facer uns exercicios para estirar os músculos unha vez rematado
o uso das máquinas do “Parque Biosaudable Rúa das Pedriñas”.
Segundo parque
O “Parque Biosaudable Rúa das Pedriñas” é a
primeira iniciativa deste tipo que se acomete no municipio de Brión, se ben
dende o Concello brionés xa está proxectado un segundo parque biosaudable para
a terceira idade dentro da gran área de ocio que está a construír en Lamiño.
Unhas obras que
tamén inclúen un parque infantil e unha pista de skate para a mocidade e para
as que o Concello de Brión conta cunha subvención de 100.032 euros da
Deputación Provincial da Coruña. Na actualidade, xa están rematados os
traballos de construción do parque infantil e agárdase que as obras de
construción do parque biosaudable e da pista de skate poidan comezar en breve.

Ningún comentario:
Publicar un comentario