Oroso - Convenio de colaboración cos municipios portugueses de Figueira da Foz e Góis

O Concello de Oroso vén de asinar un protocolo de colaboración cos municipios portugueses de Figueira da Foz e Góis, así como coa Asociación da Amizade e das Artes Galego Portuguesa (AAAGP) para promover a cultura de todas as partes asinantes a través da realización de eventos de diversa índole que permitan afondar no coñecemento das culturas a ambos lados do río Miño. Un convenio que foi asinado na tarde-noite de onte venres en Figueira da Foz (Portugal) polo alcalde de Oroso, Manuel Mirás; o presidente da cámara municipal (equivalente a alcalde) de Figueira da Foz, Joao Albino Rainho Ataíde das Neves; a presidenta da cámara municipal de Góis, María de Lourdes Oliveira Castanheira; e a presidenta da AAAGP, María da Conceiçao Alberto Marques Ruivo.

O alcalde orosán agarda que este acordo de colaboración “sexa só o principio de moitos máis que traian maior benestar aos nosos veciños e veciñas de ambos lados do río Miño”. Neste sentido, Mirás indicou que “hoxe teño unha sensación moi semellante á que tiven no 2003, cando comezamos os primeiros contactos coa cámara municipal de Góis. Moitos pensaron que era un acto cara a galería, pero da nosa relación con Góis tiramos un certame de prestixio internacional coma GoisOrosoArte, potenciamos o intercambio cultural entre as nosas entidades culturais e sacamos moitas experiencias e coñecemento moi útiles a nivel de xestión da administración, de servizos sociais, de protección civil, de extinción de lumes... que permiten que sexamos quen de prestarlles un mellor servizo aos nosos veciños e veciñas en Oroso”. 

Mirás lembrou que “sempre fun defensor da colaboración entre municipios como a mellor forma de garantir o desenvolvemento e o benestar dos nosos veciños e veciñas. Hai quen defende que hai que obrigar aos municipios a fusionarse, poñendo como escusa á crise económica. Eu son dos que respecta profundamente a identidade e a cultura propia dos pobos. Pero tamén digo que son un dos maiores defensores da colaboración entre municipios. A todos os niveis, non só a nivel cultural”.

Contido do protocolo
O protocolo de colaboración asinado en Figueira da Foz ten como obxecto afondar nas relacións institucionais entre os asinantes e aproximar as culturas de ambas rexións a través da realización de eventos de diversa índole que poderán ser suxeridos tanto pola Asociación da Amizade e das Artes Galego Portuguesa, como polos tres municipios participantes. Un convenio que terá unha duración dun ano, prorrogable automaticamente por iguais períodos mentres así o desexen os asinantes.

Así, a proposta de actuación para o ano 2016 inclúe cinco proxectos, dous relacionados coa literatura, outros dous coa escultura e a creación dun premio anual de arte intermunicipal. A proposta inclúe a edición, en febreiro de 2016, dun libro de poesía con ilustracións que serán achegados por autores de Oroso, Góis e Figueira da Foz. Ademais, inclúe a publicación dunha revista anual, “Abraçados pela arte”, para divulgar as actividades culturais que realizan os tres municipios.

Así mesmo, está previsto crear un Premio Anual de Arte, de carácter trienal, para homenaxear a unha personalidade das artes que destaque en cada un dos municipios. Trátase dunha iniciativa semellante á que xa se está a executar na Figueira da Foz, co “Premio Bienal de Arte Mário Silva”, pero que se complementará cunha exposición de arte que percorrerá os tres municipios.

Por último, e de cara a destacar a ligazón entre os tres municipios, o protocolo contempla a execución dunha escultura común realizada pola AAAGP que terá como temática a troita e a sardiña, elementos que vencellan aos tres concellos. Así mesmo, executarase un panel cerámico para colocar nun espazo público de cada un dos municipios que pretende converterse no elo de identidade intermunicipal.

Ningún comentario: